MATTHE 6:9 - Cho Bible Common Language 2016

⁹ Cun ah kyasei nami taigü ung; ‘Khankho ah om ciah kami Pa; Na ming theing thang sä;

MATTHE 6:9 Referans Kwoze

THU PHLAAN 4:11

“Kami Bawipa, Khanpughi, Nang naw ang tüi avan cu na tüisho ciah kyasei, Nang ah ng’yak hlü ah ang tüi cu ghing om ciah kya ci. Cun ah kyasei bühmang nak, küikyang nak, hlüngtai nak gui cu Nang awn khinkhaa ci nei” ci ne pyein ci gui.

ROMAN 8:15

Khanpughi ah ning peit gui ah Mumcha naw nang mi cu Khlei-htein ah kä ning k’hmoh gui ci, kyih ah phi kä ning kyihkyawk sak gui ci. Mumcha naw mikmi cu Khanpughi ah hta gui ah na pyang gui sei, Mumcha ah na peit gui ah hlüngtai nak awn Khanpughi cu, “Ka Pa, Ka Pa,” cine khü tu vai ah mi khin tuk ci.

EZEKIEL 36:23

Kei ah dämduh ciah ka ming theing cu changpakhui gui am akcang ah ka m’dang law ung — ngami ah ng’lung ah nangmi naw nami thui ng’aa sak ah ming — ngami naw kei cu Bawipa ah hmat khai gui. Kei, uktu Bawipa naw ka pyen nei. Kei ka theingcim ah mawng changpakhui gui am m’dang vai nangmi cu ka ning mang gui khai nei.

MALAKHI 1:11

Vang khaw cawi ungka naw vang khaw cawi ung khüt ciah chang gui naw na m’taam ci gui. A hmun päng ung ang ui gui m’khih u ne, dou thei vai ah khawihnah ci gui. Ami van naw na m’taam ci gui!

SAM 111:9

Ani naw a chang gui cu phyawn sak gui ne, ng’täi ciah thumkhän cu be püi gui ci. Theingcim ne m’gäi cicu ani nei!

ISAIAH 64:8

Cun ung phi Bawipa, nang cu kami ning pa nei. Keimi cu k’am m’dek ah mäih ah kami kyak ci, nang cu k’am sheh ciah mäih ah na kyak ci. Nang naw na na tüisho gui ci,

ISAIAH 57:15

“Kei cu hlüngtai ne, theingcim ciah khanpughi nei, angtäi ah ka ghing ci nei, kei cu hlüngtai ne theingcim ciah hmun ung ka om ci, cn ung phi amlung neim ne ng’zuba thei ciah chang gui awn phi atäng ah ka om ci nei. Cun ah kyasei ngami ah m’lung üp nak la ngaih u nak cu kei naw ka k’thai ba sak ci nei.

KALATIAN 4:6

Nangmi cu a hta gui ah nami dang vai ah, Khanpughi naw, “Pa, Ka Pa,” cine ng’khü ciah A Htapa ah Mumcha cu mi m’lung kyong ah yuk m’kyum lawk ci.

ISAIAH 6:3

Ngami tumat la tumat ng’khü tu u ne: “Atheing, atheing, atheing! M’gäi ciah Bawipa cu atheing? Ani ah bäingang hak naw khomdek be sak ci nei.”

THU PHLAAN 5:12

m’lau ne ng’äi ami m’cu cu; “Ami ngawn ah htomehta cu, Hlüngtai nak, bühmang nak, cüivai nak, khüighaat nak, Chang m’sui nak, bäkhäk nak, la m’kümtou nak, gui cu gah khai ah khin khaa ci nei” ciah kyak ci.

SAM 115:3

Kami Khanpughi cu khankho ah om ci; Ani naw ang yak hlü phung bik ci.

NEHEMIAH 9:5

Shin ah Levit gui naw khawihnah vai ah ng’khü ci gui: Jeshua, Kadmiela, Bani, Hashabniah, Sherebiah, Hodiah, Shebaniah, la Pethahiah. Ngami naw: Ng’düi law ne, Bawipa nami Khanpughi cu m’hlümtai vä; Khonglän ung ani cu m’hlümtai vä! Hnicim chang naw m’hlümtai khin vai ah kä m’hlümtai hlawt ung phi, a bämang nak ah ming cu chang nü naw m’hlümtai sä.”

MATTHE 7:11

Nangmi chang kaa gui hngaw naw nami hta gui-am ak ni peit vai nami hmat ung, khankho ah om ciah nami Pa naw, ama ah ng’yoi lawk ciah chang gui-am ak ni pi gui cu pek khai ah kä kya ne ang?

ISAIAH 63:16

Nang cu kami pa ah na kyak ci. Kami pupa gui Abraham la Jakob naw phi chang ah kä na tha gui ci gui, cun ung phi nang, Bawipa cu kami pa, angtäi sei na gung gui ciah na kyak ci.

SAM 72:18

Israel Khanpughi, Bawipa cu m’taam vä! Ani bäng naw cäicat vai gui cu bi hning ci nei.

MATTHE 26:29

Kei naw akcang ka pyein cu tuhbäi ung tün ne, kapa ah uknak kho ah nangmi awn a täng ah sapyit tui ak thai kä awk pha ah chuih, kei naw cun kawn ah sapyit tui kä ka aw tuba khai nei,” cine pyein ci.

MATTHE 23:9

Khomdek khan ah a u phi ‘Pa’ ah kä nami khü vai, nangmi ung khankho ah nami pa tumat bäng om ci.

MATTHE 5:16

Acun ah mäih ah chang gui naw akni ah nami om cu ning teng gui u ne, khankho ah om ciah nami Pa cu ami m’hlüngtai vai ah, chang gui ah ma ah nami dei nak cu va deikhang sak vä.

2 SHONTÄP NAK 20:6

m’lau ne taigü ci, “O Bawipa kami pupa gui ah Khanpughi, nang naw khankho ah ngo ne, khomdek khan ung changpakhui avan cu na uk ci. Nang cu huham mah ne, na m’gäi ci kyasei a u naw kä ning hnungtuk püi hlawt ci.

LUKA 15:18

A tuhbäi ng’düi law ne, kapa ah hteit ba netah, Kapa aw, Khanpughi la nang Kapa ah khan ah katnak ka bi pyi ci nei,

ZEKHARIAH 14:9

Cun kawn ah Bawipa cu khomdek khan avan ung ghangpughang ah kya lawk khai; chang päng naw Khanpughi ah kyak ci, cine khawihnah khai gui, acun ah ming cu hmat khai gui.

1 GHANGPUGHANG GUI 8:43

ani ah taigü cu ngaih pe ä. Khankho ah a hawn ung na om ung phi ng’yak peä, na bi pek vai ah a ning thäh phi bi peä, cun ung khaw ah khan ung om ciah a ning thäh phi bi peä, cun ung khaw ah khan ung om ciah chang van naw, na chang Israel gui ah mäih ah, ning hmat khai gui, na ng’thu phi ngai khai gui nei. Cun kawn ah nang ning khawihnah nak vai ah hmun ah kyak khai ah shin ah Taigüim kei naw ka cawh cun phi hmat khai gui nei.

HABAKKUK 2:14

Cun ung phi tuinu ung tui abe ah mäih ah khomdek cu Bawipa ah bämang nak ah hmuhmat nak awn be khai.

EZEKIEL 38:23

Cun ah hnüüp ung kei naw changpakhui gui avan nam ka dämduh nak la ka theincim nak cu ka m’dang khai. Cun ung ngami naw kei cu Bawipa ah na hmat khai gui.

1 SHONTÄP NAK 17:24

Nang ah ming cu dämduh khai, chang gui naw angtäi sei pyen khai gui, “M’gäi ciah Bawipa cu Israel ah khan ah Khanpughi nei. Nang naw kei ah mangshon cu angtäi sei na khan sak khai nei.

2 SAMUEL 7:26

Nang ming cu dämduh khai, chang gui naw ngawi yä pyen khai gui, ‘Hlüngtai ciah Bawipa cu Israel avan ah Khanpughi nei! Nang naw kei ah hta ng’shon cu ak phlüt ah na ngäng khai.

1 PETER 1:17

Chang ah yodäm kä teng ah, chang ah bilawh phäh phäh ah khan ah m’khoichaa nak bik ciah, Khanpughi ah nami taigü ung, Kapa ci ne khü ne nami taigü ci; cun ah kyasei khomdek khan ung nami ghin om yah ak chuih Khanpughi cu nami kyih aa vai nei.

1 TIMOTHI 6:16

Khanpughi bäng naw sih nak phiawn nak ci; Ani cu chang naw kä ak et hlawt vai ah pyü ne ng’shü ci ung om ci. Ani cu a u naw kä hmu man ci; Ani cu a u naw kä hmu hlawt ci: Bawipa ung m’tamkhah nak la angtäi sei hlüngtai nak cu om sä! Amen.

LUKA 15:21

A hta naw, “Kapa aw, kei cu Khanpughi la nang Kapa ah khan ah kat nak ka bi pyi ci nei. Cun ah kyasei, nang kapa ah hta ah kä ka khin ba ci nei” cik ci.

LUKA 2:14

“A hlüngtai säih Khanpughi ah bämang nak cu, khankho ah be sä, khomdek khan ung phi ding gei nak om sä, am hni ah chang gui ah khan ah m’gein nak om sä” cine Khanpughi m’hlüngtai ne ng’äi m’cu ci gui.

ISAIAH 66:1

Bawipa naw pyen ci, “Khan kho cu ka mang kiang ah kya ne khomdek cu ka kho ne’leh nak ah kyak ci. Kei ah phäh ah a i ah mäih im nami co khai ang, a i ah mäih hmun ung kei ka om khai ang?

MATTHE 6:14

‘Nami khan ah katnak bi lawk ci phung nami m’gein ung khankho ah om ciah nami Pa naw nami katnak cu ning m’gein gui khai.

MATTHE 6:6

Cun ah kyasei nangmi cu na mi taigü ung, kyong ah lut ba ne shoh khai netah, mik awn kä hmuh ah nami pa ah nami taigü vai. Kä dang khai ah bi cu hmuh thei ciah nami pa naw m’cümhnah nak ning pe gui khai.

MATTHE 5:48

Khankho ah nami Pa akümbe ah mäih ah nangmi phi nami kümbe vai nei.

TAIGÜTHUM 10:3

Cun kawn ah Moses naw Aaron am, “Shin cu Bawipa naw a yuk ng’thu law yah ung a pyen ah mawng ah kyak ci, ‘Kei ah khuut bik ci phung naw kei ah theingcim nak cu a kyih aa vai; kei naw ka bämang nak cu ka chang gui ung ka m’than khai’ cik ci.” Cun ung phi Aaron cu kä chawkchek ne om ci.

KALATIAN 1:1

Chang ungka lawk ci la chang ah m’düih ah kä kyak ciah, Jeyuh Khrit la ani sih nak ungka thawh ba sak ciah Apa Khanpughi ah m’düih, ang düihpüi kei Paul La;

JOHAN 20:17

Bawipa Jesuh naw, “Kei cu kä na k’pang-en ä, Kapa ah kä ka kai ba phak ci, cun ung phi ka nau gui ah hteit ne, Kei ah Kapa ah kyak ciah nami Pa, Kei ah Khanpughi ah kyak ciah nami Khanpughi ah om nak ah ka kai ba vai ah mawng cu m’thein gui ä” cik ci.

MATTHE 26:42

Bawipa Jesuh cu ang hnih vei nak ah hteit ba mä netah, “Oh Kapa shin ah yaica nak ah khap cu kei naw kä ka awk ung käng phlän khai ah a kyak ung, nang ah ng’yak hlü ah kyak sä,” cine taigü ci.

ISAIAH 37:20

Tuhbäi, Bawipa kami khanpughi, Assirian gui ah kut ung na gung gui ä, cun ung khomdek khan ah chang pakhui avan naw nang bäng cu khanpughi ah na kyak ciah hmat khai gui nei.”

ROMAN 1:7

Cun ah kyasei Khanpughi naw ning m’hni gui ne a ning khü gui pyi ah Rom Khrithabum am shin ah ca cu ka ning guk law gui nei. Mi Pa Khanpughi la Bawipa Jesuh Khrit naw m’geinsei nak la dimdeeih nak cu ning pe gui sä.

MATTHE 10:29

Biithta hnih cu ngui phe awn khleih hning vai ah kyak ci, cun ung phi biithta tumat phi Pa Khanpughi ah kä hmat ah kä chük maih düt khai.