JEREMIAH 9:7 - Cho Bible Common Language 2016

⁷ A shin ah kiasei m’gäi ciah Bawipa naw a pyen cu, “Kei naw ka chang gui cu m’si m’cim ah mäih ah ka m’cim gui khai, ka m’nüm gui khai. Kei ah ka chang gui naw akshe bik ci gui — Kei naw a i ka bi pe gui khai ang?

JEREMIAH 9:7 Referans Kwoze

ISAIAH 1:25

Nangmi ah khan ah hnu ng’tuk ne bi ka bik khai. M’si ng’eek ngeet ah mäih ah kaning ngeet gui khai, kä nami theingthap nak avan ka nawt heng yawp khai.

MALAKHI 3:3

Ani naw ngui ng’ciim khai ah m’cim ah mäih ah m’khoichak khai nei. M’si shep naw ghui la ngui am cim ah mäih ah Bawipa ah ng’shä tüih naw taigü gui cu theing sak gui khai nei, cun ah kyasei ngami naw Bawipa am, ng’düng cicu pe lawk khai gui nei.

JEREMIAH 6:27

Jeremiah, m’si m’nüm ah mäih ah ka chang gui cu m’nüm gui ä, ngami a i ah mäih ah ami kyak teng gui ä.

ISAIAH 48:10

Ngui cu meicang ung m’hling ne m’ciim ah mäih ah nangmi cu khüikha nak ah mei awn ka ning m’nüm gui ci nei. Cun ung phi nangmi a i ah kä nami mawng ci nei.

ZEKHARIAH 13:9

K’pawih ba ciah bum ät cu kei naw ka m’nüm gui khai. Ngui cu mei awn m’ciim ah mäih ah kei naw ka m’ciim gui khai. Ghui m’nüm ah mäih ah ka m’nüm gui khai. Cun kawn ah kei ah ma ah taigü lawk khai gui, kei naw ka m’shang gui khai. Ngami cu ka chang gui ah ami kyak ah mawng kei naw ka m’thein gui khai. Kei cu ami na Khanpughi ah pyen ne ngami cu ng’kiaa lawk khai gui.”

1 PETER 4:12

Ka teihpüi gui aw, nami geinvai nak vai ah ng’hlo ng’ei nak ah m’nüm nak nami khan ah a gawk law ah hmawk ah kä nami cäicat vai, cun gui cu nangmi ah phäh ah ak küikyang ah kä kyak ci.

1 PETER 1:7

Cun ah yaica geinvai nak cu nami yum nak a khän la kä cun ah m’nüm nak ah kyak ci. Didap thei ciah ghui cu mei awn m’nüm ah kiak ci, ghui ah mä küikyang pi ciah nami yum nak cun phi m’nüm vai ah kyak ci, Cun ung vah khän htek nak om sei, Bawi Jesuh Khrit a kyum law ba hnüüp ung m’hlüngtai nak, bämang nak la chang m’sui nak cu nami gah khai.

JEREMIAH 31:20

“Israel, nang cu ka yum pi k’bäihah ka hta, ka m’hni pi k’bäih ah a hmaw ah na kyak ci. Kei naw nang ah ming ka m’dang yah phung ung, na m’hni nak cu ka ngaih-tüh ci. Kei ah ka m’lung cu nang ung gawk sei, kei ung chimgein nak om ci.

2 SHONTÄP NAK 36:15

Ami pupa gui ah Khanpughi Bawipa naw a chang gui m’hting gui khai ah prophet gui cu tüi law gäk ci, a i ah kyasei ci ung ani naw ngami la Taigüim cu gun gui vai ah ng’ya hlük ci.

2 SAMUEL 13:26

Cun ung phi Absalom naw, “Cun ung phi, a i ah akiak ung phi ka phäi Ammon baw tah, na law sak vai! Ghangpughang naw, “Ani a i ah kyasei ang?” cine ng’shik ci.

SAM 55:22

Na khüikha nak cu Bawipa ah ma ah chah ä, ani naw ning shung khai nei; düng ciah chang cu chang hei gui am kä hnim sak gui phung ci nei.

SAM 62:5

Kei cu Khanpughi bäng ung ka ng’yung ci, Khanpughi bäng ka ngaih u ci.

SAM 120:4

Gakap ah ghat ciah m’la ah mäih la asen ah cak ciah mei cak ah mäih ah kyak khai nei.

ISAIAH 59:3

Nangmi cu nami hleei hlak nak, nami kiawi pang nak, nami ngawn pha nak awn nami cheishoh ciah kyak ci.

JEREMIAH 5:1

Jerusalem chang gui, nami lam gui ung dawng vä! Veing ne teng vä! Nami mät ah phäh ah teng vä! Ami sum lei hmun gui ung shui vä! Ng’düng nak bik ciah chang, Khanpughi ung bekhüt vai ah k’tha nak ciah chang, nami hmuh hning khai aw? Nami hmuh ah a kyak ung, Bawipa naw Jerusalem cu m’geisei khai nei.

HOSEA 4:1

Bawipa naw cun ah khaw ung om ciah chang gui cu hnungtuk ne k’bün gui ci, Israel gui ngai vä, ani naw a pyen cu, “Shin ah khaw ung bekhüt nak la m’hni nak kä om ba ci, chang gui naw kei cu Khanpughi ah kä na ngai ba ci gui.