JEREMIAH 50:2 - Cho Bible Common Language 2016

² “Chang pakhui gui am ng’thu m’thein vä! Hmat sak gui vä! m’hnüt nak cu pe ne, ng’thu cu ng’shäu vä! Adüm ah kä nami gim vai nei! Babilon cu ng’kia pyi ci nei! A khanpughi Marduk cu ng’pyäuh pyi ci nei! Babilon ah agup gui cu thüi ng’aa ci gui nei, ani ah shemshai ciah agup gui cu deng pyi ci nei!

JEREMIAH 50:2 Referans Kwoze

ISAIAH 46:1

Shin cu Babilon khanpughi gui ah ng’pyi nak ah kyak ci nei! A zan ung Bel la Nebo cu khawihnah man ci gui, Cun ung phi tuhbäi sela ah phuih vai ah kyak sak ci gui.

ISAIAH 21:9

Ang ghit ah shin ung lawk ci gui nei! Se cun ciah chang gui, hnih ci hnih ci ah. Ngäng ci naw pyen lawkci, “Babilon cu zu ng’kia pyi ci nei! Ami khawihnah ah a gup gui avan cu hnget ne ng’kiam ne m’dek ung ng’zän ci gui nei.”

JEREMIAH 51:47

Cun ah kyasei Babilonia ung agup gui kei naw ka ng’thumcha nak vai ah akhin cu gawk lawk ci nei. Khopäng avan cu lü ng’aa sak ne, a chang avan cu ngawn gui khai gui nei.

JEREMIAH 51:44

Kei naw Babilonia khanpughi Bela cu ka m’kyuk khai, am guuk ah khawh gui a chah vai ah ka cik khai: a u pakhui naw phi kä khawihnah ba khai. “Babilon k’paang gui cu ng’kia pyi ci nei.

THU PHLAAN 18:2

Ani naw m’lau ne Babilon mang gaw cu di pyi ci nei! Di pyi ci nei! Cun ah gawnu cu khawshe gui, mumchashe gui ah om nak, shemshai ciah khoshe gui ah ng’yi nak ah kyak ci nei.

ZEPHANIAH 2:11

Ngami cu Bawipa naw kyih sak gui khai, ani naw khomdek khanpughi gui cu akholä ah kyak sak gui khai. Chang pakhui pang naw ami mät ah khaw phäh phäh ung Khanpughi cu khawihnah khai gui.

JEREMIAH 52:31

Evilmerodak, Babilonia ghangpughang ah a kyak law kum, ani naw Judah ghangpughang Jehoiachin cu m’gein neta apha nak ungka hlawt ba ci. Cun ah a kyak cu Jehoirehin pha ne ami hteh püi kawn ah akum thumkip lei chih nak, a cha gha lei goi nak ah a hnüüp m’ku lei hma nak hnüüp ah kyak ci.

JEREMIAH 51:52

Cun ah kyasei kei naw Babilonia a gup gui ka ng’thumcha nak vai ah hnüüp la khopäng avan ung leimbai ci gui ami ng’hlo-ei nak vai ah hnüüp la khopäng avan ung leimbai ci gui ami ng’hlo-ei nak vai ah hnüüp cu gawk lawk ci nei.

JEREMIAH 51:31

Mang gaw akit päng ung ng’gäi ne a kyak cu ng’shä chang tumat ci naw law gäk gäk ne Babilonia ghangpughang am m’thein lawk ci gui.

JEREMIAH 51:8

Babilonia cu ang ghit ah yung kyak ci, ami m’di ah kyak ci! Acun ah phäh ah thüisei vä! Aleim ah phäh sei shui vä, m’tui ung khan ei hman khai nei.

JEREMIAH 50:46

Babilon ang kyak ah a kyak ung cun ah k’awna khomdek avan thüng sak khai, ami kyah ah k’aw shan gui cu ahei pakhui khaw gui naw ng’yak khai gui.”

JEREMIAH 46:14

“Shin cu Egypt gawnu gui, mikdola, Memphis, la Tahpanhes ung ng’shäu vä: “Nami mät naw nami shung vong ge khai ah om vä; Nangmi ung om ci avan ng’tuk nak ung di khai nei!

JEREMIAH 31:10

Bawipa naw pyen ci, “Pakhui gui, na ngai vä, kei ah ng’thu gui cu ashou nak khaw yung ah shäu vä. Kei ah ng’thu gui cu ka püi sak gui ci, Cun ung phi ka k’bum ba gui khai, Htoshäm naw htome gui a ngäng ah mäih ah ka ngäng gui khai.

JEREMIAH 6:18

Cun ah kyasei Bawipa naw pyen ci, “Ngai vä, nangmi changpakhui gui, ka chang gui ah khan ah a i ah kya lawk khai cicu hmu hmat vä.

JEREMIAH 4:16

Ngami law ne changpakhui gui cu ng’thu k’bäi khai gui, aksho nak khopäng ah ka ga gui ami law ah mawng Jerusalem am m’thein khai gui. Cun ah ga gui naw Judah mang gaw gui hawh shaak ne hnungtuk khai gui.

ISAIAH 48:6

Kei naw ng’dawt ne ka pyen gui avan tukbäi kya law pyi ci: kei ah ka ng’cängbang gui hman ciah tuhbäi nami ng’kia vai. Lawk khai ah a mawng ak thai gui la kä ka m’than pha ah amawng gui cu Tuhbäi kei naw ka ning m’thein gui khai.

ISAIAH 39:1

A cun ah khin ung Babilonia ghangpughang, Baladan ah hta Metudach Baladan naw Ghangpughang Hezekiah a gaw cu ng’ya neta, cala letsawng cu m’khäh ci.

ISAIAH 37:19

ami khanpughi gui cu m’khih gui ci-cun ah kya sei, ngami ung khanpughi kä om ba ci, hnicim chang naw a kut awn a pyan ah sing la lung a gup gui bäng om ci.

ISAIAH 13:2

Tai ciah m’htung lai ung ng’tuk nak alan cu tai vä! Ng’shei ciah mang gaw m’kawt gui tuk vai ah, ngami ah hmawk ah m’hnüt nak ah gakap gui m’lau ne nami kut shäng vä.

ISAIAH 12:4

Chang gui naw ng’äi ami mku nak vaiah hnüüp cu gawk lawk ci nei. “Bawipa cu m’hlüngtai vä! Na m’htei gui khai ah ani cu khü vä! Ani naw abilawh gui cu chang pakhui avan am m’thein vai! Ani a i hlawk ah a dämduh cu m’thein gui vä!

SAM 96:3

Abäimang nak cu pakhui van am m’thein ne, m’gäi ne a hnün thawh nak cu chang van ung ng’shäu vä.

SAM 64:9

Ngami ami van kyihkyawk khai gui; Ngami naw Khanpughi ah bi lawh cu ngai neta, ani ah hnün thawh ah mawng cu pyen khai gui.

SAM 97:7

A gup khawihnah ci gui phung cu lü ng’a ci gui nei, khanpughi gui ami van cu Bawipa ah ma ah kawp ci gui nei.

ISAIAH 48:20

Babilon ung ka hteit vä, phyawng vä! “Bawipa naw a changshäm Israel cu hun pyi ci nei” ci ne, yei ne m’lau vä, kho ng’nü ung hmat sak vä!”

JEREMIAH 4:6

Zion täng ah mang vä! Phyawn vai ah dawng vä! Kä shokshü en vä! Bawipa naw leigai law püi ci nei, a siiptäng ah ka m’dishum nak akdäm gawk lawk ci nei.

JEREMIAH 51:12

Babilonia k’paang tuk vai ah alan cu pe vä. Gaw ngäng ci gui khüighat sak vä! Ng’mah ne ng tuk khai gui tha gui vä!” cik ci. Bawipa naw Babilonia chang gui ah khan ah abi vai a pyen cu bik ci nei.

JEREMIAH 51:27

“Ng’tuk nak vai alan hleek vä, phyung heng tum vä, cun ung pakhui gui naw ng’yak khai gui! Babilonia ng’tuk püi vai ah pakhui gui pawng htein vä! Ararat, Minni la Ashkenaz uk nak khaw gui am ng’tuk vai ah mawng m’thein vä. Ng’tuk ung lam ma khan bawi tumat tha vä. Khanpeh bum gui ah mäih ng’se gui cu law püi vä.

DANIEL 1:2

Bawipa naw ghangpughang Jehoiakim cu ani am pha sak ne, Taigüim ung m’kümcu ani am khäm sak ci. Ani naw thawng kyum amshah gui cu, Babilon ah amät ah khanpughi gui ah pum im ah hteh pui ne ami khäm ah m’küm gui cu pum im ah khawh gim nak ung tha gui ci.

DANIEL 3:14

Ani naw ngami am, “Shadrak, Meshak la Abedneko, kei ah ka khanpughi khawihnah vai ah kei ah ka ng’lin ah ghui gup ah ma ah m’khuk dong vai ah, nami mak ci, cicu akcang ang?

JEREMIAH 10:11

(Nangmi chang gui naw nami m’thein gui vai cu khomdek la khankho mik tui pyang ciah kä kyak ciah khanpughi gui cu m’di vai nei. Ngami cu khomdek khan ung ahawi ah phi kä om tuba khai gui.)

JEREMIAH 10:15

Ngami cu a kholä ah kyak ci gui, päiphi vai ah kyak ci gui; Bawipa naw ngami cu m’kyuk gui khai ah a law ung, ngami cu m’di gui khai.