MIKHAH 4:10 - Cho Bible Common Language 2016

¹⁰ Ng’hlo ei ciah Jerusalem chang gui, hta lawk khawi ah hnumi ah mäih ah nami kyak ci. Tuhbäi nangmi cu mang gaw nawng shüt ne, khaw ng’piäu ung nami om khai. Nangmi cu Babilon ah nami hteit khai, cun ung phi a cu ah Bawipa naw nami ga ah kut ungka ning hun gui khai.

MIKHAH 4:10 Referans Kwoze

ISAIAH 48:20

Babilon ung ka hteit vä, phyawng vä! “Bawipa naw a changshäm Israel cu hun pyi ci nei” ci ne, yei ne m’lau vä, kho ng’nü ung hmat sak vä!”

HOSEA 13:13

Israel gui cu ghin nak vai chaw nak ci gui. Cun ung phi cun ami lak vai ah ang aih ci gui — Hta nak vai ah akhin ah kyasei phi puk ungka aluh law vai ah mak ciah a hmaw awn täng ci gui.

HOSEA 2:14

Cun ah kyasei kei naw bung puk ah ka hteh püi ba mä khai. A cu ah kei naw m’hni nak ah ng’thu awn ka khü ba khai.

ISAIAH 45:13

Apäng avang ng’düng ne, ka ng’bü nak gui akümbe nak vai ah, kei kamät naw Sairus cu m’thütho ne ka hnünthawh sak ci nei. Ani ah hteh nak vai ah lam päng cu kei naw ka düng sak khai nei. Ani naw ka mang gaw, Jerusalem cu co ba khai nei, ami pha gui ah ka chang gui cu m’hlaut gui khai nei. Shin abi vai ah ani cu, a u naw phi kä pek ci nei.” M’gäi ciah Bawipa naw ng’thu a pyen nei.

ISAIAH 43:14

Israel gui ah theingcim ciah Khanpughi, ning hun gui ciah Bawipa naw pyen ci, “Ning hun gui khai ah, Babilon hnung’tuk püi ciah gakap cu kei naw ka tüi lawk khai; mang gaw m’kawt gui cu kei naw ka phyek khai, chang gui ah m’lau cu kyah ah ng’lat khai nei.

2 GHANGPUGHANG GUI 20:18

Na htanua ng’shon gui cu hteh püi gui u ne, Babilonia ghangpughang ah mang im ung hnumi m’htei khai ah tha gui khai gui nei.

THU PHLAAN 12:14

Cun ah hnumi cu khaw k’häu ung a yawn nak thei vai ah vanbuk hmu ah ng’phia hnih cu gah ci. Ani cu acu ah kum thum la avang ung shawk kphyunu ah gaa phiawn nak khai ah m’hteihtang khai gui ah kiak ci.

HOSEA 1:10

Israel chang gui cu tuinu kem ah laigin ah mäih ah kyak khai gui, kä khei tai vai, kä nüt tai vai ah kyak khai gui, Tuhbäi Khanpughi naw pyen ah gui ci, “Nangmi cu kei ah kä ning chang gui nei,” Cun ung phi ani naw shi cha ah a pyen nak vai ah hnüüp cu gawk lawk khai nei “Nangmi cu ghing ciah Khanpughi ah hta nau gui nei!”

JEREMIAH 15:21

M’ghäm ce ciah chang gui la shekhak ciah huham ungka kei naw ka ning gung khai. Kie, Bawipa naw ka pyen ci.

SAM 106:10

Ani naw ami gen nak gui ungka hun gui ne, ami ga gui ah kut ungka gung gui ci.

2 SHONTÄP NAK 36:20

Ani naw k’pawih ba ci gui ami van cu Babilonia ah hteh püi gui ci, ngami cu Persian uknak khaw a thawh law ung khüt sei ani ah htangshon ah changshäm ah kyak ci gui.

2 SHONTÄP NAK 33:11

Cun ah kyasei Bawipa naw Assirian gabawi gui am Judah cu a tuk sak gui ah kyak ci. Ngami naw Manasseh cu pha u ne, m’si hling awn kaih u ne, m’si gui awn khit u ne, Babilon ah hteh püi ci gui.

2 GHANGPUGHANG GUI 25:4

mang gaw k’paang gui cu gäi ci gui. Babilonian gakap gui naw mang gaw cu khaai pang u sei phi gakap gui ami van mü ah dawng yawp ci gui. Ngami cu bawimang ah duum täng ah dawng u ne, k’paang goi ah angchum nak ah m’kawt ung hteit u ne, Jordan khongnawi täng ah dawng ci gui.

JEREMIAH 29:20

Nangmi nami van, Babilonia ah omktu ah ka ning tüih gui naw, kei, Bawipa naw ka pyen cu nami ngaih vai nei!

JEREMIAH 48:41

gawn gui la mang pang gui cu tu ne khäm khai gui. Cun ah hnüüp ung Moab gakap gui cu anau poi m’neh ciah hnumi ah mäih ah kyi kyawk khai gui nei.

JEREMIAH 52:27

Hamath khopäng ah hteh püi gui ci. Acu ah ghangpughang naw m’ghuih gui neta sih nak pe gui ci. Cun ah kyasei Judah chang gui ami khaw ung ka naw omktu khaw ah ami hteh püi gu ah kyak ci.

MIKHAH 5:3

A nau poi m’neh ciah hnumi kä a hta pha ah chuih, Bawipa naw a chang gui cu ga ah kut ung nawng gui khai. Cun kawn ah omktu ah kyak ci gui ah khochang gui cu ami mät ah pakhui ah ng’bum ba khai gui.

2 SHONTÄP NAK 36:23

“Shin cu Persia uktubawi Sairus ah Thumkhän ah kyak ci. Bawipa Khankho ah Khanpughi naw khomdek khan avan uktu ah na pyang ci, ani naw, ani ah hmawk ah Jerusalem Judah khaw ung Taigüim cawh vai ah na täk ci nei. Tuhbäi, Khanpughi ah chang gui avan a cu ah hteit vä, Bawipa nami Khanpughi naw ning om püi gui khai nei.”

JEREMIAH 4:31

A nau poi m’neh ciah hnumi ah kyah k’aw, hta htük ciah hnumi ah m’lau ah k’aw ah mäih ah k’aw cu kei naw ka ng’yak ci. Cun cu bawng ne ng’khlet ciah Jerusalem ah k’aw ah kyak ci, ani naw a kut shäng neta a pyen cu, “Kei ka ng’ziin ci nei! Ngami naw law ne na ngawn khai gui nei!”

JEREMIAH 13:4

“Euphratis tuinu ah hteit neta na suisak gui cu lungkhui ung thup ä” cik ci.

MIKHAH 5:2

Bawipa naw, “Bethlehem Ephrathah, nang cu Judah khaw ung ak yawpi tumat ah na kyak ci, Cun ung phi nang ungka kei naw Israel Uktu cu ka law püi khai, ani ah kyong cu cau ge tün ne dang ge ciah kyak ci” cik ci.