SUKI GUI 3:5 - Cho Bible Common Language 2016

⁵ Cun ah kyasei Israel chang gui cu Kanaanit gui, Hittit gui, Amorit gui, Perizzit gui, Hivit gui la Jebusit gui ah ng’lung ah khäng ne om ci gui.

SUKI GUI 3:5 Referans Kwoze

PHYAWN NAK 3:8

Egypt gui ah kut ungka ka gun gui khai ah kei ka lawk ci, ngami cu Egypt khaw ah kaa bämang nak khaw, bühmang ne ng’lei nik ciah khaw, ami ng’shon nak, tuhbäi chü Kanaanit gui, Hittit gui, Amorit gui, Perizzit gui, Hivit gui la Jebusit gui ah om nak ah ka hteh püi ba gui khai.

NEHEMIAH 9:8

Ani cu nang ung bekhüt sei na hmuk ci, ani awn nang naw thukhän na bik ci. Nang naw shin ah khaw gui na pek khai ah shaitak na bik ci. Kanaanit khaw, Hittit khaw la Amorit khaw, Perizzit khaw, Jebusit khaw, la Kirkashit khaw, cun gui cu ani ah hta ng’shon gui ah ami om nak vai ah kyak ci. Nang cu na bekhüt ci kya ne na shaitak cu na k’pang ci.

JOSHUA 9:1

Israel gui ah näng nak cu Jordan tuinu akhei täng ghanpughang gui ami van naw hmat ci gui, khawgui gui, m’htung nawi gui la Mediteranean tuinu kem khaw avan ung a siiptäng Lebanon ung khüt ci; cun gui cu Hittit, Amorit, Kanaanit, Perizzit, Hivit la Jebusit gui ah ghangpughang gui ah kyak ci.

THULÄÄN NAK 7:1

Bawipa nami Khanpughi naw tuhbäi nami khäm law vai ah khaw ung, ning hteh püi gui khai. Ani naw cun ah khaw ungka pakhui akda k’täm gui khai. Nangmi nami gawk ah a kyak ung nangmi ah ta ng’ghaw pi ne huham mah pi ciah pakhui chih cu ani naw k’täm khai. Cun gui cu Hittit gui, Kirkashit gui, Amorit gui, Kanaanit gui, Perizzit gui, Hivit gui, la Jebusit gui ah kyak ci.

PHYAWN NAK 3:17

Egypt khaw, akshe ah ami ci cun nak gui ungka, ka hteh püi ba gui khai ciah kei naw ka k’bäi pyi ci nei. Kei naw büh mang ne anglei nik ciah khaw-Kanaanit, Hittite, Amorit, Perizzit, Hivit, la Jebusit chang gui ah khaw ah ka hteh püi gui khai.

ATÜNNAK 13:7

Abram ah sei shäm ci gui la Lotah ah sei shäm ci gui phi a shäng shäng ng’gen ne ng’tuk ci gui. (Cun sang ung Kanaan chang gui la Perissit chang gui phi acun ah khaw ung om yah ci gui.)

JOSHUA 11:3

Ani naw shin gui am phi thu m’khäh gui ci; Amorit gui, Hittit gui, Perizzit gui la khogui khaw ung om ciah Jebusit gui ah kyak ci. Mizpah khaw Hermon m’htung nawi ung om ci gui ah Hivit gui am phi thu m’khäh gui ci.

PHYAWN NAK 34:16

Nami hta gui phi a cun ah akhohei chang hnumi gui awn ng’chungla khai gui, ngami naw kei ung kä bekhüt nak vai ah lam m’shüm gui ne, ami khoshe khanpughi gui cu khawihnah sak gui khai gui.

KHEI NAK 13:29

Khaw ah a htumtäng ah Amalek chang gui om ci gui. Khaw gui täng ah Hittit gui, Jebusit gui la Amorit chang gui om ci gui. Kanaan chang gui cu Mediteranean tuinu pei la Jordan tuinukem yung ah om ci gui.”

SUKI GUI 1:4

BAWIPA naw Kanaanit gui la Perizzit gui ah khan ah näng nak pe gui sei, ngami naw Bezek chang phia phya ngawn ci gui.

SUKI GUI 1:5

A cu ah ngami naw Adonibezek cu hmu u neta tuk ci gui.

1 GHANGPUGHANG GUI 9:20

Solomon naw ghüh ne amang ah chang gui cu Israel gui naw Kaanan khaw ami khäm ba sang ung kä ngawn ne ami pawih nak gui ah Kaanan chang gui ah kyak ci. Cun gui ung Amorit gui, Hittit gui, Perizzit gui, Hivit gui la Jebusit gui ah kyak ci, cun gui ah hta ng’shon gui cu a tu-ä changshäm ah kya ne om ci gui.