JOHAN 10:28 - Cho Bible Common Language 2016

²⁸ Kei naw angtäi ghin nak ka peit gui ah kya ne, ngami kä si hlawt khai gui. A u naw kei ah kut ung kaa, ngami cu kä na gut hlawt khai.

JOHAN 10:28 Referans Kwoze

JOHAN 6:37

Kapa naw a na ap ah chang phung cu kei ah lawk khai gui. Kei ah lawk ciah chang phung cu a u phi kä ka m’hlat ba khai.

HEBRU 7:25

Cun ah kyasei ani ah ang ming ung Khanpughi ah lawk ciah chang gui phung angtäi sei hun gui ci. A i ah kyasei ci ung Bawipa cu cun ah chang gui ah hmawk ah Khanpughi ah ng’coi ng’pak khai ah, angtäi ah a ghin ah hmawk ah kyak ci.

ROMAN 8:29

Khanpughi naw a ghü ah chang gui cu, A hta ah mäih ah ami kyak vai ah m’cha ne m’hnüt ne om sak gui ci. A hta cu ng’phäi nau gui akda ung, ang vai pi ah a kyak vai ah hmawk ah cun ah a ciah kyak ci.

JOHAN 18:9

(Cun a ci cu, ‘Kapa, nang naw na na ap ah chang tumat phi kä dimaih khai’ a ci cu, a khüm vai ah hmawk ah kyak ci.)

PHILIPPIAN 1:6

Cun ah kya sei nang mi ung bi ak ni tün ne bik ciah Khanpughi naw Bawi Khrit Jesuh ah kyum law nak vai ah hnüüp kä a gawk phaa ung, cun ah bi cu ng’pyi khai ah bik khai ah ka yum ci nei.

ISAIAH 54:17

Cun ung phi a i lik’htei naw phi nang cu kä ning nat sak khai; Nang ning bünphei ci phung cu nang naw na m’shang hlawt khai. Kei naw ka changshäm gui cu ka shungvong gui khai, näng nak ka pe gui khai.” Bawipa naw pyen püi ci.

1 JOHAN 2:25

Cun cu Bawi Khrit amät naw shaitaak nak ana peit gui ah angtäi ghin nak cu gah ah kyak ci.

JOHAN 4:14

cun ung phi kei ah pei tah tui awk cicu a ngawi ah phi tui kä gha ba khai. Cun ah tui cu ani ah m’lung kyong ung ghin nak tui gei ah khawng ne long ne, ani-am angtäi ghin nak cu pek khai” cik ci.

ROMAN 8:1

Cun ah kya sei Jesuh Khrit ung kawng ät ne om ciah chang gui cu Khanpughi ah shet m’kat nak phiawn nak ci gui.

JUDE 1:24

Kä nami kyuk ng’täät vai ah ning venk’pang gui ne, ning theingcim sak gui ne, yeikyai nak awn abä khäk nak ah amaa ah ning gawk sak gui ne;

JOHAN 17:2

Na Htapa ah kut ung na ap ah chang gui-am angtäi ghin nak a peit gui hning vai ah, nang naw Na Htapa-am chang nüng m’khüt nak ah hlüngtai nak cu na pe pyi ci nei.

JOHAN 5:24

Kei naw akcang ka pyein cu, “Kei ah ng’thu ngai ne, kei na tüi lawk ci, yum ciah chang cu, angtäi ghin nak gah ci. Ani ung m’khoichaa nak kä om ba khai. Ani cu sih nak näng ne ghim nak gah pyi ciah kyak ci.

1 JOHAN 2:19

Cun ah chang gui cu a i yah ung phi mikmi awn kä pui m’ca ci gui ah kya ne, na hteh tah gui ci gui nei. Ngami cu mikmi awn a täng ah pui m’ca ci gui ah mi chang ah ami kyak ung mikmi awn a täng ah om khai gui sü te nei. Cun ung phi ngami ami hteh cu, ngami ungka a u chang phi, mikmi awn kä ng’gui ng’phaa ba ci, cicu akdei ah ang dang nak ah kyak ci nei.

1 JOHAN 5:11

Saksi ah ang dang nak ah mawng cu; Khanpughi naw angtäi ghin nak cu na pe gui ci, cun ah ghin nak cu A Htapa ung phung ci.

JUDE 1:21

Khanpughi ah yumhni nak cu nami yii hnei vai nei, mi Bawipa Jesuh Khrit naw ak chimgein nak awn angtäi ghin nak a ning peit nak gui ah hnüüp cu nami ngäng vai nei.

1 PETER 1:5

Nangmi nami yum cicu ak hnu bäih ah a khin ung dang law ge khai ah hun nak, nami gah khai ah Khanpughi naw, a hlüngtai nak awn ning m’htei gui ci nei.

SAM 37:28

Bawipa naw düng cicu m’hni ne, bekhüt ciah ak chang cu kä nawng ci, Ani naw angtäi sei ngäng gui ci, Cun ung phi changshe ah hta ng’shon gui cu, gawt ne k’täm gui khai.

THULÄÄN NAK 33:3

Bawipa naw a chang gui m’hni gui ci, Amät ah prophet gui cu m’hni gui ci. Cun ah kyasei a khaw ka ah mi kawp ne, Ang thumkhän gui mi läk khai.

ISAIAH 45:17

Cun ung phi Israel cu Bawipa naw hun ci nei, ani ah näng nak cu ngawi yä om khai nei; ani ah chang gui cu kä thui hmai phung khai gui nei.”

JOHAN 11:25

Bawipa Jesuh naw, “Kei cu thawh nak ba la ghin nak ah ka kiak ci, kei na yum ciah chang cu, a sih ung phi ghing ba khai;

JEREMIAH 31:3

ashou nak ah ka naw ngami ung ka ng’dang ci. Israel chang gui, kei naw angtäi sei ka ning m’hni gui ci, Cun ah kyasei kei naw ng’täi ciah ka m’hni nak cu k’täi ne ka ning m’dang gui ci.

JUDE 1:1

Jesuh Khrit ah changshäm, James ah nau Jude naw, Khanpughi naw a khü gui, Pa Khanpughi ah m’hni nak ung om ci gui, Bawipa Jesuh Khrit ah ngäng bom gui ah chang gui am ca ka ning guk law gui ci nei.

NG'THU K'THUUK~ 24:16

Düng ciah chang cu a i chü vei a kyuk ung phi a i ah kä kyak ci. Angtäi sei tho ba ci, cun ung phi chang shekha cu leigai naw m’di ci.

2 THESSALONIAN 2:13

Phäi nau gui aw, Keimi naw Bawipa naw a ning m’hni gui ah nang mi ah hmawk ah angtäi sei Khanpughi cu kami m’kümto khai nei. Khanpughi naw nangmi ak htük bäih ah hun nak nami gah khai ah a ning khü gui cu, Mumcha Theing ah hlüngtai nak awn theingcim ciah akchang ah nami kyak ah hmawk la cacim nami yum ah hmawk ah kiak ci.

JOHAN 3:36

A htapa yum ciah chang cu angtäi ghin nak gah ci. Kä yum ciah chang cu ghin nak kä hmuk khai. Ani ah khan ah Khanpughi ah m’lung she nak om khai.

2 TIMOTHI 1:12

Acun ah mawng ung kei cu geinvai nak ka gah ciah kyak ci. Cun ung phi kei ung lung üp nak akbe ah om lä ci. A i ah kyasei ci ung kei a u ung kang ap cu ka hmat ci, kei naw ka ap gui cu ak hnu bäih ah Hnüüp güt ung kut shum khai ci cun phi, kei naw akcang ah ka hmat ci.

ROMAN 5:21

Kat nak naw sih nak awn a uk ah mäih ah, mi Bawipa Jesuh Khrit ung angtäi ghin nak mi gah vai ah, Khanpughi ah m’geinsei nak naw ng’düng nak awn na uk gui ci.

JOB 17:9

Ami mät naw ami mät chang nak ciah pyen ci gui naw k’cang ci gui ah pyen law pi k’täi ci gui nei.

1 TIMOTHI 1:16

Cun ung phi Khanpughi naw kei cu nam gein ci, cun ah a nam gein ah mawng cu, ngawi ah Bawi Khrih yum ne ghin nak gah ci gui naw ami thei tu vai ah Bawi Khrih naw a hnimgei nak ah a mawng cu, shekak ciah kei awn am dang ah kyak ci.

ROMAN 6:23

Shetkat nak ah a phu cu sih nak ah kyak ci; Cun ung phi Khanpughi naw a phu kä m’hnüt vai ah am gein nak cu, mi Bawipa Jesuh Khrit ung kawng ät nak awn gah ah angtäi ghin nak ah kyak ci.

ROMAN 5:17

Chang tumat ah katnak naw sih nak awn uk ne a khüm ah a kyak ung, A hei chang tumat ah kyak ciah Jesuh Khrit ah bilawh ah mawng cu a i hlawk ah hlüngtai khai ang! Khanpughi ah bäkhäk ciah am gein nak la, Khanpughi ah ma ah düng nak ah am gein nak, gah ciah chang gui cu, Jesuh Khrit ung ghing ne, näng ne om khai gui nei.

ROMAN 5:2

Mikmi naw Jesuh Khrit cu mi yum ci kya sei, ani naw mikmi am, Khanpughi ah m’geinsei nak cu na hmat sak gui ci. Tuk bäi cun ah m’geinsei nak cu mi gah u ne, Khanpughi ah hlüngtai nak gah vai cun-phi ngaih gep nak om sei mi yeikyai ci.

LAMKTU 7:59

Cun ah lung awn ami vawih yah ung Stephen cu, “Oh Jesuh Bawipa kamumcha na yuk la peä” cine taigü ci.

JOHAN 14:19

Nangmi ah om nak ah kei ka law ba khai. Ashäng shäng ung m’dek chang gui naw kei kä na hmu law ba khai gui, cun ung phi nangmi naw nami na hmuk khai; a i ah kyasei ci ung, Kei ka ghing ci kyasei nangmi phi nami ghing khai.

JOHAN 6:47

Kei naw akcang ka pyein cu, “Kei na yum ciah chang cu angtäi ghin nak gah ci.

JOHAN 6:27

Shekaa thei ciah ah ei awk cu käk tha nah ne, kä shekaa thei ciah, angtäi ghin nak ah ei awk cu tha na vä. Khanpughi naw hlüngtai nak a ap pyi ah kyasei, chang ah Htapa naw cun ah ei awk cu nangmi-am ning pe gui khai nei” cine m’cäi gui ci.

JEREMIAH 32:40

Kei naw ng’täi ciah thukhän cu ngami awn ka bik khai. Ngami ah phäha ah akni ka bi cu kä ka ng’düm phung khai, ami m’lung kyong avan awn ami na kyih aa vai ah kei naw ka bik khai, cun ung ngami naw kei käna ng’hlah tak khai gui.

1 SAMUEL 2:9

Ani naw bekhüt ciah ak chang gui ah hnun gui shungvong ci, Cun ung phi changshe gui cu hmüp khui ung maih ci gui; Chang naw amät ah k’thagui awn näng nak kä gah ci.

ROMAN 5:9

Mikmi cu Jesuh Khrit ah sih nak awn Khanpughi ung mi ng’düng pyi ci kya sei, Khanpughi ah m’lung k’she nak ung a na k’phiawn gui cu ngaih gep vai kyak ci.

JOHAN 6:68

Simon Peter naw, “Bawipa, a u ah om nak ah keimi kami hteh vai ang? Nang Bawipa bäng naw vah angtäi ghin nak ah ng’thu cu na pyein ci.

LUKA 23:46

Bawipa Jesuh cu, “Aw Kapa, Na kut ung Ka Mumcha ka ning ap ci nei” cine m’lau netah kät lawk ci.

JEREMIAH 31:34

A u naw phi Bawipa hmat vai ah mawng apigaw-chang kä theithang khai, a i ah kyasei ci ung a hmaw pikbäih ungka naw ang vaipikbäih ung khüt sei, chang avan naw kei nah mat khai, kei naw ami katnak ka m’geinsei gui khai, ami cheishah nak kä ka shüm ba khai. Kei, Bawipa naw ka pyen nei.”

NG'THU K'THUUK~ 4:18

Düng ciah chang ah hteh nak ah lam cu hni pyü ah mäih ah kyak ci. Dei law pi pi ne hni a luh law güt ung khang ci.

SAM 31:5

Kei cu na na m’htei nak vai ung ka om ci nei. Bawipa, nang naw na na hun khai nei, nang cu bekhüt ciah Khanpughi nei.

MAKUH 13:22

Messiah ah ng’hlawk ci gui la profet ah ng’hlawk ci gui cu, akda ng’dang lawk khai gui nei. Ngami naw ami näng ah a kyak ung Khanpughi naw a ghü ah chang gui hngaw m’hleei m’hlak nak gui hning vai ah cäicat nak gui vai la cäi aih nak gui vai cu m’dang khai gui nei.

ISAIAH 55:3

“Tuhbäi ngai vä, ka chang gui aw, kei ah law vä; kei ah law vä, ghin nak nami gah khai! Kei naw khonglän ciah ka ng’thukhän cu nangmi awn ka bik khai, David ung shai ka tak ah hriham cu ka ning pe gui khai.

ISAIAH 27:3

“Kei naw a shin cu ngäng ne, ak phlüt ah tui awn ka shawi ci. Kei naw amü ak hnüüp ka ngäng ci, cun ah kyasei a i naw, a i ah kä ci hlawt ci.

JEREMIAH 23:4

Nangmi ning m’htei gui khai ah uktu gui cu kei naw ka m’düih gui khai. Kei ah ka chang gui cu kä kyihkyawk ba khai gui, kä cäicat ba khai gui, kei naw kä ka m’kyuk ba gui khai. Kei, Bawipa naw ka pyen ci.”

JOHAN 10:29

Ngami gui kei-am na ap ciah Kapa cu, avan ah hlüngtai pi ci kia ne, a u naw phi cun ah htome gui cu Kapa ah kut ung kaa kä gut hlawt khai.

1 JOHAN 1:2

Cun ah ghin nak mik awn hmuh vai ah a om yah ung mi hmuk ci, ani ah mawng phi mi pyein sak ci. Pa Khanpughi awn a täng ah om ciah ang täi ghin nak cu keimi ah khan ah dang sei, acun ah mawng cu kami pyein ci.