THU PHLAAN 2:10 - Cho Bible Common Language 2016

¹⁰ Zaica nak na awt vai ah api ah phi kä na kyih-en vai nei. Nangmi amshah gui cu khawshe naw thawng ung ning chum gui netah, ning k’cet gui khai nei, hnüüp gha ah kyong ung yaica ne na om khai nei. Na sih ung khüt sei bekhüt ne om ä, kei naw näng nak ah ng’cheng ghin nak ka ning pek khai.

THU PHLAAN 2:10 Referans Kwoze

JAMES 1:12

Tüihtok nak om pang sei phi bekhüt ciah chang cu, yeikyai nak om ci, a i ah kyasei ci ung cun ah mäih m’nüm nak näng ciah chang cu Khanpughi naw, m’hni ciah chang ah khan ah a shaitaak ah, ghin nak ah m’cümhnah cu gah khai nei.

MATTHE 10:22

Kei ah hmawk ah chang naw ning gen gui khai, cun ung phi ak hnubäih ah khüt sei, düng ciah chang cu, hun phiawn nak gah khai.

1 PETER 5:4

Ang vaipi säih Htome uk ciah Bawipa ang dang law ung, angtäi ah pyü ne ng’shü ciah abämang nak ah ghui lukhu cu nami gah khai nei.

MAKUH 13:13

Kei ah hmawk ah chang van naw nangmi cu ning gen gui khai, cun ung phi akhnu ah khüt sei düng ciah chang cu hun nak gah khai nei.

EPHESIAN 6:12

Mikmi cu hnicim cang awn ng’tuk mi bik ciah kä kyak ci, khankho ah om ciah mümcha she gui la shin ah kho hmüp nak kho ung, uk ci gui, huham mah gui, la hlüngtai nak om ci gui awn ng’küükneet ne ng’tuk mi bik ciah kyak ci.

THU PHLAAN 2:9

Kei naw na yaica nak la na geinvai nak cu ka hmat ci, cun ung phi nang cu akcang ah na ng’bühmang ci. Keimi Jew chang nei cik ci gui naw ning m’kat gui ne ami ng’thu cu ka hmat ci, ngami cu Jew chang ah kä kyak ci gui, Satan ah chang ah kyak ci gui.

MATTHE 24:13

Cun ung phi ak hnu ah khüt sei düng ciah chang cu hunphiawn nak gah khai nei.

1 PETER 5:8

Cüivai vä, geing nah ne ngai vä! Na mi gaa, Khoshe cu, m’ngawk ciah kawnghlui ah mäih ah, a u ka bai khai ang cine ng’shui shüi shüi ci nei.

1 KORIN 9:25

Ng’längna tuk khai ah ng’theithang ciah güng’lah ciah chang phung naw, ng’kheing ciah thum’hnüt cu läk ci. Cun cu kä ng’täi ciah lukhu gah vai ah hmawk ah kyak ci: cun ung phi mikmi läi cu ng’täi ciah lukhu gah vai ah mi bi ah kyak ci.

MATTHE 10:28

Pumsa a ngawn hlawt ung phi Mumcha kä ngawn hlawt cicu kä nami kyih vai; pumsa la mümcha avan m’htei kho ah m’di hning ciah Khanpughi bäng nami kyih vai.

DANIEL 1:14

Ngami hnüüp gha ung m’nüm gui vai cu ani naw yum ci.

THU PHLAAN 13:7

Ani cu Khanpughi ah chang gui tu ne näng nak gui vai la akhaw päng ung a hlü hlü ah ng’thu ciah khui päng pa päng uk nak vai ah huham cu gah ci.

EPHESIAN 2:2

Khomdek khan ah cheishoh nak lam cu nami läk ci, kho k’häüung ka, mumchashe ah hlüngtai nak ah uknak cu nami läk ci, acun naw tuhbäi Khanpughi kä ngai ciah chang gui cu shum gui ci.

JOHAN 13:2

Bawipa Jesuh la ang Düihpüi gui cu mü-ei ei ci gui. Khoshe naw Simon Iskariot a hta Judas cu, gaa ah kut ung Bawipa Jesuh cu a ap vai ah am lung kyong ah am cäi pyi ah kyak ci.

JOHAN 12:25

Amät ah ghin nak vai bäng m’hni cicu didap ci nei; khomdek khan ah mät ah ghin nak ah kä ng’vang ciah chang cu angtai ghin nak gim ciah kyak ci nei.

LUKA 21:12

Cun gui kä a gawk law pha ung chang gui naw ning pha gui ne, ning dukdeiu na gui khai gui. Pum im ah m’khoichaa vai ah ning ap gui u ne, thawng ung ning chum gui khai gui. Nangmi cu kei ah hmawk ah ghangpughang ah ma, bawi ah ma ah nami gawk khai.

MAKUH 8:35

Amät ah hnun gui k’phiawn hlük ciah chang cu dimaih khai, kei la Thuni ah hmawk ah a hnun gui pek ciah chang cu hun nak gah khai.

HABAKKUK 2:3

Gu ne na gim vai, aküm nak ah khin kä gawk law phak ci. Cun ung phi ka ning m’dang aküm nak vai ah akhin cu ang ghit ah gawk lawk khai. A law nak ung api ah a shokshü ung phi, na gin vai, akcang ah gawk lawk khai, kä hleei khai.

DANIEL 1:12

“Hnüüp gha ung keimi cu na m’nüm gui vä, ei vai thui an la awk vai tui bäng na pe gui vä.

THU PHLAAN 13:2

A müi cu pupi kawng ah mäih law ne, a khaw gui cu khawm ah khaw ah mäih lawk ci. Am gawng cu phongkawng ah m’gawng ah mäih lawk ci. Shawk naw a hlüngtai nak, amangkiaang la m’gäi nak ah a huham cu khiküi-am ap ci.

LAMKTU 21:13

Cun ung phi Paul naw, “A i ah kyasei nang mi kyap lau u ne, kam lung nami na thüi sei sak ang? Kei cu Bawipa Jesuh ah hmawk ah, Jerusalem ung pha ne khih nak bäng ah kä kaak ciah, sih nak vai ah phi ka ng’düi ge ci nei” cine pyen na gui ci.

LAMKTU 20:24

Kei cu ka hnun gui ah kä ka ng’vang ci, a nam hnüt peit ah bi la, Bawipa Jesuh ah na peit ah bi, pyi ne bi vai cu ak tung ah kia sei, Khanpughi ah m’gein nak mawng Thu Ni cu hteit shüi ne pyein vai bäng ah kya ci.

JOHAN 13:27

Cun ah m’htut la ne a ei vai-am satan cu ani ah kyong ah lut pyi ci.

SAM 31:23

Bawipa cu m’hni vä, bekhüt ciah ak chang van naw, Bekhüt cicu Bawipa naw shungvong ci, cun ung phi chang ah ng’shei ci cu, amät ah om m’kyuk ci.

THU PHLAAN 2:13

Nang a hawi na om cu ka ning hmat ci, nang cu satan ah kiaang ung na om ci. Bekhüt ciah ka chang Antipas cu Satan ah om nak ung ami ngawn yah ung, nang cu kei ung ng’düng ne na yum nak kä na nawng ci.

THU PHLAAN 13:14

Ani naw ak htükbäih ah khiküi ah maa ah abi hning ah cäi aih vai gui cu m’dang ne khomdek chang gui cu hmühma sak gui ci. Ani naw khim awn leim ne phi kä si ne ghing ciah khiküi m’tamkhah nak ah a gup cu pyan sak gui ci.

THU PHLAAN 17:14

Ngami naw Htomehta cu ng’tuk püi khai gui. Cun ung phi Htomehta cu bawi nüng ah Bawi, mang nüng ah Mang (Ghangpughang nüng ah Ghangpughang) ah kyak ciah kya ne, ngami cu näng gui khai. Bawipa ah a ghü gui la bekhüt ne läk ci gui cu ani awn atäng ah näng nak gah khai gui,” cine pyein ci.

NG’ÄI KYAH 3:57

Nang naw na m’shang ne kä kyih en vai ah na na m’thein ci.