TAIGÜTHUM 26:13 - Cho Bible Common Language 2016

¹³ Kei, Bawipa nami Khanpughi naw, Egypt khaw ungka ka ning law püi ba gui ci, cun ah kyasei nangmi cu changshäm ah kä nami kya ba khai. Kei naw ning yung kyak sak ciah huham cu ka cheiuh pyi ci, kei naw nami lu häng khai ah ka ning hteh sak gui khai.

TAIGÜTHUM 26:13 Referans Kwoze

EZEKIEL 34:27

Sing ghing gui cu m’theih khai gui, lolai gui ung geitkaw m’thawk khai, chang nü cu amät ah khaw geingbawi sei om khai. Kei naw ka chang gui ami khih nak gui cu cipit ne, ngami khlei htein na gui ciah chang gui ah kut ungka ka m’hlawt gui ung, ngami naw kei cu Bawipa ah na hmat khai gui.

SAM 116:16

Bawipa, kei cu na changshäm ah ka kyak ci nei; kanu ah bi ah mäih ah kei naw na bi ka bik ci nei. Nang naw sih nak ungka na na hun pyi ci nei.

TAIGÜTHUM 25:38

Shin cu Bawipa nami Khanpughi ah thumkhän ah kyak ci, ani naw Egypt khaw ah ka, ning law püi ba gui ne, Kanaan khaw cu ning pe gui ci, acu ah ani cu nami Khanpughi ah kyak khai.

PHYAWN NAK 20:2

“Kei cu Bawipa, nami Khanpughi, changshäm ah nam kyak nak ah Egypt khaw ungka, ka ning law püi ba gui ciah ka kyak ci.

JEREMIAH 2:20

Uk ciah Bawipa naw pyen ci, “Israel, cau pui nang naw kei ah huham cu na hnungtuk ci; kei na ngai ne na khawihnah vai cu nang naw nah mak ci, Hlüng ciah m’htung khan päng ung m’kim ciah sing ghing kaa päng ung nangmi naw khonglei khanpughi gui cu nami khawihah ci.

TAIGÜTHUM 25:55

Israel chang tumat cu angtäi sei changshäm ah kä kya hlawt khai, a i ah kyasei ci ung Israel chang gui cu Khanpughi ah changshäm ah kyak ci gui. Ani naw Egypt khaw ah ka law püi ba gui ci. Ani cu Bawipa ngami ah Khanpughi.

ISAIAH 51:23

Kei naw a cun cu ning yawshe na gui ci am, lam ung nami ng’zän khai ah ning ci gui ci am, m’vut ah mäih ah ning kai na gui ci am, ka pe gui khai nei.

TAIGÜTHUM 25:42

Israel chang gui cu Bawipa ah changshäm ah kyak ci gui, ani naw Egypt khaw ah ka law püi ba gui ci; ngami cu changshäm ah kyak khai ah kä yoih gui vai.

PHYAWN NAK 6:7

Nangmi cu ka mät ah chang ah ka ning pyang gui khai, kei cu nangmi ah Khanpughi ah ka kyak khai. Egypt khaw, khleihtein ungka ka ning m’hlawt gui kawn ah, kei cu Bawipa, nami na Khanpughi ah nami hmat khai nei.

EZEKIEL 30:18

Kei naw Egypt ah huham ka m’shet law ung Tahpanhes ah khan ah kho hmüp nak gawk lawk khai, ngami naw ami khähghah nak aih ah k’thagui cu ng’pyi khai. Egypt cu khongmei naw shung khai, mang gaw avan ung chang gui cu thanwg ung kium khai gui.

HOSEA 11:4

Kei naw ngami cu yum nak la m’hni nak awn ka kaih gui ci. Kei naw ngami cu kaw gui ne ka ng’being pha khai ah ka chang gui ci. Kei naw ngami ah ma ah kawp ne ka m’bei gui ci.

PHYAWN NAK 14:8

Bawipa naw ghangpughang cu ling sak ci, ani naw näng nak awn hteit ciah Israel gui cu k’täm law gui ci.

ISAIAH 9:3

Nang naw dämduh ciah hüithaw nak na pe gui ci nei, BAWIPA; Nang naw na yeikyai sak gui ci. Chang gui naw ami geit ami khäm ung, kä cun ung ami guh tep ah khawh ami ng’pai ung ami yeikyai ah mäih ah, Ngami cu nang ah bi nak ung hüithaw ci gui nei.

JEREMIAH 28:2

m’gäi ciah Bawipa, Israel Khanpughi naw pyen ci,” kei naw Babilonia ghangpughang ah huham cu ka cheiuk pyi ci nei.

JEREMIAH 28:4

Kei naw Judah ghangpughang, Jehoiakim ah hta Jehoiachin phi, Babilonia ah omktu ah ami hteh püi gui ah chang gui awn atäng ah ka law püi ba gui khai nei. Ä ya, kei naw Babilonia ghangpughang ah huham cu ka cheiuh khai nei. Kei, Bawipa naw ka pyen nei.”

NAHUM 1:13

Nangmi ah khan ah Assirian gui ah huham mah Nak cu, tuhbäi ka ng’pyi sak khai, Ning khit gui ciah gui phi ka pit sak khai.”