TAIGÜTHUM 1:3 - Cho Bible Common Language 2016

³ Ani naw sei tumat awn m’khih ne a douthak law ung api ah phi kä kheihlik ciah vantang cu a law püi vai. Ani naw Bawipa ah om nak ah Phung valuh nak ung a tha vai. Cun ung Bawipa naw ani cu dou khai.

TAIGÜTHUM 1:3 Referans Kwoze

THULÄÄN NAK 15:21

Cun ung phi sei me ung ak chei nak a om ah a kyak ung, shum ne, ng’khem ne, m’dauh ne, käcung a hei a leim bai a om ah a kyak ung, Bawipa nami Khanpughi cu, cun awn kä nami khawihnah vai.

HEBRU 9:14

Bawi Khrit ah si naw a i hlawk ah theingcim sak pi khai aw! Bawi Khrit naw ng’täi ciah Mumcha awn amät cu, katnak kä om ciah küikyan nak ah kya ne Khanpughi ah ng’ap pyii ci nei. Ani ah sihlui naw, alä düüt ah kyak ciah mi m’lung ngaih cu na theingcim sak gui khai, cun ung mikmi naw angtäi ghing ciah Khanpughi cu mi khawihnah khai nei.

PHYAWN NAK 12:5

Nangmi naw htome hta baw, mehta baw nami ghü vai. Cun cu kum ät lüng ciah a hlahta, kä kheihlik en ciah kyak khai.

EPHESIAN 5:27

Krihtabum naw ani ung ang ap law ba ung, ak kyom yüm yüm ah, alelawi, ak shekha kä om sei akümbe athangpai vai ah hmawk ah kiak ci.

THULÄÄN NAK 17:1

“Khei hlik ciah sei, htome awn Bawipa nami Khanpughi cu kä nami khawihnah vai, cun cu Bawipa naw thüi nak ci.

HEBRU 7:26

Cun ah kyasei Bawipa Jesuh cu mikmi ung hlü ci awn ng’müi ciah Taigü Tung ah kyak ci. Ani cu theingcim ci, shetkat nak ani ung kä om ci. Ani cu shetkat nak ungka m’chah ne, khan mawpi ah a thawh ba sak ah kyak ci.

EPHESIAN 2:18

Acun nak awn chang khui hei gui la Jew pakhui mi van cu Bawi Khrit awn Mumcha tumat ung mi kium ne, Pa Khanpughi ah ma ah mi gawk lawk ciah kyak ci.

JOHAN 1:36

“Teng tu vä, Khanpughi ah Htome hta cu ani nei” cik ci.

2 KORIN 9:7

Ak chang sing naw amät ah m’lung ung ayum nak awn a peittaak vai, ng’vang lang ne kä a peit vai, kä peit ung kä bä khai ciah ngai ne kä a peit vai; Khanpughi naw am lung yei nak awn pek ci cun vah m’hni ci.

MALAKHI 1:14

Ana pek vai ah a shaitak ah htome akni om lang sei, shekhak ciah ak ghing awn na khawihnah lawk ciah chang ah khan ah plah tam nak om sä! Kei cu küikyang ciah ghangpughang ah ka kyak ci, chang pakhui avan naw kei cu na kyih aa ci nei” cik ci.

EZEKIEL 20:40

Acun ah khaw, kei ah khomhtung theing ung, Israel khomhtung hlüng ung, nangmi Israel chang avan naw kei nami na khawihnah vai nei. Kei naw nangmi cu ka ning yei na gui khai, nami khawihnah nak gui, aknipi nami douthak gui, theingcim ciah nami m’cümhnah gui cu kei naw ka ngaih u khai.

SAM 110:3

Na ga gui na tuk gui hnüüp na chang gui naw ning düih püi khai gui. Khongawi k’siik ung khüi toi ah mäih ah, khom’htung theing ung na chang nong gui naw ning law nak khai gui.

SAM 40:8

Ka Khanpughi, na ng’yak hlü bi vai cu ka m’hni aih ci nei! Nang ah na m’theithang cu ka m’lung kyong ung ka m’küm ci nei.”

KHEI NAK 29:13

Shin ah ak htük bäih hnüüp ung ei-douthak nak cu Bawipa am nami pek vai, ang ui naw Bawipa cu yeikyai sak khai: vantang anong gha lei thum, htome hnih, kum ät ci lüng ciah htome m’ca gha lei phli, avan cu api ah phi kä kheihlik khai.

TAIGÜTHUM 3:1

Chang tumat naw a sei cu hmuhchum-douthak nak ah a law püi ah a kyak ung api ah phi kä kheihlik en ciah sei, vantang ah kyak khai.

PHYAWN NAK 24:5

Cun kawn ah chang nong gui tüi gui sei, ngami naw Bawipa cu m’khih ne khawihnah u ne, sei me gui awn khawihnah ne, hmuhchum douthak gui nak bik ci gui.

ATÜNNAK 22:13

Cun kawn ah Abraham cu mang shüi neta, pluup ung aki ng’awk sei om ciah htome cu hmuk ci. A hta ah hnün ung cun cu la neta mei awn m’khih ne khawihnah ci.

JOHAN 10:9

Kei cu m’kawt ah ka kyak ci, cun ah m’kawt ung kei awn lut ci phung cu hun nak gah khai, ani cu lut ng’laang ne khu ali nak hmuk khai.

LUKA 1:35

Khankho chang naw Mumcha Theing nak khan ah gawk lawk khai, Khanpughi ah hlüngtai nak phi nakkhan ah gawk lawk khai. Cun na kia sei theingthap ciah ak hmaw cu Khanpughi ah Htapa ah ming khai.

ISAIAH 1:11

Ani naw, “Nangmi naw k’pang ne kei am nami douthak al khawihnah nak a vim cu kei naw ka ng’ya hlük ciah nami ngai ne ma? M’khih ne nami khawihuah nak ah htome la nami setme akni pi gui ah thau vata, bä pi ci kei ung om ci nei. Vantang gui, htome gui la me ah si gui cu kei naw kabawung na pyi cinei.

PHYAWN NAK 32:6

A ngawi ung khaw ngawi hta chang gui naw, m’khih ne khawihnah nak seime gui la douthak ne ei vai gui cu law püi ci gui. Chang gui cu ngo ne ei aw u neta, ng’tunglam ne lawklak ci gui.

PHYAWN NAK 29:42

Akhin päng ung angtäi sei, shin ah douthak nak cu kei ah om nak ah phung ah m’kawt ung kei ah ma ah douthak ah kyak ci. Cun cu kei naw ka chang gui hmu gui ne ka ning thu püi nak gui ah kyak ci.

PHYAWN NAK 29:18

Htome avan cu sonkiang ah khan ah m’khih ne, ei ah douthak vai. Cun ah douthak ah ang ui cu kei naw yei ne ka dou khai.

ATÜNNAK 22:2

Ang htei ah na m’hni ah na hta tumat bäng Isaak cu Moriah khaw ah hteh püi ne na hteh vai. A cun ah ka ning m’shüm ah khomhtung ah, Isaak cu mei awn m’khih ne khawihnah nak na bi vai.

ATÜNNAK 8:20

Noah naw Bawipa ah khawih kiang co neta, theing ciah phyukha khisa gui, ming ät ungka tumat ci ghü ne, khawih kiang ung m’khih ne khawihnah ci.

ZEKHARIAH 13:7

Hlüngtai ciah Bawipa naw, “Tho law ä, khim ghaat aw, kei ah hmawk ah bii bik ciah htoshäm cu na tuk vai, Na ngawn vai, a htome gu cu püipyang khai gui. Kei naw ka chang gui cu ka tu gui khai.

KHEI NAK 23:3

Cun kawn ah Balaam naw Balak am, m’khih na na douthak nak awn shing ung düi ä. Cun sang ung Bawipa naw ana hmuh vai la kä ana hmuh vai cu, kei naw ka teng khai. Ani naw kei ung am than law phung cu kei naw ka ning m’thein khai” cik ci. Cun ah kyasei ani cu m’htung lai ah amät hang kai ci.

2 KORIN 8:12

Nangmi naw na mi peit hlü cang ah a kyak ung Khanpughi naw, yum nakcang awn nami peit cu ning dou pe gui khai, nangmi ah kä peit nak hning cu Khanpughi naw kä ning k’thäh gui khai.

JOHAN 10:7

Bawipa Jesuh naw a pyein ba mä cu,” Kei naw akcang ka pyein cu, kei cu hto gui ah luh nak m’kawt ah ka kyak ci.

KHEI NAK 23:19

Khanpughi cu hleei ciah chang ah mäih ah kä kyak ci; Ani cu am lung ngaih m’thawng ciah chang ah mäih ah kä kyak ci. A shaitak phung cu ani naw bik ci. Ang thu ah mäih ah ani naw bik ci.

TAIGÜTHUM 17:9

Bawipa am douthak vai ah kyak ci kyasei, ani naw Phung ung valuh nak ah kä kyak ciah, a hei ah a ngawn ah a kyak ah khoi ung, ani cu Khanpughi ah chang ah kä kya ba khai.

TAIGÜTHUM 4:23

ani ah cuun ngaih nak cu katnak ah a kyak ah a kyak ung ani naw a douthak vai ah kä kheihlik ciah me akhla cu a law püi vai.

PHYAWN NAK 35:5

Bawipa am douthak nak nami bi vai. Cun ah bi vai ah ng’ya hlük ciah chang phung naw ghui, ngui la kyei gui cu law püi ne a douthak vai nei.

PHYAWN NAK 29:4

“Aaron la a hta gui cu kei ah om nak ah phung ah m’kawt ung na law püi gui vai, tui na ng’si sak gui vai.

TAIGÜTHUM 16:7

Ani naw me hnih cu Bawipa ah om nak ah Phung valuh nak ung a law püi vai.

TAIGÜTHUM 8:18

Cun kawn ah Moses naw htome akhla cu m’khih ne douthak vai ah law püi khäta acun ah lu khan ah Aaron la a hta gui naw ami kut taih ci gui.

TAIGÜTHUM 7:16

Chang tumat naw khäntam bukbe nak ah hmuhchum douthak a law püi ah a kyak ung, käcung amät ah yum ah a douthak ah a kyak ung acun douthak hnüüp ung avan kä ei vai, pawih ba cicu lawk ciah hnüüp ung ei ba vai.

PHYAWN NAK 38:1

Douthak m’khih nak vai ah sonkiang cu akasia sing awn pyang ci. Cun cu phli kit nak ci, ayun dawng hma, akdang dawng hma, a hlüng dawng thum ah kyak ci.

PHYAWN NAK 36:3

Phung k’theing cawh nak vai ah Israel chang gui naw ami law püi ah douthak nak gui avan ungka ngami naw gah ci gui. Israel chang gui naw Moses am ami douthak gui cu a ngawi tä sei law püi ci gui.

PHYAWN NAK 35:29

Israel chang avan, Bawipa am douthak law hlük ci phung naw law püi ci gui. Cun gui cu Moses am a bi vai ah ang thumkhän nak ung mang vai ah kyak ci.

PHYAWN NAK 35:21

a cun ah bi hlük ci phung naw Bawipa ah om nak ah Phung cawh nak vai cu Bawipa am douthak lawk ci gui. Ngami naw khawihnah nak ung mang vai la taigü khingyih pyan nak vai ah hlü ci phung cu law püi ci gui.

KHEI NAK 23:30

Balak naw a pyen ah mäih ah law püi sei sonking päng ung vantang tumat la htome m’ca tumat ciah douthak ci gui.

THULÄÄN NAK 12:27

Bawipa ah sonkiang avan m’khih vai ah khawihnah nak cun phi acu ah douthak vä. Si k’peh nak ah sonkiang la me nami ei nak ung khawihnah nak cu, nami douthak vai.

KHEI NAK 23:27

Balak naw, “Kei awn a täng ah law ä, a hmun hei ah ka ning hteh püi khai. A cu ah kei ah phäh ah ngami na tam gui vai ah Khanpughi ah ang yak hlü om hman khai nei” cik ci.

TAIGÜTHUM 1:10

Chang naw a me baw, a htome baw a douthak ah a kyak ung, cun cu amca ah kyak khai, kä kheihlik en khai.

TAIGÜTHUM 4:15

Ami pahta ung ang vai gui naw vantang ah lu ah khan ah ami kut taih u neta, a cun ung ami ngawn vai.

TAIGÜTHUM 6:8

Bawipa naw Moses am thumkhän a pek cu,

TAIGÜTHUM 17:8

A u Israel chang naw phi, ami ng’lung ah om tuk ciah a u khuihei chang naw phi, m’khih douthak nak, käcung a hei khawihnah nak a douthak cu,

KHEI NAK 15:3

Vantang tumat, htome m’ca tumat, htome hta tumat, kä cun ung me hta tumat cu Bawipa am pe vai, cun cu m’khih ne douthak, kä cun ung thukhän k’be nak ah khawihnah nak, kä cun ung pängye douthak nak, kä cun ung yum nak täng ah nami pawi man ah pawi ung nami douthak ah kyak ci. Shin ah ei-douthak ah ang ui cu Bawipa naw yei nak ci.

KHEI NAK 15:8

M’khih ne douthak, kä cun ung, thukhän k’be nak ah khawihnah nak, kä cun ung, hmuhchum douthak nak ah vantang hta cu Bawipa am douthak law ung,

EZEKIEL 40:39

Cun ah luh nak ah akhan ung tawng lang phli om ci, akhan vangtäng ung hnih ciah kyak ci. Cun ah tawng lang gui ah khan ung, khawihnah nak ah douthak vai ni, apum lüng m’khih ne douthak vai ni, katnak ah phäh ah khawihnah nak vai la thungba douthak nak ah seme gui cu ngawn ci gui.

TAIGÜTHUM 4:3

Taigütung naw katnak bi ne, chang ah khan ah a shetkat ah a kyak ung, kä kheihlik en ciah seipat anong a pek vai. Akat ah phäh ah Bawipa a khawihnah ah kyak khai.

TAIGÜTHUM 4:32

Chang tumat naw katnak ah phäh ah douthak vai ah htome a law püi ah a kyak ung kä kheihlik ciah akhik ah kyak khai.

TAIGÜTHUM 5:15

Chang tumat naw kä ngaih-tüh ah Bawipa am pek vai ah ak theing cu a pek vai a häu ah a kyak ung, ani naw thungba nak douthak nak ah kä kheihlik ciah htome baw, me baw ak hla a law püi vai. Cun cu aküikyang ah a phu ami k’bäi ah kyak ci.

TAIGÜTHUM 5:18

Ani naw kä kheihlik ciah htome hla baw, me hla baw, thungba nak douthak ah taigüpa am a thak law vai. Cun ah a phu cu akükyang ah ami k’bäi ah kyak ci. Taigüpa naw katnak ah phäh ah khawihnah nak cu douthak khai, cun cu chang naw kä ngaih-tüh ah a katnak ah kyak ci, ani cu m’geinsei nak gah khai.

TAIGÜTHUM 6:2

Chang tumat naw Bawipa hnungtuk püi ne katnak a bi ah a kyak ung, douthak nak abi vai. A Israel chang paw naw anawng tu shüt kä pe ba ci naw, ani ah khawh m’guk pek ci naw, m’hleeihlak ci naw,

TAIGÜTHUM 9:2

Ani naw Aaron am, “Api ah phi kä kheihlik ciah vantang hta la htome hta cu la neta Bawipa am na douthak vai, vantang hta cu katphyawn-douthak nak ah kyak khai, htome hta cu m’khih ne douthak nak ah kyak khai.

TAIGÜTHUM 14:10

A hnüüp cheit ung api ah phi kä kheihlik ne, kum ät lüng ciah htomehta akhla hnih la akhik tumat a law püi vai. M’htut den pie thum, olive situi awn k’caw la oliv situi k’am ah bum thum a ät a law püi vai.

TAIGÜTHUM 23:12

Htang douthak nak ah hnüüp ung, kum ät lüng ciah htome akhla, kä kheihlik en ci awn khawihnah ne, m’khih ne douthak nak nami bi vai.

TAIGÜTHUM 23:18

Acun ah m’htut awn a täng ah chang gui naw kum ät lüng ciah htome hta chih, vantang tumat, htome khla hnih cu ami law püi vai. Cun gui cu a i phi kä kheihlik en khai. Cun gui cu htang douthak la sapyit tui douthak nak awn a täng ah m’khih ne douthak ah douthak vai. Shin ah douthak nak ah ang ui cu Bawipa naw yeikyai nak ci.

KHEI NAK 19:2

Cun cu Israel gui am pek gui vai ah thungyo gui ah kyak ci. Atawk kä om en ci, kä täk en man ah seipat asen cu Moses la Aaron ah nami law püi vai.

KHEI NAK 28:11

A cha tä ah ang tün nak päng ung m’khih ne douthak nak cu Bawipa am pek vai: vantang hta hnih, htome douthak nak ah m’htut den oliv-situi awn k’caw ne douthak vai: vantang tumtumat, kum ät lüng ciah htome m’ca chih, ami van cu kä leimbai en khai.

KHEI NAK 28:19

Bawipa am m’khih ne douthak nak cu ei-douthak ah nami douthak vai: vantang hta hnih, htome tumat, kum ät ci lüng ciah htome m’ca chih, avan cu a pi ah phi kä kheihlik khai.

KHEI NAK 28:31

Shin gui la a hnüüp tä sei m’khih ne douthak nak la htang douthak nak k’be nak ah sapyit tui-douthak nak cu nami bi vai.

KHEI NAK 29:2

Bawipa am m’khih ne douthak nak nami pek vai, a cun ah ang ui cu ani naw yeikyai nak ci. Vantang tumat, htome tumat, kum ät ci lüng ciah htome m’ca chih, cun gui a van cu a pi ah phi kä kheihlik en khai.

2 SHONTÄP NAK 29:32

Ngami naw vantang chihkip, htome phia, htomehta phia goi cu Bawipa am m’khih ne douthak vai ah law püi ci gui;

2 SHONTÄP NAK 35:12

Cun kawn ah ngami naw chang gui am k’pai gui u ne, m’khih ne douthak vai ah seime gui cu kyong khui aläk ah tei gui ci gui, cun ah kyasei ngami naw Moses ah thukhän ung om ciah m’shümthein nak ah mäih ah douthak ci gui.