SAM 79:10 - Cho Bible Common Language 2016

¹⁰ A i ah kyasei changpakhui gui naw, “Nami Khanpughi a hawi ang?” cine ami na ng’shi gui ang. Na changshäm gui ah si ami huk ah phäh ah changpakhui gui na m’kyuk gui cu, na hmuh sak gui ä.

SAM 79:10 Referans Kwoze

SAM 42:10

Ngami ah shedam nak awn kei cu ka ng’deng ci nei, ngami naw pang ne na ng’shi u ne, “Na Khanpughi hawi ang?” cik ci gui.

THU PHLAAN 18:20

Khankho chang gui cun ah mang gaw adi ah phäh ah yei vä, Khanpughi ah chang gui ang düihpüi gui, purofet gui yeikyai vä! Ani naw nangmi ah khan ah abi phung phung ah hmawk ah Khanpughi naw ani cu m’kat pyi ci nei.

MIKHAH 7:10

Mi ga gui naw hmu neta kä yei khai gui. “Nami Bawipa Khanpughi cu a hawi ang?” cine na ng’shi gui ciah mi ga gui naw, a cun gui cu hmu u neta, lü ng’aa khai gui. Ngami cu lam ung ng’nai ah mäih ah kai na gui ne dep gui u sei mi hmu gui khai nei.

SAM 115:2

A i ah kyasei chang pakhui gui naw, “Nami Khanpughi a hawi ang?” cine ami na ng’shi gui ang?

SAM 94:1

Bawipa, nang cu m’kyuk ciah Khanpughi ah na kyak ci; na m’lungshe nak cu ng’leet law sak ä!

SAM 42:3

Ka gaa gui naw ak phlüt ah, “Na Khanpughi a hawi ang?” ci u sei, amü ak hnüüp kyap ne ng’phli tui kamü ngawi ei nak ci nei.

PHYAWN NAK 7:5

Kei naw ngami hnungtuk püi gui ne, ka kut shäng ne, ami khaw ungka Israel chang gui ka hteh püi ba gui ung, kei cu Bawipa ah ka kyak ciah Egypt chang gui naw na hmat lawk khai gui.

PHYAWN NAK 6:7

Nangmi cu ka mät ah chang ah ka ning pyang gui khai, kei cu nangmi ah Khanpughi ah ka kyak khai. Egypt khaw, khleihtein ungka ka ning m’hlawt gui kawn ah, kei cu Bawipa, nami na Khanpughi ah nami hmat khai nei.

ROMAN 12:19

Teihpüi gui aw, phu kä nami tuk nüng nüng vai, Khanpughi amät naw katnak cu m’htei khai nei. Cacim theing ung, “Kei naw phu ka tuk khai, katnak ah ciah kei naw ka thung khai,” ci ne Bawipa naw pyein ci.

JOEL 2:17

Taigü gui naw Bawipa ah bii bi u sä sonkyang la Taigüim ung luhnak ah ang lak ung, thüikyap ne taigü u sä. “Bawipa na chang gui dük gui ä. Chang khui hei gui naw, ‘Nami Khanpughi a hawi ang?’ ” cine kä na päipih gaih m’gin en gui u sä.

EZEKIEL 36:23

Kei ah dämduh ciah ka ming theing cu changpakhui gui am akcang ah ka m’dang law ung — ngami ah ng’lung ah nangmi naw nami thui ng’aa sak ah ming — ngami naw kei cu Bawipa ah hmat khai gui. Kei, uktu Bawipa naw ka pyen nei. Kei ka theingcim ah mawng changpakhui gui am m’dang vai nangmi cu ka ning mang gui khai nei.

JEREMIAH 51:35

Zion chang gui naw pyen u sä, “Keimi ah khan ah ami bi ah c cawi m’sau nak gui cu Babilonian naw k’chaw na sä!” Jerusalem chang gui naw pyen u sä, “Keimi ah yaica nak gui cu Babilonia naw k’chaw na sä!”

SAM 58:11

Chang gui naw, “Düng ci gui naw m’cümhnah akcang gah ci gui; m’dek khan m’khoi m’chak ciah Khanpughi cu akcang ah om ci nei” cik khai gui.

SAM 9:16

Bawipa naw amät ah düng ciah am khoicha nak awn amät cu dang sak ci nei. Changshe gui cu ami mät ah shetkat nak ung ng’awk ci gui nei.

THULÄÄN NAK 32:43

Chang pakhui gui, nangmi naw Bawipa ah chang gui cu nami m’tam khai, Ngami ngawn gui cu avan ani naw m’kyuk khai. Ani naw aga gui ah khan ah phu tuk ci, A chang gui ah katnak cu geinsei gui ci.”

SAM 42:4

Yan ä ka gui ka shüm ba ung ka m’lung so ci nei, Kei cu chang hli awn atäng ah Khanpughi ah im ah ka hteh yah ung, ami m’hni ah hteh sak gui yeikyai ciah chang hli naw ng’äi m’cu ne, m’lau ne, Khanpughi m’tam ci gui nei.

SAM 42:11

A i ah kyasei kei cu ka thüi aih ang? A i ah kyasei kei cu ka khüikha aih ang? Khanpughi ka ngaih u khai nei, ka Hunbawi la ka Khanpughi cu ka m’taam ba mä khai nei.

ISAIAH 64:1

A i ah kyasei nang naw khomik hmawng ne kä nakyum law ang? Khom’htung gui naw ning hmu u neta kyi ne n’gthüng khai gui nei.

JEREMIAH 51:24

Bawipa naw pyen ci, “Babilonia la achang gui naw Jerusalem ah khan ah ami bi ah akshe gui avan ah phäh ah kei naw ka pek ba gui cu nangmi naw nami hmuk khai.

NG’ÄI KYAH 1:22

“Ami cheishoh nak avan ah phäh ah m’kat gui ä; Kei ah katnak gui na na m’kyuk ah mäih ah m’kyuk gui ä. Kei akyong ah ka ng’hlaw ei aih ci nei, kei ka m’lung kyong ah ka gaw ci nei.”