NEHEMIAH 1:9 - Cho Bible Common Language 2016

⁹ Cun ung phi nanghmi cu kei ah ng’hlat law ba u ne, nangmi ung ka thumkhän cu nami bi ah a kyak ung, nangmi cu khomdek ah ak cawi ah khüt ne, nami püi pyang ung phi, kei nami na khawihnah nak vai ah kei naw ka ghü ah hmun ung, kei naw ka ning law püi ba gui khai nei.’

NEHEMIAH 1:9 Referans Kwoze

JEREMIAH 32:37

Kei naw ka m’lungshe nak la ka nget ngawn nak awn ka püi pyang sak nak gui ah khopäing aran ungka chang gui cu ka k’bum ba gui khai nei. Cun kawn ah kei naw dimdeeih nak awn law püi ba gui ne shin ah khaw ung phyawng ne ka om sak gui khai.

MATTHE 24:31

Cun kawn ah chang ah Htapa naw chünla ciah phyungheng tum sak gui netah, ak khankho chang gui cu hnilaw hnikiaak, a htum asiip ah tüi gui ne, khomdek vang kem ah kaa naw vang kem ah khüt khai ah a ghü ah chang gui cu m’cut sak gui khai nei.

JEREMIAH 12:15

Cun ung phi kei naw ngami ahei ah ka lak gui kawn ah, ngami cu ka chimgein ba gui khai; kei naw a pakhui päng cu ami mät ah khaw, ami khopäng phäh ung ka law püi ba gui khai.

ISAIAH 56:8

Lik ciah Bawipa, a chang Israel gui omktu kho ak ka law püi ba gui ci naw, shai tak ci, a hei chang gui phi ngami ung ng’dawn law tuk khai gui ah law püi gui khai.

SAM 147:2

Khanpughi naw Jerusalem mang gaw cu co ba ci; akho hei ah ami k’täm gui cu law püi ba gui ci.

EZRA 6:12

Ani khawihnah nak vai ah hmun ah Jerusalem mang gaw ghü ciah Khanpughi naw a u ghangpughang phi a u pakhui phi, shin ah thumkhän hnungtuk ne Taigüim m’di vai ah tha nak ci phung cu, gawt sä. Kei, Darius naw shin ah thukbäi ka pek ci nei. Shin cu akbe ah nami läk vai nei” ciah kyak ci.

THULÄÄN NAK 12:5

Nami pakhui gui avan ah khopäng ah akpung ahBawipa naw hmun tumat cu ghü khai, acun ung chang gui naw ama ah law ne khawihnah lawk khai gui.

EZEKIEL 36:24

Kei naw nangmi am m’lung akthai, ngaih akthai ka ning pe gui khai. Kei naw lung ah liu ciah nami m’lung liing cu ning lak pe gui ne, beik ng’yak nak ah m’lung cu ka ning pe gui khai.

JEREMIAH 31:10

Bawipa naw pyen ci, “Pakhui gui, na ngai vä, kei ah ng’thu gui cu ashou nak khaw yung ah shäu vä. Kei ah ng’thu gui cu ka püi sak gui ci, Cun ung phi ka k’bum ba gui khai, Htoshäm naw htome gui a ngäng ah mäih ah ka ngäng gui khai.

ISAIAH 11:12

Püipyang ciah Israel la Judah chang gui, khomdek khan khawkit phli ung ka, a law püi ba gui, atäng ah akbum ba gui amdang nak ah, Bawipa naw m’hnüt nak alan cu m’tho khai nei.

SAM 106:47

O Bawipa kami Khanpughi, na hun gui ä, chang khuihei gui ah ng’lung ungka na k’plawk ba gui ä, cun ah kyasei keimi cu yeikyai ne, nang ming theing kami m’taam khai.

1 GHANGPUGHANG GUI 9:3

Bawipa naw ani cu pyen nak ci, “Kei naw nang ah taigü ka ng’yak ci. Ngawi yä kei na khawihnah nak vai ah nang naw na cawh ah shin ah Taigüim cu kei naw ka k’bäi ci. Kei naw shin cu a khokphlüt ung ngäng ne ka shungvong khai.

JEREMIAH 3:14

“Kä bekhüt ciah chang gui, law ba vä, kei cu nami na ka nak ci nei. Kei naw gawnun päng ungka, tumat ci, pahta päng ung ka hnih ci ning la gui neta kei naw Zion m’htung ah ka ning hteit püi ba gui khai nei.

1 SHONTÄP NAK 16:35

Ani cu pyen ah vä, “Na hun gui ä, Khanpughi kami Hunbawi; a täng ah nak bum gui ä, chang pakhui gui ung keimi cu na gung gui ä, Cun ung keimi naw ning yei na u ne nang ming theing kami m’tam khai nei.”

THULÄÄN NAK 12:21

Nami khawihnah nak ah hmun tumat cu a shou aih ah a kyak ung nami ng’yak nak hlü ah akhin ung Bawipa ah ning pek gui ah sei phi, htome phi, ngawn u neta kei naw ka ning m’thein gui ah mäih ah meh cu im ah nami ei hning ci.

1 GHANGPUGHANG GUI 8:48

Cun ah khaw ah ngami cu akcang ah m’lung hnip ne, ami ng’yuu ba ung, ngami cu kami pupa ghü ah shin ah mang gaw, nang ah phäh ah kei naw ka cawh ah shin ah Taigüim täng ah mang ne ami taigü ung,

SAM 107:3

A kho hei ah ka, a khei, a kyang, a htum a siip ah ka ning law püi ba gui ci.

ISAIAH 27:12

Cun ah hnüüp ung, chang tumat naw htang ang shii ng’tak am chaa ah mäih ah, Euphratis tuinu ung ka naw Egypt khogii ung khüt khai ah Bawipa naw a chang gui cu tumat täi ah m’cut gui khai.

JEREMIAH 6:22

Bawipa naw pyen ci, “Asiip täng khopäng ung ka chang gui lawk ci gui; asho nak ah om ciah m’gäi ciah pakhui naw ng’tuk vai ah pawng ci nei.

EZEKIEL 14:6

“Tuhbäi kei, Uktu Bawipa naw ka pyen cu Israel gui am m’thein gui vä: ng’hlat law ba vä, shemshai ciah name agup gui cu nawng shüt vä.

TAIGÜTHUM 26:3

“Nangmi cu kei ah thukhän ah mäih om u ne, ka thumkhän nami läk ah a kyak ung,

THULÄÄN NAK 30:1

“Kei naw tuhbäi plah tam la hriham ungka tumat nami ghü vai ah ka ning pe gui ci. Bawipa nami Khanpughi naw a ning k’püi nak gui changpakhui hei gui ah ng’lung ah nami om tu nak ah shin gui avan nami khan ah a kyak law ung, nami ghü vai kei naw ka ning pek gui cu nami shüm ba vai nei.

ZEKHARIAH 8:7

Ka chang gui cu hteh püi ne ami om sak nak gui ah khaw ungka, ka gung gui khai nei.