JEREMIAH 33:5 - Cho Bible Common Language 2016

⁵ Am shah gui naw Babilonian gui cu ng’tuk püi khai gui, ngami naw im gui cu kei naw ka m’lungshe nak la ka nget ngawng nak awn ka ngawn sheh gui ah a hook gui awn be sak khai gui. Kei naw shin ah mang gaw cu ka ng’hlah tak ci, a i ah kyasei ci ung awn ung om ciah chang gui naw akshe ami bi ah phäh ah kyak ci.

JEREMIAH 33:5 Referans Kwoze

ISAIAH 8:17

Bawipa naw akchang gui ung ka, amät naw amät cu ng’thuh sak ci, cun ung phi kei naw ani ngaih u ne, ka ngaih u nak cu ani ung ka tha ci.

JEREMIAH 32:5

Zedekiah cu Babilonia ah hteh püi khai gui, kei naw kä ka om püi pha ah chuih ani cu a ra om khai. Ani naw Babilonian gui cu a tuk gui ung phi kä näng hlawt khai. Kei Bawipa naw ka pyen nei.”

JEREMIAH 21:10

Shin ah mang gaw cu kä m’düm ne m’di vai ah kei naw ka m’lung ung ka k’bäi pyi ci. Shin cu Babilonia ghangpughang am ap vai, ani naw m’dek ung khüt khai ah m’khih khai. Kei, Bawipa naw ka pyen ci nei.”

MIKHAH 3:4

Bawipa ah nami ng’paa nak vai ah a khin gawk lawk ci, cun ung phi ani naw kä ning m’shang gui khai. Akshe nami bik ci kyasei nami taigü cu kä ngai khai.

ISAIAH 64:7

A u phi taigü ne nang ah kä ng’hlat lawk ci; a u phi nang naw na m’htei vai ah kä hteit ci. Keimi kami hmakat ah phäh ah, nang naw na na nawng gui ci, kei mi ung ka na ng’thup ci.

THULÄÄN NAK 31:17

Cun ah a kyak law ung ngami ah khan ah kei cu ka m’lung she khai; kei naw ka nawng gui khai, ngami cu dishum khai gui. Kyih vai ah leigai akda ami khan ah gawk lawk khai, cun kawn ah ngami naw hmat lawk khai gui, shin gui ngami ah khan ah a kyak law cu, kei, ami na Khanpughi naw kä ka om püi ba gui ah hmawk ah kyak ci, ciah hmat khai gui.

EZEKIEL 39:29

Kei naw Israel chang gui ah khan ah ka mümcha cu ka yuk chah khai, kä ka ng’hlah ta ba gui phung khai. Kei uktu Bawipa naw ka pyen nei.

JEREMIAH 18:17

Kei naw ka chang gui cu ami ga ah ma ah kiang khokhi naw m’vut a zon ah mäih ah ka püi sak gui khai. Kei naw ngami ka hnu na gui khai; leigai a law ung kei naw kä ka m’htei gui khai.”

THULÄÄN NAK 32:20

“Kei naw kä ka m’hteihtang ba gui khai, cine ani naw pyen ci. Cun ah linglai ne kä bekhüt ciah chang gui ah khan ah a i ah kya lawk ci, cicu kei naw ka hmuk khai.

JEREMIAH 42:18

Bawipa, Israel khanpughi naw pyen ci, “Kei ah ka m’lungshe nak la ka nget ngawn nak naw Jerusalem chang gui a shawi gui ah mäih, Egypt ah nami hteh ung läi nami khan ah ka nget ngawng nak naw ning shawi gui khai nei. Nangmi ui a teng she ah nami kyak khai; Chang gui naw ning giah m’gin gui ne, nami ming cu plah taam nak ah mang khai gui. Nangmi naw shin ah hmun cu kä nami hmu tu ba khai.”

NG’ÄI KYAH 2:7

Bawipa naw a sonkiang cu hnungtuk ne theingcim ciah Taigüim cu ng’gau sak ci. Acun ah paang gui cu ga gui naw ami gäi vai ah ani naw bi sak gui ci. Ayanä mikmi naw yei ne mi khawihnah nak man ung ngami cu näng nak awn m’lau ci gui.

THULÄÄN NAK 31:18

Cun kawn ah kei naw ka m’hteihtang gui vai ah ka mak khai, a i ah kyasei ci ung ngami cu akshe bi u ne, a hei khanpughi gui khawihnah ci gui.