ROMAN 7:5 - Cho Bible Common Language 2016

⁵ Mikmi cu khomdek pumsa ah ng’yak hlü ah ghing ne mi om yah ung thukhän awn lawk ciah shetkat nak hlü ah m’lung naw mi pumsa kyong ah bi bi ne, mikmi cu na sih sak gui ci.

ROMAN 7:5 Referans Kwoze

EPHESIAN 2:3

Zanä mikmi phi ngami ah mäih ah mi kya man ci. Pumsa ah ng’yak hlü ah mi om ne, pumsa la m’lungngaih ah ni vai düt ah mi bilo man ci. Mikmi cun phi pumsa lam ung, a hei chang gui ah mäih ah Khanpughi ah m’lungshe nak gah khin ciah mi kyak ci.

KALATIAN 5:24

Bawi Khrit Jesuh khäm pyi ciah chang gui phung naw hnicim chang nak la ng’yak hlü nak avan cu, kutlam tung ung sih püi pyi ci gui nei.

KALATIAN 3:10

Thukhän läk vai bäng ngaih u ci gui cu acun naw kyuk gui ci. Cacim theing ung, “Thukhän ca uk ung ami guk phung kä läk ciah chang cu Khanpughi naw m’kyuk ci,” ciah om ci.

ROMAN 6:13

Nami pumsa cu a i yah ung phi shetkat nak ah hmawk ah kä nami mang en vai. Cun nak vaisü ung, sih nak ungka ghing ba ciah chang gui ah kya ne, nami pumsa cu Khanpughi am nami ap vai, Düng nak ah a mawng ung a ning mang gui vai ah pumsa la ghin nak avan cu, Khanpughi ung nami ng’ap vai nei.

ROMAN 6:21

Cun yah ung nami bi lawh gui naw a i ah phi kä ning khüi ng’vong gui ci, cun naw tuk bäi ning lü ng’aa sak gui ne, ak hnu ah sih nak ung ning gawk sak gui ci.

1 JOHAN 3:4

Cheishoh nak cu thukhän m’shet nak ah kyasei, cheishoh ciah chang gui cu Khanpughi ah thukhän m’shet ci gui ah kyak ci.

KOLOSE 3:5

Nangmi naw sihnak ung nami ap vai cu, nami m’lung kyong ung bi bik ciah khomdek khan ng’yak hlü nak gui ah kyak ciah, ng’yawng’pawm nak, om shet nak, htukhtik nak, cheishoh nak, humhlam nak (Humhlam nak cu a gup khawihnah nak ah kyak ci.)

1 KORIN 15:56

Sih nak ah k’sam mei cu katnak ah kyak ci, katnak ng’huuk nak cu thukhän ah kyak ci.

JAMES 4:1

Nangmi ung ng’tuk ah nak la ng’vookshan nak cu a hawi ah kaa gawk lawk ci ang? Cun gui cu nami m’lung kyong ung phu ne ng’kiah ciah lünlawi nak vai, ng’yak nak hlü aih ungka lawk ci nei.

JAMES 1:15

Cun ah shekak ciah ng’yak hlü nak cu tüisho law ne cheishoh nak cun phi däm ng’vai law ne, sih nak ah hta lawk ci.

TITUS 3:3

Ayan ä mikmi mi mät phi mi gu aang ne, thu kä ngai ne, mi cheishoh ne mi om man te ci. Ng’yak nak hlü hlü la hlim tui nak a hnga hnga ah khleihtein ah mi kya man ci. Mi ghin nak cu m’thüi m’khang nak la vamneng nak awn mi ng’pyi sak ci; chang naw phi na gen gui ci, chang phi mi gen man ci.

EPHESIAN 2:11

Ayan ä nang mi cu pumsa awn bi vai kä nami bi tuk ciah kyasei, chang khui hei ah ami ning khü gui cu nami shüm ba vai nei. Pumsa awn bi ah vun ah nak bik ciah Jew chang gui naw, nangmi cu vun ah nak kä nami bi tuk ciah ning khei gui ci gui.

ROMAN 7:23

Cun ung phi kei ah pumsa kyong ah kei ah m’lung ngaih ah ng’yak hlü awn ng’kükneet ng’tu ng’aat ciah thukhän ah mawng tumat om ci. Cun cu kei ah pumsa kyong ah hnüntho law ne, kei cu katnak ah thawng khui ah na chum ci.

ROMAN 6:23

Shetkat nak ah a phu cu sih nak ah kyak ci; Cun ung phi Khanpughi naw a phu kä m’hnüt vai ah am gein nak cu, mi Bawipa Jesuh Khrit ung kawng ät nak awn gah ah angtäi ghin nak ah kyak ci.

ROMAN 6:19

(Nang mi cu ng’thu thuuk kä hmat man uk ci sei, chang ah hmat yäi vai ah thu awn ka guk nei.) A yan ä nang mi cu, cheishoh nak a hlü hlü bi nak vai ah shetkat nak ah khlei-htein ah ng’khäm ne nami ng’ap ci. Acun ah mäih ah tuk bäi nangmi cu, theing cim ciah bi bi nak vai ah, ng’düng nak ah kaa ah khlei-htein ah kya ne ng’khäm ne nami ng’ap vai.

ROMAN 5:20

Cheishoh nak ada law pi vai ah Khanpughi naw thukhän cu am hnüt ah kyak ci. Cun ung phi katnak ada law pi ung Khanpughi ah m’gein nak cun phi däm law pi ci.

ROMAN 4:15

Thukhän naw Khanpughi ah m’lung k’she nak cu m’dang ci; cun ung phi thukhän kä a om ung m’shekat nak phi kä om khai kyak ci.

ROMAN 3:20

Thukhän läk nak awn a u chang phi Khanpughi ah maa ah kä ng’düng hlawt ci; Thukhän cu chang gui ah shetkat nak dang sak ciah kyak ci.

ROMAN 1:26

Cun ah kya sei Khanpughi naw chang gui cu shekat pi ciah thuihmai nak ung ami hteh vai ah nawng gui ci. Hnumi gui cu pami la hnumi ah ng’yaw ng’koh man ah kä kya u ne, ami mät ng’yaw ng’koh ci gui.

JOHAN 3:6

Chang ah sisa ung ng’tüi cicu chang ah kya ba ci, Mumcha theing ung ng’tüi cicu Mumcha Theing ah kya ba ci.

MATTHE 15:19

Chang ngawn nak, chang ah chu hta kat püi nak, changshe awn ih om nak, m’guk-ei hleei pyein nak, la chang m’thüi khang nak gui ah kä nik ciah ngaih-tüh gui phung cu, m’lung kyong ungka lut lawk ciah kyak ci.

2 KORIN 10:3

Keimi cu khodek khan ah kami om ciah ng’khän ci, cun ung phi khodek khan ah hmawk ah ng’tuk kami bik ciah kä kyak ci.