LAMKTU 8:39 - Cho Bible Common Language 2016

³⁹ Ngah ni cu tui ung ka, ani kai law ba vai am, Khanpughi ah Mumcha Theing naw Philip cu, a khaw hei ah hteh püi sei cunah Bawi naw Philip cu kä hmuh ba ci. Cun ung phi ani cu yeikyai neh lam hteit ba ci.

LAMKTU 8:39 Referans Kwoze

1 GHANGPUGHANG GUI 18:12

Kei naw ka ning hteh tak kei yah ung, Bawipa ah mümcha naw nang cu kä hmat nak ah hmun ah a ning hteh ei püi ah a kyak ung, kei a i ah ka kyak khai aw? Nang shin ung na om cu kei naw Ahab am ka m’thein khai, ani naw law ne kä a ning hmuh ah a kyak ung, ani naw kei cu na ngawn khai nei. Na shüm vai cu, kei cu ka hmaw hta sang ge ung akcang ah Bawipa ka khawihnah ci nei.

2 GHANGPUGHANG GUI 2:16

ami pyen cu, “Shin ung chang hmakip kami om ci, avan cu ak gai yah gui nei. Hteit ne nang ah bawi cu kami shui ba khai nei. Bawipa ah mümcha naw a chaan ah kyak khai nei, khomhtung khongnawi yung ah nawng shüt khai nei. Elisha naw, “Kaa, kä nami hteh vai nei” cik ci.

EZEKIEL 11:24

Muimang ung khanpughi ah mumcha naw na chang ne omktu gui ah om nak Babilonia ah na hteh püi ba ci. Cun kawn ah muimang cu ng’kawn lawk ci,

EZEKIEL 8:3

Ani naw kut ah mäih lawk cicu shäng ne, ka lusam cu na shum ci. Shin ah mui man gung khanpughi ah mumcha naw kei cu khokhi ung ak hlüng ah na Chang neta Jerusalem ah na hteh püi ci. Ani naw kei cu Taigüim a siiptäng m’kawt valuh nak ung na hteh püi ci, a cun ung khanpughi naw kä a teng hlü ah a gup om ci.

EZEKIEL 43:5

Bawipa ah mümcha naw na chang neta cham ah akyong ah na hteh püi ci, acun ung Taigüim kyong cu Bawipa ah bämang nak awn be sei kei naw ka hmuk ci.

EZEKIEL 11:1

Khanpughi ah mumcha naw kei cu na chang ne, Taigüim ah ak kyang täng m’kawt nung na hteh püi ci. A cu ah m’kawt ah pei ung chang m’ku lei hma ka hmuk ci, a cu gui cu pakhui ung angvai goi Azzur hta Jaazaniah la Benaiah hta Pelatiah mah mah ah kyak ci gui.

MAKUH 1:10

Tui ungka a thawh law ba vai-am khankho m’kawt hmawng khätah Mumcha Theing cu Müm bawk ah mäih ah ak khan ah kyum law sei hmuk ci.

PHILIPPIAN 3:3

Vun-ah nak bik ci gui ah chang cu ngami ah kä kyak ci, mikmi ah kyak ci. A i ah kya sei ci ung mikmi cu Mumcha awn Khanpughi cu mi khawihna u ne, Bawipa Jesuh Khrit awn mi kawng ät u ne, yeikyai nak mi gah ciah kyak ci. Mikmi cu a hei a i baw düt kä mi ngaih u ci.

JAMES 4:16

Cun ung phi nangmi tuhbäi chang ah ng’shei ne nami khähghah ci, cun ah khähgha nak phung cu cheishoh nak ah kyak ci.

PHILIPPIAN 4:4

Nang mi cu Bawipa ung nami ghin nak awn yeikyai vä, ka pyein ba mä cu yeikyai vä!

ROMAN 5:2

Mikmi naw Jesuh Khrit cu mi yum ci kya sei, ani naw mikmi am, Khanpughi ah m’geinsei nak cu na hmat sak gui ci. Tuk bäi cun ah m’geinsei nak cu mi gah u ne, Khanpughi ah hlüngtai nak gah vai cun-phi ngaih gep nak om sei mi yeikyai ci.

LAMKTU 13:52

Antiok gawnu ah yum ciah chang gui cu yeikyai u ne Mumcha Theing awn küm be ci gui.

LAMKTU 8:8

Cun ah kyasei cun ah gawnu ung om ciah chang ami van cu yei kiai ci gui.

MATTHE 13:44

“Khanpughi ah uknak kho cu shin ah mäih ah kyak ci, Chang tumat naw, lai ah phuh ne gimah khawh ng’peeih cu hmu netah, lin ne phuh ba shüt ci. Cun kawn ah yeikyai ne hteit ba ne, akhawh avan yoi yawp netah, cun ah lai cu khleih ba ci,” cine m’thein gui ci.

MATTHE 3:16

Bawipa Jesuh cu tuinim pyii ne a Luh law ba kawn ah, khankho cu yung hmawng law khätah, Khanpughi ah Mumcha Theing cu müm bawk ah mäih ah yawng law ne, ak khan ah ngo law sei hmuk ci.

ISAIAH 61:10

Bawipa naw bi a bi ah phäh ah Jerusalem cu yeikyai ci nei. Ani cu ceimah lawk khai ah ng’lami hta ng’sui ng’sak ciah mäih ah kyak ci nei. Khanpughi naw ani cu hun nak la näng nak suisak sak ci nei.

SAM 119:111

Na thumkhän gui cu ng’täi ciah ka khawh cham ah kyak ci; cun gui cu ka m’lung kyong ah yei nak ah kyak ci.

SAM 119:14

Bä m’cam vai ah mä nang ah thumkhän gui läk vai cu kei naw ka yum hni pi ci nei.

LAMKTU 16:34

Ani naw Paul la Silas cu a im ah khü goi ne, khin nah ne tu m’bei goi ci. Amät la akyong ungka gui ami van cu Khanpughi ami yum tu ah phäh ah ang htei ah yeikyai ci gui.

EZEKIEL 37:1

Bawipa ah a huham naw kei cu na küm ne, ang mümcha naw na la ne guh gui be ciah khongnawi ung na chah ci.

LAMKTU 8:29

Mumcha Theing naw Philip am, “Ani ah om nak ah hteit neh a täng ah ng’gui püi ä” cine pyen nak ci.

LAMKTU 8:38

Cun kawn ah ng’se cu ng’düm sak netah, ngah ni cu tui ung yu kyum law ni neh Philip naw cun ah bawi cu tui ng’hnim sak ci.