TITUS 2:8 - Cho Bible Common Language 2016

⁸ A u naw kä a täitawk-en thei vai ah bä ciah thu lung gui na pyein vai nei, cun ung na ga gui naw mikmi ah khan ah a i ung phi katnak kä hmu u netah lü ng’aa khai gui nei.

TITUS 2:8 Referans Kwoze

1 PETER 2:12

Bawipa kä yum ci gui naw nangmi cu ak she nami bik ciah ami ning k’bün gui ung phi, kä yum ciah chang gui ah lung ah akni ah nami om vai. Bawipa a kyum law ba hnüüp ung nangmi ah nikiom nak cu hmu u ne, Khanpughi ami m’hlüngtai vai ah cun ah nami bi vai nei.

1 PETER 2:15

Akni ah nami om ih nak awn chang k’gu k’aang gui ah thu m’gawng cu nami shungshet vai ah Khanpughi naw ng’ya hlük ci nei.

1 PETER 3:16

Cunung phi ng’awi ng’gi nak la chang m’sui nak awn nami bi vai nei. Nami m’lung cu theing sak vä, cun ung bawi Khrit ah chang ah kia ne, akni nami bi lawh, ning päipih gui ciah chang gui cu, thui ng’aa khai gui nei.

1 TIMOTHI 6:3

Hngihnga ciah yum nak m’theithang ne, Bawipa Jesuh Krih ah thu düng la mi yum nak ah m’theithang nak,

2 THESSALONIAN 3:14

Shin ah kami ning m’khäh law gui ah ca ung ning m’cäi nak gui ah ng’thu kä läk tuk ciah chang cu, m’hnüt u netah, kä ng’gui ng’pha püi ne nami nawng vai nei, cun ung ani cu lü ng’aa khai nei.

NEHEMIAH 5:9

Cun kawn ah kei naw ka pyen cu, “Nang naw na bi cu chei ci nei! Nang naw Khanpughi na ngaih vai, düng ci na bi vai. Kami ga gui la khuihei chang gui naw ami na gaih m’gin vai ah amawng, nangmi naw a i kä nami pek en gui vai.

ISAIAH 66:5

Bawipa naw a pyen cu ngai vä, ani kyih aa ci gui la angthu ngai ci gui: “A i ah kyasei ci ung nangmi cu kei ung nami bekhüt ci, nami mät ah chang amshah naw ning gen gui ci, ngami cu nangmi awn a i phi kä bi ghawn khai gui. Ngami naw ning m’lep gui ne ami pyen cu, Bawipa naw a dämduh nak m’dang ne ning hun gui sä, cun ung nang mi yei uk ci sei kami ning hmu gui khai.’ Cun ung phi ngami amät cu lü ng’aa khai gui nei.

1 TIMOTHI 5:14

Cun ah kyasei hmaw sang ciah hmeinu gui cu ceimah ba u ne, hta nau u ne, ami kyong khui m’htei ne om u sä, cun ung mi ga gui naw mikmi ah mawng ak she ami pyein vai a i kä om khai.

LUKA 13:17

Cun ci khätah, Bawipa Jesuh ah a gaa gui cu ng’aa ci gui. Chang gui akda cu Bawipa Jesuh naw cäi aih vai abi gui ah hmawk ah yeikyai ci gui.

MAKUH 12:34

Ani naw cun ah hmuhmat nak awn a pyein cu Bawipa Jesuh naw hmat netah, “Nang cu Khanpughi ah kho awn kä nani ng’shawng ba ci nei” cine pyen nak ci. Cun kawn ah a u naw phi Bawipa Jesuh cu kä ng’shi ba yäi ci gui.

MAKUH 12:32

Cun ah thukhän saya naw, “Bawipa, nang ah thu pyein cu ang htei ah bä aih ci nei, Khanpughi cu tumat bäng om ci, Khanpughi ah kawn ah a hei kä om ba ci nei.

MAKUH 12:28

Cun ah Bawipa Jesuh la Sadducee gui ami ng’thu yah ung, ami pei ah thukhän saya tumat om tuk ci. Ani naw Sadducee gui-am Bawipa Jesuh naw akni ah m’hlan ne am thein gui cu ng’ya netah, Bawipa Jesuh ah pei ah law ne, “Thukhän gui nüng ung ak küikyang pi cu a i ang?” cine ng’shik ci.

MAKUH 12:17

Bawipa Jesuh naw, “Ghangpughang ah kaa cu ghangpughang-am ap ba vä, Khanpughi ah kaa cu Khanpughi-am ap ba vä” cine kyak na gui khätah ang htei ah cäicat ci gui.

TITUS 3:14

Mi chang gui naw sui ei vai ng’yak hlü gah nak vai ah, ak ni bi nak ung akhin cu mang thei vai ah, ng’thei sak gui ä. Ngami cu akholä düt ah kä ghing om men u sä.