KALATIAN 3:29 - Cho Bible Common Language 2016

²⁹ Nangmi cu Bawi Khrit nami khäm ah a kyak ung, Abraham ah hta ng’shon ah kya u ne, Khanpughi ah a shaitaak cu nami gah khai.

KALATIAN 3:29 Referans Kwoze

EPHESIAN 3:6

Cun ah thuuk ciah a mawng ung, Thu Ni awn chang khuihei gui naw, Jew chang gui ah mäih ah Khanpughi ah yoshen nak cu gah tuk ci gui. Jew chang gui la khuihei chang gui cu, pumsa tumat ung ka, ang phyeek pai gui ah kya ne, Bawi Khrit Jesuh ung Khanpughi ah shaitaak cu ng’kühyah ci gui.

KALATIAN 3:7

Cun ah kyasei Khanpughi akcang ah yum ci gui cu, Abraham ah hta ng’shon gui ah kyak ci, cicu nami hmat vai nei.

ROMAN 8:17

Mikmi cu Khanpughi ah hta gui ah mi kyak ci kyasei, ak chang gui ah hmawk ah Khanpughi naw am hnüt ah hrilham cu mi khäm khai. Bawi Khrit ah hmawk ah Khanpughi naw am hnüt ah bäkhäk nak cun phi mi khäm tuk khai. Mikmi cu Bawi Khrit awn a täng ah gein vai nak mi gah ah a kyak ung, ani awn a täng ah bämang nak phi mi gah khai.

TITUS 3:7

Cun ah kyasei mikmi cu am gein nak awn Khanpughi ung düng nak mi gah ne, mi ngaih u ah angtäi ghin nak cu mi gah vai ah kiak ci.

THU PHLAAN 21:7

Näng ciah chang naw shin ah ng’thukhän cu gah khai, kei cu ani ah Khanpughi ah ka kyak khai, ani cu kei ah htapa ah kyak khai.

KALATIAN 4:7

Cun ah kyasei nangmi cu khlei htein ah kä kya ba ne, A hta ah nami kya pyi ci. A hta ah nami kya pyi ci kyisei, nangmi cu Khanpughi ah pakhui m’düng ciah A Htapa ah nami kyak ci.

JAMES 2:5

Ngai vä phäi nau gui aw! Khanpughi naw ani m’hni ci gui ah khan ah a shaitaak ah mäih ah, yum nak ung bühmang vai la Khanpughi ah uknak kho khäm vai ah, pyamtham ci gui cu, ghü gui ci nei.

2 KORIN 10:7

Nangmi naw ak pung müisa vah nami teng ci, Nangmi ungka kei bawi Khrih chang ah ka kyak ci cik ciah chang a u om ne ang? A om ah a kyak ung ani ah mäih ah Keimi phi Bawi Khrih ah chang ah kami kyak ci ci cu, ngaih-tüh ba sä

HEBRU 6:17

Khanpughi naw amä ah ng’bü nak kä am thawnghlai phung vai ah mawng cu, a shaitaak nak gah ciah chang gui ang hteiing ah m’dang gui hlük ci. Cun ah kyasei ng’phyun ne shai a taak ah kyak ci.

KALATIAN 3:16

Tuhbäi Khanpughi ah shaitaak cu Abraham la a hta ng’shon ah hmawk ah kyak ci. Cacim ah pyein cu “Hta shon gui” chang akda a pyein ah kä kyak ci, “Hta shon” chang tumat a pyein ah kyak ci, aming cu Bawi Khrit ah kyak ci.

HEBRU 11:18

Khanpughi naw, Abraham, “Kei naw shai ka taak ah nang ah hta shon cu, Issak ah ng’shon ah kyak khai nei,” cine pyen nak ci.

HEBRU 11:7

A ngawi ah gawk lawk khai ah kä hmu hning ah a mawng gui, Khanpughi naw khän ne am cäi nak Noah naw ang yak cu a yum nak awn ah kyak ci. Ani naw Khanpughi ah thu ngai ne amät ah kiong khui ah phiawn nak ah hteinpaw im cu co ci. Cun ah khomdek chang gui ah shetkat nak cu dang sak ne, ani cu a yum nak awn Khanpughi ung düng nak cu gah ci.

HEBRU 1:14

Cun ung khanchang gui cu, a i gui ang? Ngami cu hun nak gah ciah chang gui m’hteihtang gui khai ah Khanpughi naw a tüih gui ah, Khanpughi ah khuut bik ciah mümcha gui ah kyak ci.

KALATIAN 5:24

Bawi Khrit Jesuh khäm pyi ciah chang gui phung naw hnicim chang nak la ng’yak hlü nak avan cu, kutlam tung ung sih püi pyi ci gui nei.

KALATIAN 3:28

Cun ah kyasei Jew chang la khui hei, khlei htein la khui mah, pami la hnumi ciah ang lakmah nak kä om ba ci: nangmi nami van cu Bawi Khrit Jesuh ung akawng ät ah nami kyak ci.

1 KORIN 15:23

Cun ah kyasei chang gui cu akhüimai angkäkhtäng ah tho ba khai gui: ak htük bäih ah Bawi Khrih tho ba ci, cun kawn ah ani a kyum law ba ung, ani khäm ciah chang gui cu tho ba khai gui.

MATTHE 3:9

Abraham cu kami pa ah kyak ci nami ci nak düt awn, nangmi cu katnak ung nami phyawng khai ah kä nami ngaih-en vai nei. Khanpughi naw shin ah lung gui cu la ne, Abraham ah hta gui ah tüi pyang hning ci, cicu ka ning m’thein gui ci nei.

KALATIAN 3:18

A vai sü ah Khanpughi ah m’shumphyuk nak cu thukhän ung düi ciah a kyak ung, cun cu shaitaak ung düi ciah kä kya ba khai. Cun ung phi Khanpughi naw a shaitaak awn Abraham cu, cun ah am shumphyuk ah kyak ci.

KALATIAN 4:1

M’täi ne pyein ung Chang tumat ah hta cu apa khawh chaam avan ei mang khai ah a kyak ung phi, kä a ng’vai pha ung khlei htein ah mäih ah om ci.

KALATIAN 6:16

Shin ah mawng gui läk ne ghin püi ciah chang gui la Khanpughi ah chang gui ah khan ah dimdeeih nak la m’gein nak cu om sä!