JOHAN 4:14 - Cho Bible Common Language 2016

¹⁴ cun ung phi kei ah pei tah tui awk cicu a ngawi ah phi tui kä gha ba khai. Cun ah tui cu ani ah m’lung kyong ung ghin nak tui gei ah khawng ne long ne, ani-am angtäi ghin nak cu pek khai” cik ci.

JOHAN 4:14 Referans Kwoze

JOHAN 6:35

Bawipa Jesuh naw, “Kei cu ghin nak m’htut ah ka kyak ci, kei ah lawk cicu a i sangung phi ei kä cawi ba khai; kei na yum cicu a i yah ung phi tui kä gha ba khai.

ISAIAH 49:10

ngami cu kä cawi phung, kä gha phung khai gui. Ngami m’hni gui ci naw lamshüm gui ci kya sei, khohni ling la khong’gau kholing naw kä nat sak gui khai. Ani naw tuilawng gui ah om nak ah hteh pui gui khai.

THU PHLAAN 7:16

Ei ah cawi nak, tui ah gha nak, hni ah ng’liing nak, mei ah ng’kyeng nak, ngami ah khan ah kä om ba khai.

JOHAN 11:26

Kei na yum ne tuhbäi ghing ciah chang cu, a i yah ung phi kä sik khai, kang thu na yum ci ang?” ci nak ci.

JOHAN 6:58

Shin ah m’htut cu khankho ah kaa kya lawk ciah kya ne, ei kawn ah sik nak ah kyak ciah, nami pupa gui ah ei ah m’htut awn kä täng ci. Shin ah m’htut ei ciah chang phung cu angtäi ah ghing khai” cine m’thein gui ci.

1 JOHAN 5:20

Khanpughi ah Htapa cu kyum law ne, Lulang nak cu na pe gui sei, Khanpughi akcang mi hmat tu cun phi, mikmi naw mi hmat ci. Mikmi cu A Htapa Bawi Jesuh Khrit awn mi kawng ät nak awn, Khanpughi akcang awn phi kawng ät ne mi ghing ci. Shin cu Khanpughi akcang ah kyak ci, ani ung mi gah cu angtäi ghin nak ah kyak ci.

2 KORIN 1:22

Khanpughi a mät naw m’khoi ne na khei gui ne, amät ah chang ah ng’kheing vai ah nam hnüt gui ci. Mikmi ah gah vai a na m’küm peit gui cu a kyän nak ah Mumcha Theing cu mi m’lung kyong ung na pe gui ci.

ROMAN 6:23

Shetkat nak ah a phu cu sih nak ah kyak ci; Cun ung phi Khanpughi naw a phu kä m’hnüt vai ah am gein nak cu, mi Bawipa Jesuh Khrit ung kawng ät nak awn gah ah angtäi ghin nak ah kyak ci.

1 PETER 1:22

Nangmi cu thucim nami läk nak awn, nami m’lung kyong cu theing sak u ne, yum ciah nami chang paw phi akcang ah nami m’hni pyi ci nei. Cun na kyasei tumat la tumat nami m’lung kyong avan nawn nami ng’yum hni tu vai nei.

JOHAN 10:10

M’guk ei cu, m’guk khai, ngawn khai, plawhsheh khai ah lawk ci. Kei läi cu nangmi naw ghin nak nami gah vai la ghin nak akümbe vai ah ka lawk ci.

EPHESIAN 4:30

Khanpughi ah Mumcha Theing cu kä nami m’thüi-en vai; a i ah kyasei ci ung Mumcha Theing cu Khanpughi naw nangmi a ning khäm gui ah mawng m’hnüt nak ah kyak ci, ak hnu bäih ah Hnüüp ung nangmi a ning phiawn nak gui vai ah, a kyän ah phi kyak ci.

ROMAN 5:21

Kat nak naw sih nak awn a uk ah mäih ah, mi Bawipa Jesuh Khrit ung angtäi ghin nak mi gah vai ah, Khanpughi ah m’geinsei nak naw ng’düng nak awn na uk gui ci.

MATTHE 25:46

Cun na kyasei ngami cu angtäi ah shetkat nak gah khai gui. Düng ciah changnigui läi cu angtäi ghin nak kho ah gawk khai gui.

ISAIAH 55:1

Bawipa naw pyen ci, “Tui gha ciah chang nü law vä — shin ung tui om ci nei! Ngui kä tak ciah chang gui law vä — htam’guh khleih ne ei law vä! Law vä! Wine la suktui khleih vä — nang ung a i phi kä ng’pyi khai nei!

ISAIAH 58:11

Cun ung kei naw angtäi sei lam ning m’shüm gui ne, akni gui awn ka ning büh bei sak gui khai. Kei naw ning khüighat sak gui ne ka ning gai sak gui khai. Nangmi cu tui akda awn sawi ah duin ah mäih ah nami kyak khai, kä ket hlawt ciah tuilawng ah mäih ah nami kyak khai.

JEREMIAH 2:13

Cun cu ka chang gui naw katnak hnih ami bi ah phäh ah kyak ci: Ngami naw tui ci lawng ah ka kyak ciah kei cu na ng’hlah tak ci gui, ngami naw tuihlüng co ci gui. Cun cu teek ciah tuihlüng ah kya ne a i tui phi kä ng’tang ci.

JEREMIAH 31:25

Cümbawng ci gui cu kei naw hüizang sak gui ne, ei ah cawi ne aktha ken ci phung cu phü khai ah ka m’bei gui khai.

EZEKIEL 47:9

Cun ah tui lawng a lon nak päng ah khisa gui apäng avan la nga gui om ci gui. Cun ah tui lawng naw tuisii tuinu ung tui cu ci sak khai, acun alon nak päng ah ani naw ghin nak law püi khai.

MATTHE 5:6

“Khanpughi ah ng’yak hlü ah bilo hlük ciah chang gui yeikyai vä; Nangmi cu Khanpughi naw nami ng’yak hlü ning k’be sak gui khai!

JOHAN 4:10

Bawipa Jesuh naw, “Nang naw Khanpughi ah m’gein nak la, tuhbäi tui ning ng’yoi cicu na hmat vai sü ung, ani ah ghin tui gei cu nang yoi khai sü te, ani naw phi cun ah tui cu ning pek khai süte” cik ci.

JOHAN 4:11

Cun ah hnumi naw, “Bawipa, nang ung tui than nak vai phi kä om ci, tui shawk phi thuuk ci, a i chaa ah ghin nak tui gei cu na gah khai ang?

JOHAN 4:13

Bawipa Jesuh naw, “Shin ah tui awk cicu tui gha ba khai;

JOHAN 4:36

geit khäm ci cu, ng’cheng gah ne, angtäi ghin nak ah geit cu khäm ba ci, cun ah kyasei, geit ci la khäm ci cu angtäi ah yei kiai khai goi nei.”

JOHAN 6:27

Shekaa thei ciah ah ei awk cu käk tha nah ne, kä shekaa thei ciah, angtäi ghin nak ah ei awk cu tha na vä. Khanpughi naw hlüngtai nak a ap pyi ah kyasei, chang ah Htapa naw cun ah ei awk cu nangmi-am ning pe gui khai nei” cine m’cäi gui ci.

JOHAN 7:37

Ami pawi ah ang hning nak pi la ang pyi nak ah hnüüp ung, Bawipa Jesuh cu ng’düi law netah, “Tui gha ci naw kei ah law ne tui aw law sä;

THU PHLAAN 7:17

A i ah kyasei ci ung mangkiaang ah lai ung om ciah Htomehta naw, ngami cu ngung gui ne, ghin nak tui k’gei ah khawng nak ah khah püi gui khai. Khanpughi naw phi ngami ah mik ungka ng’phli tui phung cu ghu pe gui khai” cine pyein ci.

TAIGÜTHUM 11:36

Cun ung phi tuibüm, tui shawk cu theingcim ci. Acun gui ah aksi pumsa naw a tawn phung cu kä theingcim ci.