TAIGÜTHUM 5:16 - Cho Bible Common Language 2016

¹⁶ Ani naw am häu ah phäh ah a thung ba kawn ah bum hma ung bum ät awn a khap vai, cun cu taigüpa am a pek vai. Cun kawn ah taigüpa naw cun ah chang ah kat ah phäh ah seime awn khawihnah nak a douthak vai, cun ung ani cu m’geinsei nak gah khai.

TAIGÜTHUM 5:16 Referans Kwoze

KHEI NAK 5:7

Ani naw akat nak ang kiaa vai, akbe ah ang lawh vai. Ani naw a cheishoh nak ah khan ah k’bum hma ung bum ät awn m’khah ne, a katnak ah chang am a pek vai.

TAIGÜTHUM 22:14

“Taigü kyong chang ah kä kyak ciah chang tumat mat naw, kä hmat neta, theing ciah douthak cu a ei tu ah a kyak ung, ani naw a ei tu ah a phu cu acun ah bum hma ung bum ät awn m’khah ne taigü am a pek ba vai.

TAIGÜTHUM 27:31

Chang tumat mat naw cun gui ungka a khleih tuba hlü ah a kyak ung a phu lüng ah khan ah bum hma ung bum ät m’taih ne ak khleih tuba vai.

TAIGÜTHUM 27:27

Cun ung phi kä theingthap ciah seime ah a hta htük gui cu, a küikyang ah m’hnüt ah a phu lüng ah khan ah bum hma bum ät m’taih ne ak khleih ba vai. Kä a khleih tuba ah a kyak ung, a phu k’bäi ah mäih ah chang a hei ah yoih vai.

TAIGÜTHUM 27:15

Im ap ciah chang tumat naw im cu ak khleih tuba hlü ah a kyak ung im ah a phu ah khan ung bum hma bum ät awn m’khah ne a peik vai.

TAIGÜTHUM 27:13

Cun ah chang naw cun cu a hleih tuba hlü ah a kyak ung a phu ah khan ah bum hma ung bum ät awn am khah vai.

TAIGÜTHUM 5:10

Cun kawn ah a hnih nak ah kha cu m’khih ne douthak ah a douthak vai. Cun cu thungyo ah ciah bi ah kyak ci. A shicha ah taigü naw katnak bik ciah chang ah phäh ah khawihnah douthak khai, ani cu m’geinsei nak gah khai.

LAMKTU 26:20

Damaskas ung tün ne, Jerusalem, Judea kho avan ung la chang pakhui hei gui am, “Ami katnak ung ng’yu ba ne, Khanpughi ah ami ng’hlah law ba vai la ng’yu pyi ciah chang ah mäih ah ami om ih gui vai cu, m’thein gui ne, ng’thu ka pyein ci nei.

LUKA 19:8

Zakhaeus cu ng’düi law netah, Bawipa Jesuh-am “Bawipa, kei ah ka khawh cu a teih k’pai ne ghawipyam ci gui-am ka pek khai nei. Kei naw chang ah ngui kä düng ciah ka lak a om ung phi, a cun ah ngui ah ak phli ah ka pe ba khai nei” cik ci.

SAM 69:4

Amawng kä om ciah kei na gen ci gui cu, ka lumu ah ta, da pi ci nei. Ka gaa gui naw ami hleei pyen ne na ng’küük neet püi ci gui, ngami cu m’gäi u ne kei na ngawn hlük ci gui. Kei naw kä ka m’guk phi na m’thung sak ci gui.

TAIGÜTHUM 5:13

A shicha ah taigüpa naw chang ah katnak ah phäh ah khawihnah nak douthak khai, cun ung ani cu m’geinsei nak gah khai. Pawih ba ciah m’htut den cu taigüpa naw yawk khai, cun cu htang douthak nak ah kyak ci.

TAIGÜTHUM 5:6

Akatnak a gei nak vai ah htome ak khik baw, me baw Bawipa am douthak vai ah a law püi vai. Taigü naw cun ah chang ah katnak ah phäh ah khawihnah ne douthak pek khai.

TAIGÜTHUM 4:26

Cun kawn ah ani naw a thau avan cu sonkiang ah khan ah am khih vai. Cun cu hmuhchum-douthak nak ah seime ah thau am khih ah mäih ah kyak ci. A shicha ah taigüpa naw uktu ah katnak ah phäh ah khawihnah nak cu a douthak vai. Ani cu m’geinsei nak gah khai.

PHYAWN NAK 22:1

“Chang tumat naw seipat baw, me baw m’gu neta, ngawn ne baw, yoi ne baw a ciah a kyak ung, sei tumat cu sei hma awn m’thung khai, htome tumat cu htome phli awn m’thung khai.

TAIGÜTHUM 7:2

Shi ah douthak nak vai ah seime cu sonkiang ah alu täng ah ngawn vai, cun cu m’khih ne douthak nak ah seime ngawn nak ah kyak ci. A si cu sonkiang ah ak kit phli avan hnungtuk nak khai ah huk vai.

KHEI NAK 5:8

Dou khai ah chang cu si sei, ang een pi ng’lawh dou pek khai kä a om ah a kyak ung, cun ah ng’lawh cu taigü ah hmawk ah Bawipa am pek vai. Shin ah ng’lawh nak ung cheishoh ciah chang ah hmawk ah ng’gängsei bi nak ah htome cu mang vai.

1 SAMUEL 6:3

Ngami naw, “Israel Khanpughi ah Thukhän M’küm nami tha ba gui vai a kyak ung, nami hmakat nak nami sah nak ah kyak khai ah m’cühnah naw awn nami m’khah vai. Thukhän M’küm cu m’cümhnah nak kä om ciah kä hteit ba khai. Cun ung ngami naw nami gai khai, a i ah kyasei a ning m’kyuk gui phi nami hmat lawk khai.

TAIGÜTHUM 4:20

Ani naw katnak-douthak nak abi ah mäih ah a shin ah vantang awn bik khai, a shin ah mäih ah chang gui ah katnak ah phäh ah ani naw khawihnah nak cu bik khai, ngami cu m’geinsei nak gah khai gui.