ROMAN 1:13 - Cho Bible Common Language 2016

¹³ Nami shüm ba vai nei, phäinau gui aw, nangmi ah om nak ah ka lawk khai ah akda vei ka pawng ci nei, cun ung phi apipi cüngvawn nak om ci, changpakhui hei gui ah lung ah ka bi nak ung ami ng’hlah law nak a om ah mäih ah nang mi ung phi a om vai ah ka ng’ya hlük ci nei.

ROMAN 1:13 Referans Kwoze

LAMKTU 19:21

Cun gui a kyak kawn ah Paul cu Macedonia la Achaia kho ung kaa naw Jerusalem ah hteit khai ah k’bäi ci. Ani naw, “Cu ah ka hteh kawn ah Rom ah phi ka hteit khai” cine pyein ci.

PHILIPPIAN 4:17

Cun cu kei naw m’cümhnah ng’ya hlü ne ka pyein ah kä kyak ci, nang mi ah camhnüt ung a tang law pi vai ah ka pyein ah kyak ci.

2 TIMOTHI 4:17

Cun ung phi Bawipa cu kei ung om ne k’thagui na pe sei, chang pakhui hei gui am Thu Ni cu ng’shäu ne kam thein gui hning ci, sih vai ah ami na k’bäi nak ungka phi ka phyawng ci nei.

1 THESSALONIAN 4:13

Phäi nau gui aw, sik ciah chang gui ah mawng akcang cu kami ninghmat sak gui hlük ci nei. Cun ung vah nangmi cu ngaih u nak kä om ciah chang gui ah mäih ah thüisei nak kä om khai.

1 THESSALONIAN 2:18

Nangmi ah om nak ah keimi kami law ba hlük ci. Kei mät phi nangmi ah om nak ah law vai ah hnih thum vei kak tha nak ci, cun ung phi Satan naw na ma nak ci.

2 KORIN 1:8

Phäinau gui aw, Asia kho ah ka mi aut ah yaica nak ah mawng cu ka ning m’htein gui hlük ci. Cun ah yaica nak cu däm ne gih aih khätah, ghin nak hngaw kami hnu ng’hlah tak ci nei.

1 KORIN 12:1

Tuhbäi ca guh ne nami na ng’shi ah Mumcha Theing ah m’cümhnah nak ah mawng, ka ning m’thein gui khai. Phäinau gui aw, cun ah a mawng cu akcang ah nami hmat vai ah ka ng’ya hlük ci nei.

1 KORIN 10:1

Phäinau gui aw, Moses ng’vaipi ciah mi pupa gui ung dang ciah a mawng gui cu ka ning shüm ba sak gui hlük ci. Ngami cu khawmei naw kphiawn nak gui ah ka ung, Tuisen Tuinu cu ghing phyawng ne kat law ba ci gui.

KOLOSE 1:6

Thu Ni naw phyutheh nak cu law püi sei, khomdek khan avan ung gawk ci nei. Acun ah mäih ah nangmi ung akhtük ah mäih ah gawk ciah Khanpughi ah m’gein nak cu ng’ya u ne, ani ah mawng akcang cu nami hmat law ah kyak ci.

ROMAN 11:25

Phäi nau gui aw, nami mät naw nami mät kami hmuhmat tei pyi ci, ciah kä nami ngaih en vai ah thuuk ne ng’kau ciah a mawng cu ka ning m’thein gui hlük ci. Cun cu, Jew chang gui cu angtäi sei ang laam khai gui ah kä kyak ci, Khanpughi ah lawk khai ah khui hei chang gui ami ng’küm ung khüt khai ah kyak ci.

JOHAN 15:16

Nangmi naw kei kä nami na ghü ci, nangmi hteit ne akda ah m’theih ne ang tak ah nami vui vai ah kei naw ghü ne ka ning m’düih gui ci. Cun ah kyasei kei ah ming awn nami ng’yoih phung cu Kapa naw ning pe gui khai.

JOHAN 4:36

geit khäm ci cu, ng’cheng gah ne, angtäi ghin nak ah geit cu khäm ba ci, cun ah kyasei, geit ci la khäm ci cu angtäi ah yei kiai khai goi nei.”

2 THESSALONIAN 2:7

Ang thuh ah om ciah shetkat nak cu tuhbäi hnüntho pyi ci nei. Cun ung phi cun gui cu kutshum ci naw kä a chah pha ah chuih, a i phi kä kya law cang khai nei.

2 KORIN 2:14

Cun ung phi Khanpughi kam hlüngtai ci! A i ah kyasei ci ung Khanpughi naw mikmi cu Bawi Khrih ung na kawng ät sak gui ne, Bawi Khrih ah näng nak tung ak chang phaa ah khän ne a na ng’leen püi gui ah hmawk ah kyak ci. Bawi Khrih ah mawng hmuh hmat nak cu, tui ng’ui ah mäih ah kho ng’nü ung ang ui vai ah Khanpughi naw na mang gui ci.

1 KORIN 9:2

Chang hei gui naw kei cu ang düihpüi ah kä ami na dou ung phi, nangmi naw nami na dou ci maw! Nangmi Bawi Khrih ung om ne nami ghin nak naw, kei ang düihpüi ah ka kyak nak cu ng’dang sak ci nei.

LAMKTU 21:19

Paul naw ngami cu yei ne dou gui netah changpakhui hei gui ah ma ah ani awn Khanpughi naw a bi law ah a mawng gui cu m’thein tu gui ci.

LAMKTU 15:12

Khanpughi naw ngami awn changpakhui hei gui ah ng’lung ah cäi aih gui vai la ngaih khit gui vai a bi cu, Barnabas la Paul naw ngak ni khä tah chang a van naw kyiip ah ngai ci gui.

LAMKTU 14:27

Antiok gawnu ah ami gawk law ba ung ngah ni naw khrithabum gui m’cut gui netah, ngami awn Khanpughi naw bi abi nak gui la a pakhui hei gui naw ami yum law tu vai ah lam a hmawn peit gui ah mawng cu m’thein tu ba gui ci goi.

JOHAN 12:24

Kei naw akcang ka pyein cu, geit m’shi cu m’dek ung kä va kya ne, kä thuce ne a om ah a kyak ung, amät ah kawn ah kä da lawpi hlawt khai nei. M’dek ung va kya netah, athu ce ung vah akda ah vuipai m’theih tak ba man ci;

ISAIAH 27:6

Lawk ciah hnüüp gui ung, Jakob ah hta ng’shon, Israel chang gui cu sing ah mäih ah ng’yung pya u ne, khomdek cu küm khai nei.

LAMKTU 1:15

Kho hnüüp api sho law khä tah, yum ciah chang gui phia lah m’ku cu ng’bum lawk ci gui.

LAMKTU 28:14

Cun ah pigaw ah yum ciah chang gui awn ng’hmuh u ne, kho hnüüp chih kami om vai pyein ne na chou gui u sei, om tu u netah, Romah ah k’täih ne kami hteit ci.

ROMAN 1:12

Cun ah ka pyein cu nangmi la kei, a täng ah mi ng’hmuh law ung, kei naw ka yum nak awn, nang mi naw nami yum nak awn, mi ng’hteihtang tu vai hmawk ah kyak ci.

ROMAN 7:1

Phäi nau gui aw, nang mi cu thukhän nami hmat pyi ci kya ne tuk bäi ka pyein vai ah a mawng gui cu nami hmat khai nei. Chang cu a ghin yah ak chuih thukhän ah kyong ung om ci.

1 KORIN 1:10

Phäinau gui aw, Mi Bawipa Jesuh Khrit ah huham awn kei naw nangmi cu ka ning m’cumcäi gui ci nei. Nami thu m’gawng ung nami kawng ät vai, cun ung nami ng’phyeekpai nak kä om khai. M’lung ngaih tumat, bü nak tumat ung nami kawng ät yawp vai.

1 KORIN 14:20

Phäinau gui aw, ak hmawhta gui ah mäih ah kä nami kyak vai nei; ak hmawhta gui ah mäih ah shetkat nak phiawn tah u ne, ang vai pyi ah mäih ah nami ngaih-tüh vai.

1 KORIN 14:26

Cun ah kyasei phäinau gui aw, nangmi cu khawihnah vai ah nami pum law ah a kyak ung, tumat naw ng’äi m’cu sei, tumat naw m’theithang sei, tumat naw Khanpughi ah ng’thu thuuk pyein sei, tumat naw ng’thu a hlü hlü awn ng’thu pyein sei, a hei tumat naw cun ah ng’thu m’hlan ba sei, nami bi vai. Cun ah nami bi nak phung cu Khrithabum ah bä nak ah kya sä bäi.

KALATIAN 3:15

Phäi nau gui aw, ak hnüüp tä nami aut ah m’tumtäng nak tumat ka pyein khai; Chang hnih naw ng’thu khän ne ca ani guk ah a kyak ung, cun ah ca cu a u naw phi kä khui ba hning ci, kä k’be ba hning ci.

KALATIAN 6:18

Phäi nau gui aw, mi Bawipa Jesuh Khrit ah m’gein nak cu nami khan ah om sä. Amen.

PHILIPPIAN 1:22

Cun ung phi kei cu ka ghin lä ung bi ak däm pi ka bi ba khai a kyak ung, sih nak la ghin nak ungka a i ka ghü khai ang!

KOLOSE 1:10

Cun ah kyasei, nangmi cu Bawipa ah ng’yak hlü ah ghing u ne, ani ah yei nak vai ah nami bilo khai nei. Nami ghin nak naw ni kiom nak bäng bäng cu dang sak sei Khanpughi ung nami hmuhmat nak cu, ng’ghotai khai nei.