ZEKHARIAH 1:6 - Cho Bible Common Language 2016

⁶ Kei naw ka chang gui prophet gui ung nami pupa gui am thumkhän la m’cäi nak cu ka pe gui ci. Cun ung phi ngami naw a i ah kä ngai u ne, acun ah amawng ma ung yaica ci gui. Cun kawn ah ngami cu ng’yu ba u neta, kei M’gäi ciah Bawipa naw ka pyen ah mäih ah ka m’kyuk gui ciah pyen ci gui.’ ”

ZEKHARIAH 1:6 Referans Kwoze

NG’ÄI KYAH 2:17

Bawipa naw abi vai ah am kyih nak cu, ak hnu ah bik ci nei. Ani naw acau pui a nak bäi gui pyi ah mäi ah ah chimgein nak kä om sei, ani naw na m’di gui ci nei. Ani naw mi ga gui am näng nak pe gui ci, mik mi ah yung kyak ah phäh ah yeikyai nak pe gui ci.

THULÄÄN NAK 28:15

“Cun ung phi Bawipa nami Khanpughi ah ng’thu kä läk ne, tuhngawi kei naw ka ning pek gui ah ang thumkhän gui la thukhän gui avan cu nangmi ah khan ah gawk lawk khai.

MATTHE 24:35

Khankho la khomdek a maih ung phi kei ah thu cu kä maih khai nei.

JEREMIAH 23:20

Cun cu ani naw abi vai ah ang ngaih gui nü kä abi pha ah chuih kä ng’pyi khai. Cun ah hnüüp gui a gawk law ung a chang gui naw htei cha sei hmat khai gui.”

AMOS 9:10

Ka chang gui ah ng’lung ungka cheishoh ci gui phung cu ng’tuk nak ung ngawn gui vai — Cun ah chang gui cu ‘Khanpughi naw, a i leigai awn phi kä na et sak gui khai, cik ciah chang gui avan ah kyak khai’ ” cik ci.

JEREMIAH 44:28

Cun ung phi nangmi ungka chang api cu sih nak ungka laut ne Egypt ah ka Judah ah nami law ba khai. Cun kawn ah k’pawih ba ci gui naw kei ah ng’thu ang, ahei ah ng’thu ang abä ah hmat khai gui.

KHEI NAK 23:19

Khanpughi cu hleei ciah chang ah mäih ah kä kyak ci; Ani cu am lung ngaih m’thawng ciah chang ah mäih ah kä kyak ci. A shaitak phung cu ani naw bik ci. Ang thu ah mäih ah ani naw bik ci.

1 THESSALONIAN 5:4

Cun ung phi phäi nau gui aw, nangmi cu hmüp khui ung nami om ba ciah kä kyasei, cun ah hnüüp cu m’guk-ei ah mäih ah nangmi ah kä gawk lawk khai nei.

MALAKHI 3:18

Cun kawn ah mä ng’düng ci gui la chang shekha gui ah khan ah, ka khuut bik ci la kä bik ciah khan ah, a i ah a kyak law cu ka chang gui naw hmuk khai gui nei” cik ci.

HOSEA 9:15

Bawipa naw pyen ci, “Ngami naw akshe ami bi nak avan cu Kikal ung ng’tün ci, Acu ah tün ne kei naw ngami cu ka thüi na gui ci. Ngami naw shetkat nak ami bi ah phäh ah kyak ci. Kei naw ka khaw ungka naw ka k’täm gui khai, kei naw kä ka m’hni ba gui khai. Ami ng’vai gui ami van naw na hnungtuk püi ci gui.

EZEKIEL 37:11

Khanpughi naw na pyen nak ci, “Hnicim chang, Israel chang gui cu shin ah guh gui ah mäih ah kyak ci gui. Ngami naw, ngami cu chawng pyi ci gui, ngaih u vai kä om ci, ma lam ah ka vai kä om ciah pyen ci gui.

EZEKIEL 20:43

Cun kawn ah nangmi naw nami bi ah ak shesham gui la nami mät naw nami mät a i hlawk ah nami lelawi sak cu nami shüm ba khai. Nangmi naw nami bi ah ak shekha avan ah phäh ah nami mät naw nami mät nami shemshai khai.

NG’ÄI KYAH 1:18

“Cun ng phi Bawipa cu taga ci, kei naw kä ka ngaih ah phäh ah kyak ci. Na ngai vä, a khaw päng ung chang gui, kai ah ka m’neh nak cu na teng vä, Kei ah ka chang hnumi pami chang nong gui cu, pha ne ahei ah hteh püi ci gui nei.

JEREMIAH 26:15

Cun ung phi nami hmat vai cu, kei nami na ngawn ah a kyak ung, nangmi la shin ah mang gaw ung chang gui cu changni ngawn na phäh ah katnak gah khai gui, a i ah kyasei ci ung, shin ah thukhän ka ning pe gui khai ah kei cu Bawipa naw ana tüih law ah kyak ci.”

JEREMIAH 4:4

Nami Bawipa, kei awn ng’thu mi khän cu nami k’pan vai nei, nami mät naw nami mät kei ung nami ng’ap vai, nangmi Judah la Jerusalem chang gui. Cun ah kä nami bi ung nangmi naw akshe nami bi ah hmawk ah ka m’lungshe nak naw mei ah mäih ah ning ui gui khai nei. Cun ah a uih law ung cun m’sih khai a u kä om khai nei.”

ISAIAH 55:1

Bawipa naw pyen ci, “Tui gha ciah chang nü law vä — shin ung tui om ci nei! Ngui kä tak ciah chang gui law vä — htam’guh khleih ne ei law vä! Law vä! Wine la suktui khleih vä — nang ung a i phi kä ng’pyi khai nei!

ISAIAH 44:26

Cun ung phi kei ah ka chang shäm naw cängbang nak abi ah a kyak ung, kei ah ka pawng püi gui m’than khai ah ng’shächang ka tüih ah a kyak ung. Cun ah pawng püi nak gui la cängbang nak gui cu akcang ah kyak khai ah kei naw ka bik ci. Kei naw ka m’thein gui ci. Jerusalem ung chang gui om ba khai gui, Judah mang gaw gui co ba khai gui. Cun ah mang gaw gui cu didam nak ung ka, Tho law ba khai gui.

JOB 6:29

Nangmi cu a shou nak ah nami gawk ci nei. Kä taga cicu m’düm vä. Kä na m’kat vä. Kei cu ka ng’düng ci nei.

THULÄÄN NAK 28:45

“Shin ah leigai gui avan nami khan ah gawk lawk khai. Cun gui cu nangmi kä nami di pha ah chuih nangmi ung om khai gui. A i ah kyasei ci ung nangmi naw Bawipa nami Khanpughi ah ng’thu phi kä läk ne a ning pek gui ah thumkhän avan phi kä nami pang ci.

THULÄÄN NAK 28:20

“Nangmi cu akshe bi ne Bawipa nami hnungtuk püi ah a kyak ung, ani naw leigai la ang gogan nak gui cu nami khan ah law püi khai. Nami bi nak päng ung yaica nak om khai, nangmi ang ghit ah kä a ning m’di pha gui ah chuih acun ah kyak khai.

KHEI NAK 33:56

Kä nami k’täm gui ah a kyak ung, ngami ka m’di gui vai ah pawng püi nak awn nangmi ka ning m’di gui khai.

KHEI NAK 32:23

Cun ung phi nangmi naw nami shaitak kä nami k’pan ah a kyak ung, nangmi naw Bawipa hnu tuk püi ne nami hmakak ciah kei naw ka ning k’bäi gui khai. Shin ah mawng ung hma nak kä nami bi en vai, nami katnak ah phäh ah m’kyuk nak nami gah khai nei.

THULÄÄN NAK 28:2

Bawipa nami Khanpughi cu nami läk vai. Shin ah hriham gui avan cu nang mi ah ka ah kyak ci.

ISAIAH 21:17

Kedara pakhui ung likaap gui cu am gäi pi ah kyak ci gui nei, ngami ung ka, apihta nei k’pawih ba khai gui. Bawipa Israel khanpughi naw ka pyen nei.”

JEREMIAH 32:24

“Babilonian gui naw shin ah mang gaw tu ne khäm khai gui ah khui gui veing ne co ne khai u ne tu lawk ci gui nei. Ng’tuk nak, ei cawi nak la gawpyam nak naw shin ah mang gaw cu ngami ah kut ung ng’kiak sak khai nei. Nami van naw nami pyen gui abä law cu nangmi naw nami hmuhning ci nei.

JEREMIAH 36:28

ahei ca k’chaw la ba ne, akhtük ah ca k’chaw ung om ci gui cu gu ä,

JEREMIAH 39:16

m’gai ciah Bawipa, Israel khanpughi ah pyen cu Sudanese chang Ebedmelek am ka m’thein vai ah kyak ci, “Kei naw ka pyen ah mäih ah ka bik khai kei naw shin ah mang gaw ah khan ah kikap nak la kä bämang nak cu ka law püikhai. Cun gui a kyak yah ung nang naw a cu ah om me na hmuk khai.

JEREMIAH 44:29

Kei, Bawipa naw, shin ah hmun ung ka ning m’kyuk gui khai ci la nami khan ah dishum nak ka law püi khai cicu bä lawk khai, cicu kei naw m’khän nak ka ning pe gui khai.

DANIEL 4:28

Shin gui avan cu ghangpughang Nebukhadnezzar ah khan ah gawk lawk ci.

HOSEA 5:9

M’kyuk nak ah hnüüp cu gawk lawk ci nei. Israel gui cu di khai gui nei. Israel chang gui shin cu akcang ah kia lawk khai nei.

ZEKHARIAH 1:7

Darius cu ghangpughang ah a kyak nak, akum goi nak ah a cha lei ät nak (shebat cha), a hnüüp m’ku lei phli hnüüp ung Bawipa naw khawmü ah ka ng’mang ung thu na m’thein ci.

2 GHANGPUGHANG GUI 15:12

Bawipa naw Ghangpughang Jehu ung a pek ah shaitak cu kümbe ci, cun cu, nang ah htangshon, ang shon phli ung khüt sei, Israel ghangpughang ah kyak khai” ciah kyak ci.

ISAIAH 55:11

A cun ah mäih ah kei ah ka pyen ah ng’thu cu kyak khai nei — kei naw ka pawng püi cu bi vai ah cun cu kä shum khai; kei naw bi vai ah ka tüih law päng cu, a cun naw bik khai.

JEREMIAH 28:17

Hananiah cu a cun ah ak cha chih ung sik ci.

JEREMIAH 44:2

M’güi ciah Bawipa, Israel khanpughi naw pyen ci, “Jerusalem la Judah khaw ahei mang gaw gui avan ah khan ah kei naw dishum nak ka law püi cu nangmi nami mät naw nami hmuk ci nei. Tuh güt cun gui cu di ci, a cun ung a u phi kä om ci,

JEREMIAH 44:6

Cun ah kyasei kei naw ka m’lungshe nak la ka nget ngawng nak cu Judah gaw nu gui la Jerusalemlam gui ah khan ah yuk shawi ne, meiawn ka m’khih khai. Cun gui cu dishum u ne, tuh ngawi hmuh ah mäih ah teng dam vai ah kyak ci gui.

NG’ÄI KYAH 3:42

Keimi naw hmakat u ne kami ning hnungtuk püi ci nei. Cun ah kyasei nang Bawipa naw kä na na m’geinsei gui ah kyak ci nei.