Colosas 3:10 - El Nuevo Testamento

¹⁰ Ahora nuevo ya el di ustedes naturaleza, y ta continua pa ustedes aprende el maga cosas bueno. Cay Dios el creador pirmi ta hace de nuevo el di ustedes entendimiento, para queda igual el di ustedes naturaleza con el di suyo naturaleza.

Colosas 3:10 Referans Kwoze

Roma 12:2

No ustedes sigui el mal costumbre del maga gente de este mundo, sino rindi con Dios el di ustedes maga corazon y pensamiento para puede le cambia de nuevo con ustedes y despues ay puede ustedes sabe si cosa el deseo de Dios. Y ay sabe tamen ustedes si cosa el bueno para hace y si cosa agradable y justo gayot na su vista.

Efeso 2:10

Dios amo el di aton Creador de este nuevo vida de fe, y ya crea le canaton para sigui kita el maga costumbre bueno, y para hace kita el maga trabajo y accion bueno, por causa del di aton union con Jesucristo. Dios ya prepara ese maga buen trabajo antes pa gayot, para ahora hace kita con ese.

Colosas 3:12

Ustedes amo el maga gente devoto con Dios, cay ya escoje le y ta ama le con ustedes. Poreso necesita ustedes tene lastima, tene buen deseo para ayuda con el maga otro gente, tene amable corazon y paciencia, y no queda orgulloso.

2 Corinto 5:17

Entonces, al quedar un gente creyente, unido ya le con Jesucristo y igual como nuevo pa lang ya crea el di suyo corazon. Todo el maga cosas daan na su vida dol ya desaparece ya, y todo ya queda ya nuevo na di suyo pensamiento.

Colosas 3:14

Y omenta pa el amor con ese maga cosas que ya menciona yo. El amor amo que ta amarra con todo ese maga buen cosas, y ta amarra junto con todo el maga creyente para tene harmonia completamente.

1 Juan 2:5

Pero si quien ta obedece el maga palabra di Jesucristo, el amor di suyo para con Dios ay omenta que omenta, para ay puede ese queda completo. Y si quien ta habla que ta continua le vivi unido con Dios, ele necesita tamen vivi como ya vivi el Cristo cuando taqui pa le na mundo. Si ansina man kita ta vivi, puede asegura que tiene kita buen relacion con Dios.

Roma 13:14

Pero deja con el Señor Jesucristo para ele amo ay queda el di ustedes defensa como el di ustedes armas, y no dale lugar con el di ustedes mal naturaleza para el di ustedes maga mal deseo ay controla con ustedes.

1 Juan 2:3

Si ta obedece kita el maga mandamiento de Dios ay puede asegura que conoce gayot kita con ele.

Roma 8:29

Con quien Dios ya escoje, ya planea tamen le que sila ay queda el di suyo maga anak igual con su Hijo, pero su Hijo ay tene el mas alto posicion entre el maga otro anak de Dios.

Juan 17:3

El vida eterna puede yo esplica como ansina, que necesita sila conoce con uste quien el unico verdadero Dios, pati con Jesucristo, con quien uste ya manda aqui na mundo.

El Revelacion 21:5

El quien sentao na trono ya habla, “Ahora ta cambia yo de nuevo todo el maga cosas!” Despues ya habla le conmigo, “Escribi este maga palabra cay el cosa yo ta habla verdad y puede gayot tu confia.”

Efeso 2:15

Si Jesucristo ya hace sin efecto y sin poder el maga mandamiento del ley di Moises, por medio del di suyo muerte na cruz. Ya hace le ansina para crea un nacion nuevo del dos raza man enemigo, el maga Judio y el maga hende-Judio, y ansina tiene sila paz entre canila por causa del di ila union con Jesucristo.

Galacia 6:15

Nuay valor con Dios si ta hace islam o hende, pero el unico cosa importante amo si un gente ta queda dol nuevo criatura por causa del di suyo nuevo vida como creyente di Jesucristo.

2 Corinto 4:6

Na principio del mundo Dios ya manda arde con el claridad na oscuridad por medio lang de palabra. Y ahora ele mismo amo tamen ya causa arde el di suyo claridad na di amon maga corazon, para hace canamon entende que el persona di Jesucristo ta reflecciona el gloria de Dios.

2 Corinto 3:18

Hende kita como si Moises quien ya tene cara tapao, sino kita maga creyente ta reflecciona el gloria del Señor, dol tiene ya kita cara que nuay mas velo. Ansina el di aton maga vida ta cambia para puede llega na di suyo gloria. Ese gloria quiere decir el di suyo naturaleza y caracter. Ese gloria di suyo ta penetra canaton para puede kita entra paso por paso con ese, y este cambio para canaton ta sale con el Señor, quien amo el Espiritu de Dios.

Roma 13:12

Ahora, igual ya como si fuera cerca ya acaba el noche y ta amanece ya tamen el dia; entonces descansa ya kita de hacer aquel maga mal trabajo que el maga gente acostumbrao hace na oscuridad. Hace ya kita maga buen trabajo que ay sirvi de armas para man contra kita con el oscuridad del maldad.

Galacia 3:27

Cuando ya queda ustedes bautisao por causa del di ustedes fe y obediencia con ele, el di ustedes costumbre ya queda tamen igual con el di suyo.

Hebreo 6:6

Entonces, imposible ya gayot manda canila arripinti por segunda vez, cay como si fuera ta clava ya tamen sila otra vez na cruz con el Hijo de Dios, y igual como ta ganguia ya lang sila el muerte di suyo.

Roma 6:4

Y por medio de este bautismo ya queda kita unido con ele na su muerte, dol ya enterra canaton junto con ele para conforme ya levanta si Jesucristo del muerte por medio del grande poder del di suyo Padre, kita tamen ay tene un nuevo vida junto con ele.

2 Corinto 4:16

Poreso hende gayot came ta perde animo. Masquin ta queda viejo y maluya ya el di amon maga cuerpo, pero todo el dia ta queda mas fuerte el di amon alma que ta vivi hasta para cuando.

Filemon 1:6

Ta reza yo que el buen relacion entre kita maga creyente ay lleva con uste buen entendimiento de todo el maga cosas bueno que tiene kita, que ta sale con Jesucristo para canaton.