LUKA 24:27 - Cho Bible Common Language 2016

²⁷ Cun kawn ah Bawipa Jesuh naw, Messiah ung tün ne profet gui naw, ngami ah mawng ami guk ah cacim gui cu tän ne pyein ne m’thein goi ci.

LUKA 24:27 Referans Kwoze

ISAIAH 7:14

Bä khai, Bawipa amät naw m’hnüt nak ning pek khai: hmumihta cu käu mah ne pamihta ah hta lawk khai, aming cu ‘Immanuel’ ah sui khai gui.

LUKA 24:44

Cun kawn ah Bawipa Jesuh naw, “Moses ah thukhän, profet gui ah cacim la Salan cacim ung, kei ah mawng ami guk gui phung cu, akcang ah küm khai nei, cine nangmi awn a täng ah ka om yah ung ka ning m’thein gui pyi ci. Ka pyein ah mäih ah tuhbäi küm law pyi ci nei” cine m’thein gui ci.

THULÄÄN NAK 18:15

Cun nak vaisü ung ani naw kei ah mäih ah prophet tumat cu ami mät ah chang ungka ning tüih law gui khai. Nangmi naw ani cu nami ngaih vai.

ZEKHARIAH 9:9

Zei vä, yei vä, Zion Chang gui, Zei ne m’lau vä, Jerusalem Chang gui! Ani cu m’khüt nak la näng nak awn lawk ci nei! Teng vä, nami ghangpughang cu lawk ci nei! Cun ung phi m’lung neim nak awn Ng’sehta ng’cuum ne lawk ci, cun cu Ng’se am ca hta, ng’se a nu ah a hta ah kyak ci.

LAMKTU 10:43

Bawipa yum ci gui ah chang phung cu a hlüngtai nak ming awn ami katnak m’geinsei gui khai, cine prophet gui naw pyein man ci gui” cine pyein ci.

JOHAN 5:39

Cacim ung angtäi ghin nak om khai ah ngai ne cacim bäng nami teng ci. Acun ah cacim naw kei ah mawng cu saksi ci.

JOHAN 1:45

Philip naw Nahtanelah hmu netah, “Moses naw thukhän ung a guk la, Profet gui naw ami guk ah mäih ah, Nazaret kho ah kaa Josef ah hta Jesuh cu, ni hmu pyi ci nei” cik ci.

ATÜNNAK 22:18

Kei ah ka ng’thu cu na ngaih ah hmawk ah khaw ah kaa ung chang pakhui avan naw, nang ah htangshon awn hriham gah khai gui” cik ci.

ISAIAH 50:6

Na m’ghuih ci gui am ka k’paang ka cun pek ci, Na k’shedam na u ne, ka m’gawng mu na k’bawh pe u ne, ka hmai ung na m’thüi ci gui phi kei naw kä ka ma na gui ci.

LUKA 24:25

Cun kawn ah Bawipa Jesuh naw, “Profet gui ah pyein man gui yum vai ah, shokshü aih ciah chang k’ang gui aw,

ZEKHARIAH 13:7

Hlüngtai ciah Bawipa naw, “Tho law ä, khim ghaat aw, kei ah hmawk ah bii bik ciah htoshäm cu na tuk vai, Na ngawn vai, a htome gu cu püipyang khai gui. Kei naw ka chang gui cu ka tu gui khai.

ATÜNNAK 3:15

Hnumi la nang, hnumi ah ng’shon la nang ah ng’shon cu gaa ah nami kyak khai ah ka bik khai. Ani naw nang ah lu cu ning deeng khai, nang naw ani ah khawlek cu na m’yawk khai” cine pyen nak ci.

MIKHAH 7:20

Cau kami pupa gui ung na shaitak ah na bekhüt nak la na m’hni nak cu Abraham la Jakob ah hta ng’shon, na chang gui am na m’dang khai nei.

DANIEL 7:13

Mü ah cun ah muimang ka hmuh sangung, chang ah mäih tumat cu ka hmuk ci. Ani cu khong mei naw koi sei kei täng ah ng’et lawk ci. Cun kawn ah ani cu angtäi ah ghing ciah ma ah hteit ci, a ma ah hteh nak hning gah ci.

SAM 132:11

Nang naw David ung bä ciah shaitak na bik ci cun ah shaitak cu nang naw kä na la ba khai: “Kei naw na hta gui ungka tumat cu ghangpughang ah ka hmoh khai, Nang ah kawn ah ani naw uk khai.

ATÜNNAK 49:10

Mang ah hteipawng cu Judah naw kawt khai. A hta ng’shon naw khonglän ung uk khai. Pakhui gui naw khawh pe lawk khai gui. Ani kyih aa ne ama ah kawp khai gui.

ATÜNNAK 26:4

Khankhaw mik ung om ciah aisi chü ah ka ning pungpiah sak khai. Na htangshon gui am shin ah khaw avan ka ap gui khai. Nang ah htangshon ungka chang pakhui avan naw hriham gah khai gui.

LAMKTU 7:37

Khanpughi naw ami mät pakhui ung ka, Profet tumat cu, kei a na tüih law ah mäih ah tüi lawk khai nei” ci neh Moses naw Israel chang ghu am pyen na gui ci.

EZEKIEL 34:23

Kei naw ka changshäm David ah mäih ah htome shäm tumat ah kyak ciah ghangpughang cu ka pe gui khai, ani naw tengkhen gui khai.

EZEKIEL 37:25

Ngami cu kei naw ka changshäm Jakob am ka pek ah khaw ung om khai gui, cun cu ami pupa gui ah om nak ah khaw ah kyak ci. Ngami cu acu ah khong län ung om khai gui, ami hta nau gui la ami htangshon gui phi om khai gui. Ka changshäm David ghangpughang ah mäih ghangpughang naw ang’täi ah uk gui khai.

LAMKTU 3:24

Samuel lah a hei prophet gui nawh tuk ngawi ng’dang lawk khai ah amawng gui cu, pyein shüt pyi ci gui nei.

LAMKTU 3:22

“Nami Bawipa Khanpughi naw, kei a na tüih law ah mäih ah prophet tumat cu nang mi ah tüi lawk khai; cun ah Bawi cu nami mät pakhui ung ka ah kyak khai, ani ah pyein ah ng’thu phung cu, nang mi naw nami ngaih vai nei.

MALAKHI 4:2

Cun ung phi kei na läk ciah nangmi ah phäh ah ka hun nak huham cu khohni ah mäih ah nami khan ah so lawk khai, hni ah pyü ne gai nak law püi khai. Nangmi cu phyawng ne, sei im ungka lut law ne ng’hlü ciah sei hta ah mäih ah nami yei khai.

THU PHLAAN 19:10

Cun ah kyasei kei naw a khaw pei ah kawp ne ka khawihnah khai pawng ngätah, khankho chang naw, “Kä na bi vai! Kei cu nangni, na phäi nau gui ni, Bawipa Jesuh ah m’dang ah ang thu düng läk ciah chang gui ni ah püipaw changshäm ah ka kyak ci, Khanpughi vah na khawhnah vai” cine na pyen nak ci. Bawipa Jesuh ah m’dang ah ng’thu düng awn vah purofet gui cu hnün thawh nak gah ci gui.

ATÜNNAK 12:3

Hriham ning pek ci cu, Hriham ka pek khai, Ning plah taam ci cu, Ka plah taam khai, Nang ung chang pakhui avan cu, Hriham ka pek khai” cine pyen ci.

KHEI NAK 21:14

Cun cu Bawipa ah ng’tuk bi nak, ciah ca-uk ung “... Suphah khaw ung Waheb gawnu, la khaw ng’nawi gui, Arnon Tuinu,

THULÄÄN NAK 1:45

Cun ah kyasei a ning m’htei gui vai ah Bawipa nami khü ci, cun ung phi ani naw kä ning ngai gui ci, a i ah kä ning tä gui ci.

ISAIAH 1:23

Nami vgvai gui cu hnu ng’tuk ciah kya u ne, m’guk ei ah teihpüi ah kyak ci gui; ngami naw m’cümhnah nak la ng’mü khawk cu angtäi sei dou ci gui. Ngami naw yung aha m’kawt ung hmei hta cu kä shungvong ci gui, hmei nu ah mawngma phi kä m’khoi m’cha pek ci gui.

ISAIAH 8:17

Bawipa naw akchang gui ung ka, amät naw amät cu ng’thuh sak ci, cun ung phi kei naw ani ngaih u ne, ka ngaih u nak cu ani ung ka tha ci.

ISAIAH 9:1

Ngami ah hmawk ah shin ah yaica nak ah khin ami phyawn nak vai ah lam kä om khai. Zebulun la Naphtali pakhui ah khaw cu ayanä kä bä man te ci, cun ung phi ngawi ah shin ah khaw ng’lei ung m’tam khah nak gawk lawk khai: Mediteranean ung ka naw akyang täng khaw Jordan ah vangga la kalile khaw amät. Khawhei chang gui ah om nak ah kyak ci.

MIKHAH 5:6

Ami thagui thamah nak awn Assiria Nimrod khaw cu näng khai gui. Assirian gui naw kami khawpäng ami tuk law ung ngami naw na hun gui khai gui.

MAKUH 4:34

Kä m’tumtäng ah a i phi kä m’theithang gui ci. Cun ung phi ami mät ami om yah ung ang düih püi gui-am a päng avan cu m’dang ne m’thein gui ci.

JOHAN 5:37

Na tüi lawk ciah Kapa Khanpughi amät naw phi, kei ah mawng cu saksi ci. Nangmi naw ani ah k’o kä nami ng’ya man khai, amüi phi kä nami hmu man khai;

JOHAN 12:41

Isaiah cu Bawipa Jesuh ah bämang nak hmuh pyi ciah kya ne, ani ah mawng cu shin ah apyein ah kyak ci.

LAMKTU 3:18

Khanpughi naw Messiah asih vai ah mawng cu prophet gui ung ng’cä neh pyein pyi ci nei; shin cu ang cä ah küm nak ah kyak ci.

LAMKTU 8:35

Philip naw acun ah cangcim awn tün neh, Bawipa Jesuh ah mawng Thu k’Ni cu m’thein tuk ci.