MATTHE 5:16 - Cho Bible Common Language 2016

¹⁶ Acun ah mäih ah chang gui naw akni ah nami om cu ning teng gui u ne, khankho ah om ciah nami Pa cu ami m’hlüngtai vai ah, chang gui ah ma ah nami dei nak cu va deikhang sak vä.

MATTHE 5:16 Referans Kwoze

1 PETER 2:12

Bawipa kä yum ci gui naw nangmi cu ak she nami bik ciah ami ning k’bün gui ung phi, kä yum ciah chang gui ah lung ah akni ah nami om vai. Bawipa a kyum law ba hnüüp ung nangmi ah nikiom nak cu hmu u ne, Khanpughi ami m’hlüngtai vai ah cun ah nami bi vai nei.

TITUS 2:7

Na mät cun phi a mawng ama avan ung chang ah ning thei nak vai ah na hnün om vai nei. Htinling ne ak küikyang ah nam theingthang vai nei.

JOHAN 15:8

Akda ah nami m’theih tak nak awn Kapa ah bämang nak cu nami dang sak ci; nangmi cun phi kei ah ng’düihpüi ah nami kya lawk ci.

EPHESIAN 5:8

Nangmi nami mät cun phi hmüp khui ung nami om te ci, cun ung phi Bawipa ah chang ah nami kyak awn ah, nangmi cu akdei ung nami om ci. Cun ah kyasei akdei ung om ciah chang ah mäih ah nami om vai.

1 PETER 3:16

Cunung phi ng’awi ng’gi nak la chang m’sui nak awn nami bi vai nei. Nami m’lung cu theing sak vä, cun ung bawi Khrit ah chang ah kia ne, akni nami bi lawh, ning päipih gui ciah chang gui cu, thui ng’aa khai gui nei.

1 PETER 4:14

Bawi Khrit ah chang ah nami kyak ah hmawk ah päipih nak nami gah ung yeikyai nak om ci, a i ah kyasei ci ung, acun ah khin ung, bämang ciah Mumcha, Khanpughi ah Mumcha cu, nangmi ah khan ah ang leen ah hmawk ah kyak ci.

1 PETER 2:9

Cun ung phi nangmi cu Khanpughi naw a ghü ah pahta, Ghangpughang ah taigü, theingcim ciah pakhui, Khanpughi ah chang, la Khanpughi naw cäicat vai ah a bilawh ah mawng ng’shäu khai ah a ghü ah nami kyak ci. Khanpughi naw hmüp khui ung kaa, cäicat vai ah ak dei ung a ning khü gui ah kyak ci.

ISAIAH 58:8

“Cun ung kei ah bämang nak cu ngawi thaih hni pyü ah mäih ah na khan ah ng’shü sei, na nat nak gui a van cu ang ghit ah khan khai nei. Kei naw ungtäi sei ning om püi gui ne ka ning hungui ci; kei ah ka naw apäng avan ung ning shungvong gui khai.

TITUS 3:14

Mi chang gui naw sui ei vai ng’yak hlü gah nak vai ah, ak ni bi nak ung akhin cu mang thei vai ah, ng’thei sak gui ä. Ngami cu akholä düt ah kä ghing om men u sä.

1 TIMOTHI 6:18

Ak ni ami bilawh vai, ni kyom nak ung ami plümshau vai, ami khaailaang vai, la chang am ami peiktaak thei vai ah nam cäi gui vai nei.

2 KORIN 9:13

Shin ah bi nami bi nak awn chang akda naw Bawi Khrih ah mawng Thu Ni cu khäng sei ami yum tu ah phäh la, nami khawhchaam gui cu, ngami la chang hei gui am ng’khailang ne nami peitaak gui ah hmawk ah Khanpughi cu mi m’hlüngtai khai nei.

EPHESIAN 2:10

Bawi Khrit awn kawng ät ne, Khanpughi naw am hnüt bäi ah om k’ni nak ah mäih ah mi om ih vai ah, Khanpughi naw a na tüi sho gui ah kyak ci.

HEBRU 10:24

Mikmi cu tumat la tumat mi ng’tengkhen tu u neh, mi ng’hteihtang tu u neh, mi ng’yumhni tu u ne, ni kyom ne mi om khai nei.

NG'THU K'THUUK~ 4:18

Düng ciah chang ah hteh nak ah lam cu hni pyü ah mäih ah kyak ci. Dei law pi pi ne hni a luh law güt ung khang ci.

1 PETER 4:11

Thu pyein ci phung naw Khanpughi ah ng’thu ng’shäu ne pyein ah mäih ah a pyein vai; khuut bik ci phung naw Khanpughi ah peit ah k’thagui awn abi vai. Cun ung vah a mawng a ma avan ung, Bawi Jesuh Khrit ung Khanpughi cu m’kümto hlawt vai. Cun ah Bawipa ung bämang nak la hlüngtai nak cu ngawiyä khäng ne om sä. Amen.

1 THESSALONIAN 2:12

Thamah nak kami ning pe gui ci, m’lung üp ngaih gep nak kami ning pe gui ci, amät ah uknak kho kyong ung lut tu ne, abämang nak nami gah tu vai ah, ning khü gui ciah Khanpughi ah ang yak hlü ah nami ghin vai ah kami ning thawhlet sak gui ci.

1 PETER 3:1

Acun ah mäih ah, hnumi gui, nami cei ah pyein ah nami om vai nei. Cun ung vah nami cei naw Khanpughi kä ah yum tu te ah a kiak ung phi, nami om ih hnünthawh naw thu m’kha ät kä nami pyein ung phi, yum law tu sak khai nei.

LAMKTU 9:36

Joppa pigaw ung, Khanpughi yum ci, Tabitha ming nak ciah hnumi tumat om ci. (Karik thu awn ah ming cu Dorcas ah kya ne kigang ciah kyak ci.) Ani cu angtäi sei ak ni bi ne chang phi geinsei ci.

1 TIMOTHI 5:25

Acun ah mäih ah amshah ah nikiom nak gui cu dang ge ci, kä dang ge ciah nikiom nak gui cun phi a i naw kä shungshet hlawt ci.

MATTHE 5:45

Cun ung vah nangmi cu Khanpughi ah hta ah nami kyak khai. Khanpughi naw chang k’ni, chang k’she van ah khan ah kho yuk so sak ci, akni akshe bik ci van ah khan ah kho phi yuk aa sak ci.

TITUS 2:14

Ani naw amät cu mikmi ah hmawk ah pek ci, cun cu shetkat nak phung ung anak phiawn nak gui vai la amät khäm ciah ak chang theing ah mi kya ne, ak ni kyom ah mi hnün thawh nak thei vai ah hmawk ah kyak ci.

1 TIMOTHI 5:10

a om ani ah mawng ngaih gep nak om khai, a hta gui ak ni ah m’htei ci, khin chang m’htei ci, yum ciah chang gui ni kyom püi gui ci, yaica ciah chang gui m’htei gui ci, nik ciah bi phung tha na ne bik ciah kyak khai.

1 TIMOTHI 2:10

Ngahmi cu yum ciah chang gui ah mäih ah ni kyom ciah om ih awn ami bilawh vai nei.

KALATIAN 1:24

Cun ah kyasei ngami naw kei ah mawng ung Khanpughi cu m’hlüngtai ci gui.

ISAIAH 61:3

Thüikyah nak ah hnün ung yei kyak nak la hüithäw nak, A yä ci gui am m’hlüngtai nak ah ngäi cu, Zion ung thüi kyap kyap ci gui am pek gui vai nei. Ngami cu Bawipa amät naw ang lin ah sing ghing ah mäih ah kyak khai gui. Ngami ami van naw hman ci cu bik khai gui. Ani naw abi ah phäh ah khanpughi cu m’hlüng tai khai gui.

TITUS 3:4

Cun ung phi mi Hunbawi Khanpughi ah chihna nak la m’gein nak cu a dang law ah a kyak ung,

1 KORIN 14:25

Acun ah ang yak tu gui naw ani cu ng’thumcha sei, ani ah m’yih ne ang ngaih-tüh gui cu avan ng’dang sei, “Khanpughi cu nami ng’lung ah akcang ah om ci nei” cine ng’kyaa ne, m’khuukdoong ne, Khanpughi cu khawihnah khai nei.

LUKA 11:2

Bawipa Jesuh naw, “Nami taigü ung shi chaa ah nami taigü vai; “Khankho ah om ci kami Pa, Na ming theing thang sä, Na uknak gawk law sä, Khankho ah mäih ah m’dek khan ah phi Na ng’yak hlü cu be sä,

MATTHE 9:8

Acun ah mawng hmuh teng tuk ciah chang gui cu cäicat u netah, chang gui-am shin ah mäih ah huham pek ciah Khanpughi cu m’hlüngtai ci gui.

MATTHE 23:5

Ami bilawh phung chang naw a hmat vai ah bik ci gui. Ami m’cakau la ami baan ung akdäm nu gui ah cacim guh ne m’kawh ci gui. Ami sui ung phi akdäm ang sau nu gui ah cacim guh ne m’kawh ci gui. Ami sui cun phi akdäm ang sau nu gui ah chui ne sui ci gui.

MATTHE 6:16

‘Nangmi cu ei nami hlawi ah a kyak ung, mingthang hlük ci gui ah mäih ah müi ng’haam khai ah kä nami om vai. Ngami cu ei ami hlawi ah mawng ang dang vai ah ei cawi ciah müi hmai awn hteit hton ci gui. Kei naw akcang ka pyein cu, cun ah chang gui cu ami mät ah ng’yak hlü gah pyii ci gui nei.

MATTHE 23:9

Khomdek khan ah a u phi ‘Pa’ ah kä nami khü vai, nangmi ung khankho ah nami pa tumat bäng om ci.

MATTHE 6:9

Cun ah kyasei nami taigü ung; ‘Khankho ah om ciah kami Pa; Na ming theing thang sä;

PHYAWN NAK 34:35

Ngami naw ani cu a hmai pyü sei hmuk ci gui. Ani naw Bawipa awn ng’thu khai goi ah kä a valuh ba pha ah chuih a hmai cu sam awn shung ci.