JEREMIAH 4:22 - Cho Bible Common Language 2016

²² Bawipa naw pyen ci, “Kei ah ka chang gui cu anglam ci gui; ngami naw kä na hmat ci gui. Ngami cu gu ciah a hmawhta gui ah mäih ah kyak ci gui; ngami ung hmuhmat nak kä om ci. Ngami cu akshekha bi nak ung bi thei aih ci gui, cun ung phi akni bi nak ung shum ci gui.

JEREMIAH 4:22 Referans Kwoze

1 KORIN 14:20

Phäinau gui aw, ak hmawhta gui ah mäih ah kä nami kyak vai nei; ak hmawhta gui ah mäih ah shetkat nak phiawn tah u ne, ang vai pyi ah mäih ah nami ngaih-tüh vai.

ROMAN 16:19

Nang mi naw Thu Ni cu a i hlawk ah nami m’lung ung nami khän htek sak cu chang avan naw hmat ci nei. Cun ah kya sei nang mi ah hmawk ah ang htei ah ka yei ci. Nang mi cu ni kyom nak hmat ne lunglang ciah chang ah kya u ne, shetkat nak phiawn nak ciah nami kyak vai ah ka ng’ya hlük ci.

JEREMIAH 5:21

Ngai vä, gu ang she khak ciah chang gui, nami mik on sei kä nami hmu hning ci, nami hnga om sei kä nami ng’ya hning ci.

ROMAN 3:11

Akcang ah hmuhmat ciah chang tumat phi kä om ci, Khanpughi khawihnah ciah chang tumat phi kä om ci.

HOSEA 4:6

Kei ah ka chang gui cu ng’yiin ci gui. A i ah kyasei ci ung ngami naw kei cu a i ah kü na ngai ci gui. Nami taigü gui naw kei ami na shüm vai ah na ngai ci gui, kei ah m’theithang cu hnungtuk ci gui, acun ah kya sei, kei naw ning hnungtuk gui ne, nami hta gui cu ka taigü gui ah kä ka ngai gui khai.

ROMAN 1:22

Ngami naw ami mät cu hmuhmat ci gui ah ami pyein ung phi, akcang ah a i kä hmuhmat ci gui ah kyak ci:

HOSEA 5:4

Chang gui naw akshe ami bi nak naw Khanpughi ah ami ng’hlah law ba nak vai cu shungshet ci. Agup khawihnah nak naw huham mah ne k’pang gui ci. Ngami naw Bawipa kä shüm hmat ba ci gui.

JOHAN 16:3

Ngami cu Kapa phi kä hmat ci gui, kei phi kä na hmat ci gui ah kia ne, acun ah bik khai gui nei.

MIKHAH 2:1

Ang yän nak ung akshe ah ngaih-tüh neta, khaw a thaih law ung a cun akcang ah bik ciah chang gui cu katnak om ci. Cun cu a i hlawk ah ng’yiin khai aw?

THULÄÄN NAK 32:28

Israel gui cu langkha nak om bät ci. Kä om ciah pakhui, Ngami ung cüivai nak kä om bät ci.

ROMAN 1:28

Cun ah chang gui cu Khanpughi kä shüm hmat u khätah, Khanpughi naw shekat nak ung nawng gui sei, kä a khin kä ak khaa ah kya lawk ci gui.

JEREMIAH 13:23

Asa le naw avun cu ng’thawng sak hning ne ang? Kawng hta naw a git ng’plon sak hning ne ang? Cun gui ami kyak hning ah a kyak ung akshe gui cu angdüng ah kya thei khai gui nei.

ISAIAH 27:11

Sing ghing guiah ami ng’ban gui cü chawng ne hnet sei, hnumi gui naw mei ah cih vai ah lak ci gui nei. A i ah kyasei ci ung chang gui naw a i kä hmat ba ci gui, Tüisho gui ciah khanpughi naw kä m’gein gui khai, chimgein nak api phi kä m’dang gui ci.

JEREMIAH 10:8

Ngami ami van cu awng ang gu k’taak ci gui nei. Sing ami pyan ah agup gui ung ami ng’thei thang vai a i om khai ang?

ISAIAH 1:3

Seipat gui naw a u naw aka nak gui cu hmat ci gui, ng’sela gui naw ami mah naw a vuh gui mawng hmat ci gui. Cun gui cu ka chang Israel gui ah ta hmat pi ci gui nei. Ngami cu a i phi kä hmat ling ci gui” cik ci.

JEREMIAH 5:4

Kei naw ka ngai ci, “Shin gui cu dukhaih ci la a i kä hmat ciah kyak ci gui. Ngami cu akgu k’ang ah om ci gui; Ami Khanpughi naw a i athäh, ami Bawipa naw a i ami bi vai angyak hlü cu ngami naw kä hmat ci gui.

LUKA 16:8

Cun ah theileh ne a bilawh ah hmawk ah kä ng’düng cih changvai cu amang naw m’hlüngtai ci. A i ah kyasei ci ung khomdek chang gui cu, khomdek khan ah mawng bilawh nak ung akdei ah hta gui ah mä ami theileh pi ah hmawk ah kyak ci.

HOSEA 4:1

Bawipa naw cun ah khaw ung om ciah chang gui cu hnungtuk ne k’bün gui ci, Israel gui ngai vä, ani naw a pyen cu, “Shin ah khaw ung bekhüt nak la m’hni nak kä om ba ci, chang gui naw kei cu Khanpughi ah kä na ngai ba ci gui.

THULÄÄN NAK 32:6

Nang naw Bawipa na om ih püi cu a shik cha ah ma? Nang chang gu taak, chang awng ang, Ani cu nami pa, ning tüisho gui ci. Ani naw changpakhui ah ning pyang gui ci.

2 SAMUEL 13:3

Cun ung phi ani ung akshe ah lunglang aih ciah ateihpüi tumat om ci, ang ming cu Jonadab ah kyak ci, ani cu David ah phäi Shammah ah hta ah kyak ci.

SAM 36:3

Ani ah ang thu cu ng’thu she ah kya ne, hleei nak awn be ci; Ani naw cüivai nak la nikiom nak cu kä bi ba ci.

SAM 53:4

Khanpughi naw, “Shin ah akshe bik ci gui, a ik cang kä hmat u ne ma? Ka chang gui ah kaa, gut ne ei ci gui, kei ah phi kä taigü man ci gui nei” cik ci.

SAM 82:5

“Nangmi cu a i hlawk ah nami awng, a i hlawk ah nami ang ci ang! Nangmi cu nami di yawp ci, Düng nak cu khomdek khan ung ng’kawn ne maih pyi ci.

JEREMIAH 2:8

Taigü gui naw, ‘A hawi ang Bawipa?’ cine kä ng’shi thäh ci gui. Kamät ah taigü gui naw kä na hmat ci gui. Uk tu gui naw na hnungtuk püi ci gui; Prophet gui naw Baal ah ming ung thu pyen u ne, akholä ah kyak ciah a gup cu khawihnah ci gui.

JEREMIAH 4:21

Kei naw a i güt ami ng’tuk ka hmuk khai ang, phyungheng gui ah ng’gin a i güt ka ng’yak khai ang?

JEREMIAH 9:3

Ngami cu akphlüt ah hleei pyen ge vai ah om ci gui; Düng nak ah hnün ung kä ng’düng nak gui naw kho uk ci. Bawipa naw pyen ci, “Ka chang gui naw akshe cu tumat ng’pyi sei tumat bik ci gui, kei ami na Khanpughi ah käng kiaa man ci gui.”

EZEKIEL 16:30

Shin cu uktu Bawipa ah pyen ah kyak ci: “Nang naw shin gui avan cu kä ng’aca ciah pletbeng Chang ah mäih ah na bik ci.

AMOS 3:10

Bawipa naw, “Shin ah chang gui naw ami im nu gui cu, sheka cheishoh ne ami gah ah khawh awn be sak ci gui. A i hawkcha ah chang na ne om vai cu kä hmat ci gui.

ATÜNNAK 39:16

Hnumi naw Joseph ah suinu cu, a bawi ami im ah a law ba güt ung gim ci.

SAM 36:4

A ih ng’zän nak ung phi akshe bäng ngaih-tüh ci; Akni phung a i kä bik ci; akshe phung kä hnu nak ci.

NG'THU K'THUUK~ 28:5

Changshe gui naw taga nak ah mawng kä hmat ci gui, Cun ung phi Bawipa kawihnah ci gui naw, akni ah hmat ci gui.

JEREMIAH 9:2

Bungpuk ah ka düm nak vai ah hmun ka ng’ya hlük ci, cu ah kei cu ka chang gui ungka ka hteit hning khai. Ngami ami van cu kä bekhüt ci gui, ng’gang ne shuk ci gui.

JEREMIAH 9:5

Ngami ami van naw ami teihpüi gui lam h ma sak u ne, a u naw a hman kä pyen ci; Ngami naw ami m’lei cu hleei nak m’thei u ne, ami katnak cu kä nawng hlawt ci gui. Ngami naw ngawn pha nak tumat kawn ah tumat bi u ne, hleei hlak nak tumat cu ahei tumat naw läk law ba ci. Bawipa naw pyen ci, ani ah a chang gui naw ani cu hnungtuk ci gui.

MIKHAH 7:3

Akshe bi vai ah chang van theileh ci. Bawi gui la suki gui naw m’cümhnah nak thäh ci gui. Ang vaipi naw ang yak hlü pi thäh ci, ngami naw atäng ah bum ci gui.