LUKA 3:17 - Cho Bible Common Language 2016

¹⁷ Ani naw alo ma ah geit khäm ne chüdawn awn chü netah, ang tak cu khei ah thun ne, ang shi cu kä phät hlawt ciah mei awn m’khih khai.

LUKA 3:17 Referans Kwoze

MATTHE 13:30

Geit khäm khin ung khüt sei, geit la m’gho cu a täng ah phung ghing cang ni sä. Geit khäm khin a gawk law ung geit khäm ci gui-am; khu m’ghaw gui cu mawih sak gui ma netah, k’bum ne mei ung m’khih vä, cun kawn ah geit gui cu aat u ne, ka khei ung thun vä, cine kam cäi gui khai,’ cik ci,” cine m’thein gui ci.

MIKHAH 4:12

Cun ung phi changpakhui gui naw Bawipa ah m’lung kyong cu kä hmat ci gui. Htang cu le m’ship vai ah bum ah mäih ah m’kyuk gui vah atäng ah ami bum gui cu ngami naw kä hmat ci gui.

JEREMIAH 15:7

A gawnu päng kho avan ung kei naw nangmi cu ko ah mäih ah khokhi ung ka ning ghawt gui khai. Ka chang gui, kei naw ka ning m’di gui khai, Nami htanau gui cu kei naw ka ngawn gui khai, a i ah kyasei ci ung nangmi naw akshe ah nami om cu kä nami ng’düm sak ci.

SAM 1:4

Cun ung phi chang shekha gui cu cun ah mäih ah kä kyak ci; Ngami cu khokhi naw a yon ah ko ah mäih ah kyak ci gui.

MATTHE 3:12

Akut ung htang akchü nak vai ah chüdawn kawt ci. Amät ah geitkaw gui cu khäm yawp netah htang ang tak gui cu khei ung thun yawp khai. Ang shi gui läi cu m’sih ne käm khüt vai ah mei awn m’khih yawp khai,” cine m’thein gui ci.

ISAIAH 30:24

Nami lai thawn ciah seipat gui la ng’se la gui naw akbäpi la aknipi ah ei cu ei khai gui nei.

LUKA 3:18

Johan naw chang gui cu lam k’ni ung ami hteh vai ah ng’thu a hlü hlü m’thein gui ci.