THU PHLAAN 10:1 - Cho Bible Common Language 2016

¹ Cun kawn ah khankho ah kaa m’gääi ciah khankho chang tumat kyum law sei ka hmuk ci. Ani cu khongmei sui ne ng’hlawp ci, alu cu yapi naw koi ci, a hmai cu khohni ah mäih lawk ci, a khaw gui cu mei ah däi ciah k’tung gui ah mäih lawk ci.

THU PHLAAN 10:1 Referans Kwoze

MATTHE 17:2

Ngami naw ami hmuh ge ah Bawipa Jesuh ah amüi cu ng’khukhlat lawk ci, a hmai cu khohni ah mäih ah pyü ne, a suisak gui cu bawk-en phäng phäng ne khang ci.

EZEKIEL 1:28

Cun ah avai gui avan cu zapi ah mäih ah kyak ci. Shin cu Bawipa ah om ah mawng dang sak ciah akdei khang ah kyak ci. Kei naw cun cu hmu neta m’dek ung ka hmai gawk khai ah ka kiuk ci. Cun kawn ah ka ng’yak ah k’aw cu,

THU PHLAAN 5:2

Cun kawn ah hlüngtai säih ciah khankho chang naw, “A u chang naw, shin ah m’hnüt nak gui cu khawk ne, ca k’chaw cu k’phian hning khai ang? cine m’lau sei ka hmuk ci.

DANIEL 10:6

Ani ah pumsa cu pyülung ah mäih ah vai ci, ani ah hmai cu kho lailäp ah mäih ah khang ci, amik cu mei ah mäih ah ng’shü ci. Ani ah akut gui la a khaw gui cu kyei m’tui ah mäih ah vai ci. Ani ah ak aw cu chang hli nän ah k’aw ah mäih ah ng’hmum ci.

THU PHLAAN 4:3

Ani ah hmai cu pyüü m’htak vai ah mäih ah pyü ci. Mang kiaang ah ang veing ung cüi ne ng’kah ciah yapi pawk ci.

THU PHLAAN 8:13

Cun kawn ah kei naw han teng netah, khankho k’häu ung yong ne ng’väi ciah vanbuuk hmu cu ka hmuk ci. Cun ah hmu naw, “A hei khankho chang pathum naw ami tum law vai ah phyungheng thum ah k’aw awn khomdek khan ah om ciah ak ghing gui cu, kyihkyawk nak, kyihkyawk nak, kyihkyawk nak om khai nei” cine pyein sei ka ng’yak ci.

SAM 104:3

Na im cu tui ah khan ah na co ci. Kho ng’mei cu ng’se ah mäih ah mang ne khokhi ah ng’phia ung na ng’cum ci.

SAM 97:2

Kho ng’mei la khomü naw ani cu koi ci; Ani naw düng nak la müi nak awn uk ci nei.

THU PHLAAN 1:7

Teng tu vä, Bawipa cu khawmei ung cun ne kyum lawk ci nei, chang nüng nüng naw hmuk khai gui nei, amät k’htei awn shun te ci gui naw phi hmu tuk khai gui nei. Khomdek ah khan ung chang ah hta avan cu haala yawp khai gui nei. Cun cu akcang ah kya sä!

LAMKTU 26:13

Cun ah kami hteh yah, kho hnüüp lunglai ung, hni ah dei pi ciah ak dei cu, khankho ah kaa kya law ne, veing ne na shü law sei ka hmuk ci, kami ng’gui ci gui naw phi hmu tuk ci gui.

LUKA 21:27

Cun kawn ah küikyang ciah hlüngtai nak la bämang nak awn be ne, ng’mei bawk ung ng’cum ne lawk ciah chang ah Htapa cu nami hmuk khai.

DANIEL 7:13

Mü ah cun ah muimang ka hmuh sangung, chang ah mäih tumat cu ka hmuk ci. Ani cu khong mei naw koi sei kei täng ah ng’et lawk ci. Cun kawn ah ani cu angtäi ah ghing ciah ma ah hteit ci, a ma ah hteh nak hning gah ci.

NG’ÄI KYAH 3:44

M’lungshe nak ah khongmei cu shah aih sei, keimi ah taigü nak naw kä k’täih hlawt ci nei.

ISAIAH 54:9

“Noah ah akhin ung kei naw shai ka tak ci, m’dek khan ah tuiyin kä mü ba khai ah. Tuhbäi nangmi ah khan ah kä ka m’lungshe ba khai ah shai ka tak ci.

ISAIAH 19:1

Shin cu Egypt ah mawng thum’khäh ah kyak ci. Bawipa cu khongmei akyäpah ng cun ne Egypt ah lawk ci nei. Egypt gui ah amiagup gui cu ama ah ng’hlet ci gui, Egypt chang gui ami thagui maih ci.

SOLOMON NG’Ä~ 5:15

A pei khaw gui cu ghui awn vook ah toulung gui ah mäih ah kyak ci. Abäkhäk nak cu Lebanon M’htung ah hlüng ciah cedar sing gui ah mäih ah kyak ci.

TAIGÜTHUM 16:2

Ani naw “Na nau Aaron am na m’thein ba vai, ani cu yihdung ah ak um a theingcim nak pikbäih ung amät ah khin bäng ung a hteh vai, a i ah kyasei ci ung cun ung, Thumkhän M’küm ah a khüm ah khan ung, khongmei ung kei cu ka ng’dang ci. Ani naw kä a ngaih ah a kyak ung ani cu ngawn vai kyak khai nei.

PHYAWN NAK 16:10

Aaron naw chang ami van cu m’thein gui sei, ngami cu bung täng ah ng’hlat u khäta, Bawipa ah pying ciah akdei cu ang ghit ah khongmei ung dang lawk ci.

THU PHLAAN 18:1

Cun kawn ah khanmawpi ah kaa kyum lawk ciah khankho chang tumat cu ka hmuk ci. Ani ung küikyang ciah huham om sei, ani cu khomdek khan avan ung dei ne khang ci.

THU PHLAAN 18:21

Cun kawn ah k’thamah pi ciah khankho chang naw lungsum teih lawk ciah lungnu cu, la ne tuinu ung yuk shum netah “Babilon mang gaw cu a shin ah mäih ah tui ung yuk shum khai gui nei, a ngawi ah phi kä dang law ba khai nei.

THU PHLAAN 20:1

Cun kawn ah khankho chang tumat cu m’htei lungkhui k’hmawn nak la m’si guinu cu kawt ne khanmawpi ah kaa kyum law sei ka hmuk ci.