JEREMIAH 5:31 - Cho Bible Common Language 2016

³¹ Prophet gui naw a i kä pyen ci gui, hleei hlak ci gui; taigü gui naw prophpet gui ah thum khän ah mäih ah uk ci gui, kei ah ka chang gui naw phi kä maa na gui ci gui. Cun ung phi shin gui avan ak hnu hnüüp ung a gawk law ung ngami naw ai bik khai gui ang?”

JEREMIAH 5:31 Referans Kwoze

EZEKIEL 13:6

Ami müimang gui cu ami pyan ah kya ne, ami cängbang gui cu hleei ah kyak ci, Ngami naw kei ah ng’thu pyen ci gui ah pyen ci gui, cun ung phi kei naw kä ka tüi pe gui ci. Cun ung phi ami ng’thu cu bä khai ah ngaih u ci gui!

JEREMIAH 14:14

Cun ung phi Bawipa naw na m’shang ne, “Prophet gui naw kei ah min gung ami hleei pyen ci gui nei, kei naw ngami kä ka tüi gui ci, kei naw a i ng’thu kä ka k’bäi gui ci, ng’thu m’kha ät phi kä ka pyen na gui ci. Ngami naw ami pyen ah muimang cu kei ung ka lawk ciah kä kyak ci; ngami ah cängbang nak gui cu ami ngaih düt akholä ah kyak ci.

MIKHAH 2:11

“Cun ah chang gui naw akbe ah hleei ne thuvi ciah prophet cu ng’ya hlü u neta, ami pyen cu, ‘Kei naw ka ng’cä cu yu la awktat vai gui cu nangmi ah phäh ah long khai nei.’

EZEKIEL 22:14

Kei naw nang ah ka bi yawp kawn ah nangmi ung thamah k’pawih ba khai, nami kut nami chan nak vai ah thagui om ba khai ah nami ngai ne ma? Kei, Bawipa naw ka pyen nei, kei naw na ka ng’thu ka k’pang ci nei.

ISAIAH 10:3

Khanpughi naw aning m’kyuk law gui ung a i ah nami kyak khai ang? Ani naw a khawshou ah ka leigai gui nami khan ah a law püi ung a i ah nami kyak khai ang? M’hteihtang nak hmuh vai ah a hawi nami dawng khai ang? Nami khawh cham gui a hawi nami thup khai ang?

THULÄÄN NAK 32:29

A i ah kyasei ami hniim gui cu, Ngami naw kä hmu hning ci gui. A i ah kya lawk ci, cicu ngami naw kä hmat ci gui.

MIKHAH 2:6

Chang gui naw kei ah ma ah ng’thu ami pyen cu, “Keimi ah khan ah thu kä pyen ä, cun ah amawng gui kä pyen en ä. Khanpughi naw keimi cu kä na m’thüi gui khai nei.

NG’ÄI KYAH 2:14

Na prophet gui naw a i ami ning m’thein vai kä om ci. Cun ung phi hleei hlak ci gui. Nami katnak kä hnungtuk en phung ne, ami ng’thu pyen naw ning hleei hlak sak gui ci. Ng’yu ba vai kä hlü ci, ciah nami ngaih vai ah acun gui naw ning ci gui ci.

NG’ÄI KYAH 1:9

Ani ah kä ng’gängsei nak cu ayäi ah hmuh vai kyak ci. Cun ung phi amät ah m’nü nak cu ani naw kä dang sak ci. Ani ah yung kyak nak cu kyih vai kyak ci, a u naw kä shungvong hlawt ci. Aga gui naw näng u sei, ani cu Bawipa naw ak chimgein vai ah kyap ci.

ISAIAH 33:14

Zion ung shekak ciah chang gui cu kyi ne ng’hlet u sä. Ngami naw, “Khanpughi ah ng’thumcha nak cu mei ah mäih ah kya ne angtäi sei ui ci nei. Acun ah mäih ah mei ung ka, mikmi mi k’pawih hning khai aw?”

ISAIAH 20:6

Cun ah khim a gawk law ung, Philistia tui kam yung ah am ciah chang gui naw, ‘Assiria ghangpughang ah kut ung ka na shungvong gui khai ah mikmi naw mi ngaih u gui ah chang gui ah khan ah, a i ah kya lawk cicu teng tu vä! A i hawkcha ghing ne mi k’pawih ba khai aw?’” cik ci gui.

MIKHAH 3:11

Mang gaw uktu gui naw, khawh la ne uk ci gui, taigü gui naw pek vai ah thukhän m’than ci gui, prophet gui naw ngui ami gah vai ah phäh ah cängbang ci gui — cun ung phi ami van Bawipa naw om püi gui ciah pyen ci gui. Ngami naw, “Akshe keimi ung kä gawk lawk khai, Bawipa keimi awn om ci” cik ci gui.

ISAIAH 43:27

Nami pupa htük gui cu hma kak ci gui; Nami ng’vahta gui naw kei na hnung’tuk püi ne hmak ak ci gui,

ISAIAH 47:7

Nang naw angtäi sei, ghangpughang ah na kyak khai ah na ngai ci, shin gui cu nang naw na m’lung ung kä na tha ci, shin gui avan ng’pyi khai ciah phi kä na ngaih tüh ci.

JEREMIAH 12:4

Kami khaw cu a i güt ung chawng ne, lolai päng ung khu mghaw gui cu a i güt ung ng’yai khai gui ang? Kami chang gui ah shetkat ah phäh ah khisa gui la kha gui cu sik ci gui nei. Cun gui cu kami chang gui ah katnak ah phäh ah kyak ci, Cun ah chang gui naw, “mikmi ah bilawh cu Khanpughi naw kä hmuk ci nei” cik ci gui.

JEREMIAH 26:7

Taigüim kyong ah shin gui kei naw ka pyen cu Taigü gui, prophet gui la chang avan naw ng’yak ci gui,

NG’ÄI KYAH 4:13

Cun ung phi cun cu kya tukcang ci, a i ah kyasei ci ung, ani ah prophet gui cu shekha u ne, ataigü gui cu cheishoh u ne, chang k’ni gui ah sih nak vai ah mawng ah kyak ci gui.

NG’ÄI KYAH 4:18

Ga naw na ngäng gui ci, mikmi lam ung phi kä mi hteit hton hning ci. Mikmi ah hnüüp gui cu ng’phlan pyi ci, khaw ang pyi nak cu gawk lawk ci.

HOSEA 4:9

Nangmi phi chang gui ah mäih ah m’kyuk nak ung nami yaica khai. Kei naw ning m’kyuk gui ne kat nak nami bi nami thung vai ah ka ning ci gui khai.

HOSEA 6:10

Israel khaw ung kyihkyawk vai kyak ci cu, kei naw ka hmuk ci. Ka chang gui naw agup khawihnah u neami mät naw ami mät lelawi sak ci gui.

HOSEA 9:5

Bawipa m’tamkhah nak vai ah pawi bi nak vai ah akhin a gawk law ung ngami naw a i bik khai gui ang?

THULÄÄN NAK 32:20

“Kei naw kä ka m’hteihtang ba gui khai, cine ani naw pyen ci. Cun ah linglai ne kä bekhüt ciah chang gui ah khan ah a i ah kya lawk ci, cicu kei naw ka hmuk khai.

1 GHANGPUGHANG GUI 22:6

Ahab naw prophet phia phli cu khü gui ne, ng’shi gui ci, “Kei naw Ramoth cu hteit ne ka tuk vai aw, kä ka tuk vai aw?” Ngami naw, “Na tuk vai nei, Bawipa naw näng nak ning pek khai nei.”

NG'THU K'THUUK~ 17:4

Changshe gui naw akshe ah mawng cu ngai ci gui, hleei hlak ci gui naw hleehlak ah mawng cu ngai ci gui.

EZEKIEL 13:10

“Prophet gui naw avan bä lawk khai nei cine, ka Chang gui cu m’hleei hlak ci gui. Avan cu akchang ah kä bä lawk ci! Kei ah ka chang gui naw lung kä htek khai ah pang pyang u sei, prophet gui naw law ne thung bawk awn hluk ci gui.

ZEPHANIAH 3:4

Prophet gui cu a i kä bik ci gui, hleeihlak ci gui, taigü gui naw thu theing cu m’shet u ne, Khanpughi ah thukhän cu amimät ah ng’thu awn k’caw ci gui.