JEREMIAH 30:18 - Cho Bible Common Language 2016

¹⁸ Bawipa naw pyen ci, “kei naw ka chang gui cu ami khaw ung ka ka m’tho ba gui khai, kyong khui päng ah khan ah Chimgein nak om khai; Jerusalem cu cawh ba vai, amang im cu m’thawh ba vai.

JEREMIAH 30:18 Referans Kwoze

SAM 102:13

Nang cu tho ne, Zion mang gaw cu m’gein law ä; Ani na m’gein nak vai ah khin cu gawk lawk ci; shin cu a khin ni pi ah kyak ci nei.

JEREMIAH 30:3

a i ah kyasei ci ung kei naw ka Chang gui Israel la Judah gui ka m’thawk nak ba gui vai ah akhin cu gawk lawk ci nei. Kei naw ngami cu ami pupa gui am ka pek gui ah khaw ung ka law püi ba gui khai, ngami naw cun ah khaw cu kaa na ba khai gui. Kei, Bawipa naw ka pyen nei.”

JEREMIAH 33:7

Kei naw Judah la Israel cu ka bühmang sak gui khai, a zan kaa ah mäih ah ka cokyan ba gui khai.

JEREMIAH 49:39

Cun ung phi angawi ah Elam chang gui cu ka ng’büh mang ba sak gui khai. Kei, Bawipa naw ka pyen ci.

JEREMIAH 23:3

Kei naw ka püi pyang sak nak gui ah khaw ung k’pawih ba ciah ka chang gui cu kei naw ka ng’bum ba sak gui khai, cun kawn ah ami khaw ung ka law püi ba gui khai. Ngami ung ami hta nau da khai, chang phi da lawk khai gui.

ZEKHARIAH 1:16

Cun ah kyasei ka m’gein nak ka m’dang khai ah Jerusalem mang gaw ah ka lawk ci nei. Ka Taigüim cu m’thawh ba vai, ka mang gaw phi cawh ba vai nei.”

JEREMIAH 46:27

“ka chang gui, kä kyi vä, Israel chang gui kä cäicat vä. Cän ah shou ciah khaw, thawng nami kium nak ah khaw ungka, kei naw ka ning gung gui khai nei. Nangmi cu im ah law ba ne ding gei sei nami om khai; nangmi cu ngaih gep ne nami om khai, a u naw kä ning kyihkyawk sak gui khai.

JEREMIAH 49:6

“Cun ung phi kei naw Ammon cu ka bühmang ba sak khai nei, Bawipa naw ka pyen nei.

ISAIAH 44:26

Cun ung phi kei ah ka chang shäm naw cängbang nak abi ah a kyak ung, kei ah ka pawng püi gui m’than khai ah ng’shächang ka tüih ah a kyak ung. Cun ah pawng püi nak gui la cängbang nak gui cu akcang ah kyak khai ah kei naw ka bik ci. Kei naw ka m’thein gui ci. Jerusalem ung chang gui om ba khai gui, Judah mang gaw gui co ba khai gui. Cun ah mang gaw gui cu didam nak ung ka, Tho law ba khai gui.

JEREMIAH 31:4

Hnü ät mä kei naw ka ning cokyang ba gui mä khai. Hnü ät mä nangmi naw nami thing sheei tum ne yeikyai ne nami ng’lamba mä khai.

JEREMIAH 33:11

Zeikiai nak, hüithaw nak, hta m’um pawi ung yeikyai nak gui nami ng’zaba khai. Chang gui naw m’hlüngtai douthak nak kei ah Taigüim ah law püi ne ng’äi ami m’cu cu nami ng’yak khai; Ngami naw pyen khai gui, ‘M’gäi ciah Bawipa cu m’hlüngtai vä, a i ah kyasei ci ung ani cu nik ci, am hni nak cu ng’langtäi ci.’ Kei naw shin ah khaw cu a cau kaa ah mäih ah bühmang khai ah ka pyang khai, kei, Bawipa naw ka pyen nei.

1 SHONTÄP NAK 29:19

Na thumkhän nü nü m’lung kyong avan awn ng’yak nak hlü la shin ah kei naw ka pawng püi awn Taigüim cawh nak vai cu ka htapa Solomon am yuk pe law ä.”

JEREMIAH 29:14

Ä, kei naw ka pyen ci, nangmi naw nami na hmuk khai, kei naw nami khaw ung ka ning chah ba gui khai. Kei naw ka ning püi pyang sak nak gui ah khopäing nü, khohmun nü ungka ka ning bum ba sak gui khai, cun kawn ah kei naw omktu ah ak ning tüih nak gui ungka nami khaw ung ka ning law püi ba gui khai. Kei, Bawipa naw ka pyen ci.’

ISAIAH 44:28

Kei naw Sairus cu ka pyen nak ci, ‘Nang naw kei ah phäh ah na uk khai nei; Kei naw ka ning bi sak hlü cu nang naw na bik khai nei. Jerusalem cawh ba vai la Taigüim ah angnei k’süm vai ah, nang naw ng’thu nak’bäi vai nei.’”

JEREMIAH 31:38

Bawipa naw pyen ci nei, “Jerusalem mang gaw cu akhei täng Hananela Tänghän ung ka naw Akit m’kawt ung khüt sei Jerusalem avan cu kei ah mang gaw ah cawh ba nak vai ah akhin cu gawk lawk ci nei.

JEREMIAH 31:23

M’gäi ciah Bawipa, Israel khanpughi naw pyen ci, “kei naw chang gui cu ami khaw ung ka m’thawh ba gui ung, Judah khaw la gaw nu gui ung ngami naw pyen bam ä khai gui, ‘Theingthap ciah khomhtung Jerusalem, Theingcim ciah hmun a om nak cu Bawipa naw hriham pe sä!’

ZEKHARIAH 12:6

“Cun ah a khin ung Judah pakhui cu bung ah mei ah mäih, lai htang gong chawng ui ciah mei ah mäih ah ka pyang khai — cun naw a pei ng’leng ah pakhui gui avan cu m’di khai. Jerusalem chang gui cu mang gaw kyong ah phyawng ne om khai gui.

SAM 78:69

A cu ah ani naw ak Taigüim co ci, cun cu khankho ah a im ah mäih ah kyak ci, cun cu khomdek ah mäih ah m’düih ne, angtäi sei khän sak ci.

NEHEMIAH 7:4

Jerusalem cu mang gaw däm ah kyak ci, cun ung phi akyong ah chang akda kä om ci, im gui phi akda kä cawh pha ah kyak ci.

SAM 85:1

Bawipa, na ng’lei khaw cu nak chimgein ci nei; Israel chang gui cu na bämang ba sak gui ci nei.

ZEKHARIAH 14:10

Khaw ng’lei avan a siiptäng Keba ungka naw, a htumtäng Rimmon ung khüt khai ah pingtei sa khai. Jerusalem cu khaw avan ah khan tänghän ah kyak khai; Mang gaw cu Benjamin m’kawt ungka naw m’kiungtung m’kawt ung khüt ci, cun cu yanä m’kawt man ah kyak ci. Hananela tänghän ungka naw mang ah sapyit neen nak ung khüt ci.

JEREMIAH 31:40

Aksi gui ami phuh nak la ng’awt ami gawh nak ah khong nawi la kidron tuihta ah ahan khan khobung avan, ak kyang täng ng’se m’kawt ung khüt cicu kei ah phäh ah a theingcim hmun ah a kyak khai. Mang gaw cu a u naw phi ka shu sheiuh kä m’di m’shum ba khai.”

1 SHONTÄP NAK 29:1

Ghangpughang David naw chang hli avan ah ma ah thu ang ng’shäu cu, “Kei ah ka hta Solomon cu khanpughi naw a ghü tumat ah kyak ci, cun ung phi ani cu nong sang ci kya ne a hmuhmat nak ken ci. Abi vai ah bii cu dämduh aih ci, a i ah kyasei ci ung cun cu chang ah phäh ah mang im ah kä kyak ci, Bawipa Khanpughi ah phäh ah Taigüim ah kyak ci.

SAM 48:3

Cun ah mang gaw ah chaam kyong ah ani awn om ung phyawn nak om ci, cicu Khanpughi naw m’dang ci nei.

SAM 48:13

k’pang gui cu m’htei ne teng ne, gaw chaam gui phi teng kheng vä, cun ung vah hta ng’shon ung nami pyen ba hlawt khai;

SAM 122:7

Na pang ah kyong ah dimdeeih nak om sä, na mang im kyong ah phyawn nak om sä.”

JEREMIAH 29:11

Nangmi ah phäh ah ka m’hnüt bäi cu ka mät bäng naw ka hmat ci, Cun ah m’hnüt bäi cu nami bühmang nak vai ah kyak ci, leigai ah kä kyak ci, ngawi ah nami ngaih u rai law püi ciah m’hnüt bäi ah kyak ci.

JEREMIAH 32:15

M’gäi ciah Bawipa, Israel khanpughi naw im gui, lo gui la sapyit lo gui cu shin ah khaw ung hleih bam ä vai nei, cine pyen ci.

EZEKIEL 36:11

Kei naw chang gui la sei m’na gui cu ka da sak gui khai. Nangmi cu acau kaa ah ta nami da pi khai, nami hta nau gui phi da khai. Nangmi nami om man ah acu ah ka ning om sak ba gui khai, acau kaa ah bä pi khai ah ka ning bühmang sak gui khai. Cun ung nangmi naw kei, Bawipa ah nami na hmat khai.

AMOS 9:14

Kei naw ka chang gui cu ami khaw ah ka law püi ba gui khai. Ngami naw di ciah ami mang gaw gui co ba u ne, om ba khai gui. Ngami naw sapyit gui geit u ne, sapyit tui awk khai gui; Ngami naw dum bi u ne a cun ung ami geit ei khai gui.

ZEKHARIAH 1:12

Khankho chang naw, “M’gäi ciah Bawipa, nang cu Jerusalem la Judah mang gaw gui ah khan ah tuhbäi güt khawkum chihkip ung na m’lungshe ci nei. Nam’gein nak gui na m’dang vai cu khaw a i güt sho ba khai ang?” cine ng’shik ci.

ZEKHARIAH 12:7

“Kei, Bawipa naw, Judah gakap gui am näng nak ka pe gui ma khai. Cun ah kyasei David ah htangshon la Jerusalem chang gui naw ami gah vai ah m’tamkhah nak cu k’pawih ba ciah Judah gui ah mä kä däm pi khai.

SAM 102:14

Na changshäm gui naw ani cu m’hni ci gui, cun ung phi ani cu di pyi ci; Ngami naw ani cu m’gein ci gui, cun ung phi ani she pyi ci.

JEREMIAH 32:44

Chang gui naw khleih khai gui, cun gui cu ming guk vai, m’hnüt vai, saksi om khai. Cun gui cu Bangamin khopäng, Jerusalem ah pei yung ah pigaw gui, Judah ung gawnu gui, khomhtung yung ah gawnu gui m’htung nawi gui la Judah khaw a htum täng yung ah kyak khai. Kei naw chang gui cu ami khaw ung ka m’tho ba gui khai. Kei, Bawipa, naw ka pyen nei.”