JEREMIAH 5:21 - Cho Bible Common Language 2016

²¹ Ngai vä, gu ang she khak ciah chang gui, nami mik on sei kä nami hmu hning ci, nami hnga om sei kä nami ng’ya hning ci.

JEREMIAH 5:21 Referans Kwoze

EZEKIEL 12:2

“Hnicim Chang, nang cu ng’kuknet ciah chang gui ah ng’lung ah na om ci. Ngami cu ami mik om sei phi, a i kä hmuk ci gui; ngami cu ami hnga om sei phi, a i ka ng’yak ci gui, a i ah kyasei ci ung ngami cu ami küknet ah phäh ah kyak ci.

LAMKTU 28:26

Cun ah am dang cu; “Nang cu Judah chang gui ah ma ah hteit netah, ‘Nangmi naw ngai ne, ngai ne, phi kä nami hmat khai; Teng ne, teng ne phi kä nami hmuk khai” cine kyak nak gui vai.

ROMAN 11:8

Cacim theing ung, “Khanpughi naw cun ah chang gui ah m’lung k’hnga cu aung ang sak gui ci, tuhngawi güt ung ngami cu a i kä hmu ng’ya thei ci gui.

JOHAN 12:40

“Khanpughi naw ami mik m’dauh sak gui ne ami m’lung khai pe gui ci nei, Cun ah kyasei, ami mik naw a i kä hmuk ci, ami m’lung naw a i kä hmat ci nei, Kei naw ka gai sak gui vai ah Kei ah om nak ah a u phi kä law ba ci nei, cine Khanpughi naw pyein ci” ciah guk ci.

JEREMIAH 4:22

Bawipa naw pyen ci, “Kei ah ka chang gui cu anglam ci gui; ngami naw kä na hmat ci gui. Ngami cu gu ciah a hmawhta gui ah mäih ah kyak ci gui; ngami ung hmuhmat nak kä om ci. Ngami cu akshekha bi nak ung bi thei aih ci gui, cun ung phi akni bi nak ung shum ci gui.

MAKUH 8:18

Nami mik om lang sei kä nami hmuk ci ma? Nami hnga om lang sei kä nami ng’yak ci ma?

JEREMIAH 8:7

Zong ciah khaw gui naw phi ami law ba nak vai ah akhin hmat ci gui. Müm gui, va m’chawng gui la ngamzawk gui naw phi ami lum nak vai ah akhin cu hmat ci gui. Cun ung phi ka chang gui, nangmi naw kei naw ka ning uknak gui ah thukhän cu kä nami hmat ci.

JEREMIAH 5:4

Kei naw ka ngai ci, “Shin gui cu dukhaih ci la a i kä hmat ciah kyak ci gui. Ngami cu akgu k’ang ah om ci gui; Ami Khanpughi naw a i athäh, ami Bawipa naw a i ami bi vai angyak hlü cu ngami naw kä hmat ci gui.

ISAIAH 44:18

Cun ah chang gui cu aang aih u ne a i ami bi cu kä hmat ci gui. Düng nak kä ami hmuh vai ah ami mik m’shing ne, ami m’lung khai ci gui.

SAM 94:8

Ka chang gui aw, a i hlawk ah shin ah nami gu-ang ang? A i sangung nami theithang lawk khai ang?

ISAIAH 27:11

Sing ghing guiah ami ng’ban gui cü chawng ne hnet sei, hnumi gui naw mei ah cih vai ah lak ci gui nei. A i ah kyasei ci ung chang gui naw a i kä hmat ba ci gui, Tüisho gui ciah khanpughi naw kä m’gein gui khai, chimgein nak api phi kä m’dang gui ci.

NG'THU K'THUUK~ 17:16

Chang gu ang naw ca ng’thei nak vai ah phah ah ngui a mang cu ka nik ci, a i ah kyasei ci ung ani ung ng’yak hlü nak ka om ci.

THULÄÄN NAK 32:6

Nang naw Bawipa na om ih püi cu a shik cha ah ma? Nang chang gu taak, chang awng ang, Ani cu nami pa, ning tüisho gui ci. Ani naw changpakhui ah ning pyang gui ci.

THULÄÄN NAK 29:4

Cun ung phi avan nami bui awt gui cu tuhngawi güt ani naw nangmi am kä ning hmuh sak gui ci.

HOSEA 7:11

Israel chang gui cu a i ah kä mawng ciah mümkha ah mäih ah kyak ci gui. Akhtük bäih ah a chang gui naw m’htei gui khai ah Egypt cu khü ci gui. Cun kawn ah Assiria ah dawng ci gui.

JEREMIAH 10:8

Ngami ami van cu awng ang gu k’taak ci gui nei. Sing ami pyan ah agup gui ung ami ng’thei thang vai a i om khai ang?

MAKUH 4:12

A i ah kyak sei ci ung; “Ngami cu teng ne phi kä hmuk ci gui, Ngai ng’ya ne phi kä hmat ci gui, Ami teng cu hmu u ne, Ami ng’yak cu hmat u ne, ami kyak vai sü ung, Khanpughi lam ah ng’hlat lawk khai sü gui te, Cun ung ngami ah katnak phi m’gein gui khai sü te, Ci ah cacim ung om ci” cine m’thein gui ci.

ROMAN 1:20

Khanpughi naw shin ah khomdek khan a tüi pyan ung tün ne ani ah ng’täi ciah kä hmuh hningah hlüngtai nak la Khanpughi ah a kiak nak ah ang yung cu chang gui naw ang dang ah hmuk hmat ci gui. Cun ah ami hmuhmat cu Khanpughi ah tüi pyan gui ami hmuhmat nak awn ah kya ci. Cun ah kyasei chang gui cu ami katnak ah hmawk ah kä küi hlawt ci gui.

ISAIAH 43:8

Khanpughi naw pyen ci, “Ka chang gui cu yung ah k’thäh gui vä. Ngami cu ami mik om sei phi m’dauh ci gui; Ami hnga om sei phi pang ci gui nei!

JEREMIAH 5:20

Bawipa naw pyen ci. “Jakob ah htangshon gui m’thein gui ä, Judah chang gui m’thein gui ä:

JEREMIAH 6:10

Kei naw ka m’shang ci, “Kei naw ngami ng’thu püi gui ne, ka m’cäi gui ah a kyak ung a u naw kei na ngai khai ang? Ngami cu m’lung liing u ne nang ah thu ngaih vai ha mak cu gui nei; kei naw ka pyen vai ah na na m’thein cu ngami naw gaih tuk ci gui nei.

ZEKHARIAH 7:11

“Cun ung phi ka chang gui naw ma ne ng’thu kä ngai ci gui, ngami naw ami m’lung khai ci gui.

THULÄÄN NAK 29:3

Nangmi naw Bawipa naw abi gui cu nami hmuk khai. Kyih she ciah leigai gui, cäi aih vai gui, la dämduh ciah cäicat vai gui,

JEREMIAH 7:13

Nangmi naw shin ah katnak gui avan nami bik ci, kei naw leng ba ba ne ning thu püi gui ngä sei phi ma ne kä nami ngai ci. Kei naw ka ning khü gui ung nangmi naw kä nami m’shang ci.