LAMKTU 14:23 - Cho Bible Common Language 2016

²³ Ngahni naw khritha bum päng ung a gham gui hei m’düih vü ne, ei hlawi ne taigü nak awn, ami yum ah Khanpughi ah ap gui ci ci goi.

LAMKTU 14:23 Referans Kwoze

TITUS 1:5

Kei naw Crete ung ka ning nawng shüt cu, bi vai om ba ci gui avan ang khän khai ah na bi vai la api gaw päng ung khritha k’tahnga gui nam düih vai ah hmawk ah kyak ci. Tuhbäi ka ning m’shüm thein gui cu na shüm vai nei:

LAMKTU 11:30

Cun ah k’bäi u netah Jerusalem Khrithabum a gham gui am ami peit taak ah ngui gui cu, Barnabas la Soul am m’khäh gui ci gui.

JAMES 5:14

Gawpyam ciah chang naw khrithabum ung ang vaihta gui cu khü gui sä. Ngahmi naw ak gaw cu khitui awn hluk ne Bawipa ah ming ung taigü pe u sä.

2 TIMOTHI 2:2

Saksi gui akda ah ma ah kei naw ka ng’shäu ah m’theithang nak gui cu, nang naw na ng’ya pyi ci nei, cun cu la netah, chang hei gui m’theithang tu ba hning khai ah ngaih gep ah chang gui am, nam thei tu ba gui vai nei.

LAMKTU 20:32

“Tuk bäi kei naw nang mi cu Khanpughi ah kut ung la, am gein nak ah Thu Ni ung ka ning ap gui ci. Cun ah Thu Ni naw, Khanpughi naw ak chang gui ah hmawk ah am hnüt ah, hriham ning pe gui ne ning düih sak gui khai.

1 TIMOTHI 5:22

Bawipa ah khuut bik ci am kut taih nak peit nak cu kä nami bi ghet ghet vai, chang ah shetkat nak ung kä nami ng’caw yah tu vai, nami mät theingcim ne nami om vai.

LAMKTU 20:17

Miletus ah kaa ge naw Paul naw, Ephesus ah Khrithabum a gham gui am, ami hmuh law vai ah ca gu ne pe gui ci.

3 JOHAN 1:1

Ang vaihta kei naw akcang ah kam hni ah Kaius-am ca ka guk lawk ci nei.

2 JOHAN 1:1

A ng’vaihta kei naw, akcang ah kam hni ah hnumi nu la a hta gui am ca ka guk lawk ci nei. Kei bäng ah kä kyak ciah thu thuuk ung m’hni nak hmat ci phung naw, nang cu ning m’hni ci nei.

1 PETER 5:1

Kei ka mät ah mäih ah khrithabum ung ang vaihta gui cu ka ning m’cäi gui ci nei. Bawi Khrit ah geinvai nak ah mawng saksi ci la dang lawk khai ah abämang nak ng’pai tuk ciah chang ah ka kiak nak awn ka ning m’cäi gui ci nei.

1 TIMOTHI 5:1

Na mät ah ng’vaipi cicu m’yeek ne kä nang thu püi vai, na pa ah mäih ah na chang m’sui vai. Na mät ah hmaw pi ci gui cu na nau gui ah mäih ah,

LAMKTU 15:6

Cun ah kyasei ang düihpüi gui la ang vai gui cu cun ah a mawng ng’ge nak vai ah ng’bum ci gui.

LAMKTU 15:4

Paul la Barnabas cu Jerusalem ah ami gawk law ung, khrithabum gui, ang düihpüi gui la ang vai gui naw a na dou gui u sei, ngahmi awn Khanpughi naw bi a bi ah mawng cu m’thein tu gui ci gui.

1 PETER 5:10

Cun ung phi nangmi cu cun ah geinvai nak a shänghta nami aut kawn ah, M’Gein nak ah Khanpughi, Bawi Khrit ung ning kawng ät sak gui ne, ng’täi ciah abämang nak ning k’pai tu gui khai ah ning khü gui ciah Bawipa naw, nangmi cu ning kümbe sak gui ne, ng’khäntaang nak, k’thamah nak la khüighaat nak ung ning khanhtek sak gui khai nei.

2 TIMOTHI 1:12

Acun ah mawng ung kei cu geinvai nak ka gah ciah kyak ci. Cun ung phi kei ung lung üp nak akbe ah om lä ci. A i ah kyasei ci ung kei a u ung kang ap cu ka hmat ci, kei naw ka ap gui cu ak hnu bäih ah Hnüüp güt ung kut shum khai ci cun phi, kei naw akcang ah ka hmat ci.

LAMKTU 15:23

Ngahni am ca tumat gu ne m’kan goi ci gui, cun ah ca cu: “Na mi phäi nau gui ah kya ciah, ang düihpüi gui la ang vai gui naw, Antiok gawnu, Siria kho la Cilicia kho ung om ci gui ah chang pakhui hei khritha gui am yeikyai ne ca kami ning pe law gui ci nei.

LAMKTU 14:26

Antiok ah gawk ba ci gui, Antiok cu tuk bäi ng’pyi khai ah bi a mi bi nak ung m’gein nak ami gah vai ah Khritha bum gui naw Khanpughi ah taigü ne ami ap nak gui ah kya ci.

LUKA 23:46

Bawipa Jesuh cu, “Aw Kapa, Na kut ung Ka Mumcha ka ning ap ci nei” cine m’lau netah kät lawk ci.

MAKUH 3:14

Ngami cu a pei ah gawk law u khätah, chang sing gha-lei-goi cu ghü gui netah, ang düihpüi gui ah ami min cu sui gui ci. Bawipa Jesuh naw, “Kei naw nangmi cu kei awn a täng ah nami om khai ah ka ningghü gui ci, thu nami pyein khai ah ka ning tüi gui khai.

LUKA 2:37

Ani cu tuhbäi a khokum cheit-kip-lei-phli law pyi ci. Ani cu amü ak hnüüp Taigüim ah om ne ei hlawi ne taigü ci.

LAMKTU 1:24

Cun kawn ah ngah mi cu, “Bawipa, nang naw chang ah m’lung kyawng avan na hmat ci, Judas cu amät ah ng’yak hlü ah ang’düihpüi ung ka hteit pyi ci.

2 KORIN 8:19

Cun bäng ah kä kyak ciah peittaak nak ah bi bi nak ung keimi awn a täng ah hteit hton ne bi tuk khai ah Khrithabum gui naw ami ghü ah kyak ci nei. Shin ah peit taak nak ah mawng kami bi cu, Khanpughi ah bämang nak ah hmawk la keimi ah m’hteihtang nak cu ang dang vai ah, phäh ah kyak ci.

MATTHE 17:21

(Khoshe cu, taigü nak la ei hlawi nak ah kawn ah a i awn kä nami m’khüt khai nei),” cine pyen na gui ci.