MIKHAH 3:12 - Cho Bible Common Language 2016

¹² Cun ah nangmi ah om ah, Zion cu lai ah mäih ah thawn khai gui, Jerusalem ci di nak ah m’dek ng’plum ah kyak khai. Taigüim m’htung cu bung ah ng’lat khai.

MIKHAH 3:12 Referans Kwoze

JEREMIAH 26:18

Hezekiah cu Judah ghangpughang ah a kyak yah ung, moresheth ah ka prophet mikah naw chang gui avan a pyen nak gui cu, m’gäi ciah Bawipa naw pyen ci, ‘Zion cu lai ah mäih ah thawn khai gui, Jerusalem cu akshe gui oum ah kyak khai, Taigüim m’htung cu bung ah kyak khai.’

SAM 79:1

O Khanpughi, khuihei gui naw na khaw kaan lawk ci gui nei. Ngami naw na Pumim theing ng’gogan sak u ne, Jerusalem phi m’shet ci gui nei.

MATTHE 24:2

Bawipa Jesuh naw, “Shin ah cawh kyan gui cu nangmi naw nami hmuk ci nei, kei naw akcang ka pyein cu shin ah pum im cu cawh nak ah lung tumat phi a mät ah om nak ung kä ng’yän ba khai ah ng’gäi ne maih lawk khai nei,” cine pyein ci.

MIKHAH 1:6

Cun ah kyasei Bawipa naw, “Samaria cu ng’leido ung m’dek ng’plum ah mäih ah shek khai, Sapyit geit nak ah khomdek ah mäih ah ka kyak sak khai. Mang gaw im ng’ki gui cu khaw nawi ah ng’dawn sak gui ne, mang gaw lungtung cu ka auh sak khai nei.

SAM 107:34

A cun ung om ciah chang gui ah shetkat ah phäh ah ani naw ang lei ni cu m’sii m’dek ah kyak sak ci.

JEREMIAH 9:11

Bawipa naw pyen ci, “kei naw Jerusalem cu, im ng’phrek ciah ng’awt ng’bum, sa ui gui ah om nak ah hmun ah ka pyang khai; Judah mang gaw gui cu chang ah kä om nak bung ah kyak khai gui.”

JEREMIAH 17:3

la khomhtung kho häu ung ng’ling ci gui. Nami ga gui naw nami khawh gui la nami m’küm khawh gui avan ami lak vai ah ka bik khai. A i ah kyasei ci ung cun cu kho avan ung katnak nami bi avan ah phäh ah kyak ci.

JEREMIAH 22:6

“Kei ah phäh ah Judah mang im cu Kilead khaw la Lebanon m’htung ah mäih ah kyom ci nei; cun ung phi cun cu a u naw kä aom nak ah kyak khai ah kakei sak khai nei.

JEREMIAH 35:17

Cun ah kyasei kei, m’gäi ciah Bawipa, Israel khanpughi naw nangmi Judah la Jerusalem ah khan ah kei naw ka shaitak ah dishum nak avan cu ka law püi khai. Kei naw cun cu ka bik khai, a i ah kyasei ci ung kei naw ka ning thu püi gui kä ngai u ne, ka ning khügui ung kä nami äi ci.”

JEREMIAH 44:2

M’güi ciah Bawipa, Israel khanpughi naw pyen ci, “Jerusalem la Judah khaw ahei mang gaw gui avan ah khan ah kei naw dishum nak ka law püi cu nangmi nami mät naw nami hmuk ci nei. Tuh güt cun gui cu di ci, a cun ung a u phi kä om ci,

JEREMIAH 52:13

Ani naw Taigüim, mang im la Jerusalem ung küikyang ciah chang gui avan ah im gui cu m’khih yawp ci;

NG’ÄI KYAH 5:18

A i ah kyasei ci ung Zion m’htung cu amät ng’yän ne, khaw ng’gau ah kyak ci. Cun ah dishum nak ung pya ui gui cu ng’hle ne ng’shui ci gui.

ISAIAH 32:14

Mang im phi kei ne, mangkho leigaw phi apum ah shiu khai nei lm gui la k’pang gui ami ngäng gui cu ang’täi sei di maih khai nei Hwn cu k’pya ng’se gui naw lum na u ne, htome gui ah khu ei nak ah kyak khai nei.

JEREMIAH 9:10

Kei naw ka pyen ci, “Khomhtung gui ah phäh ah kei ka thui kyap khai, khulim gui ah phäh ah ka kyap m’lau khai, a i ah kyasei ci ung ngami cu chawng u sei, cun gui cu kan ne a u kä hteit ba khai. Khiksa gui ah ng’ging gui cu a u naw kä ng’yak ba ci; kha gui la khisa gui phi dawng yawp ci gui.”

JEREMIAH 22:5

Cun ung phi nangmi naw ka thumkhän cu kä nami läk ah a kyak ung, kei ka ng’taam ci nei, shin ah mang im cu ng’kia ne di khai nei. Kei Bawipa naw ka pyen nei.