JEREMIAH 29:13 - Cho Bible Common Language 2016

¹³ Nangmi naw nami na shui khai, nami na hmuk khai, a i ah kyasei ci ung nangmi naw nami m’lung kyong avan awn nami na hmuk khai.

JEREMIAH 29:13 Referans Kwoze

SAM 119:2

Yeikyai nak om ci gui cu a thumkhän läk ne, am lung kyong avan awn ani yum ci gui ah kyak ci.

MATTHE 7:7

‘Ng’yoi vä nami gah khai, shui vä nami hmuk khai, kshoh cu khäk vä ning hmawn pe gui khai.

SAM 119:10

Ka m’lung kyong van awn na khut bi vai ah ka tha nak ci nei; Na thumkhän ka läk nak hning vai ah na kutshum ä.

JEREMIAH 24:7

Ngami am kei Bawipa ah ka kyak ah ami hmat nak hlü cu ka pe gui khai. Cun kawn ah ngami cu kei ah chang ah kyak khai gui, kei cu ngami ah khanpughi ah ka kyak khai, a i ah kyasei ci ung ngami cu ami m’lung kyong avan awn kei ah ng’hlat law ba khai gui.

JOEL 2:12

“Cun ung phi tuhbäi, Bawipa naw pyen ci, Ei hlawi nak la thüi kyah nak awn, M’lung neim sak ne ng’yuu ba ne, kei ah ng’hlat law ba vä.

SAM 91:15

Ami na khü ung ka m’shang gui khai. Ami geinvai yah ung ka om püi gui khai. Kei naw gung gui ne, ka m’taam gui khai.

SAM 119:145

Ka m’lung kyong avan awn ka ning khü ci nei; Bawipa, na m’shang ä, Na thumkhän cu kei naw ka läk khai nei!

2 SHONTÄP NAK 31:21

Ani cu näng m’khüt ci, a i ah kyasei ci ung Taigüim ah phäh ah abi nak nü ung, la thukhän läk nak ung, ani cu mümcha awn akbe ah bi ne, Khanpughi ah bekhüt ne ang ziihnei ah phäh ah kyak ci gui.

SAM 119:58

Na shaitak ah mäih ah na na chimgein vai ah ka m’lung kyong avan awn ka ning yoi ci nei!

2 SHONTÄP NAK 22:9

Ahaziah cu läk ne shui neta Samaria ah ng’thup sei hmuk ci gui. Ani cu Jehu ah om nak ah hteh püi u neta ngawn ci gui. Ngami naw ani ah gook cu, abi nak hning avan awn Bawipa ah bii bik ciah a pughi Jehoshaphat ami chang m’sui nak awn k’phuh ci gui. Ahaziah ah kyongkhui chang ung uknak khaw uk ba hning khai a u kä om ci.

2 GHANGPUGHANG GUI 23:3

Ani cu mang ah k’tung pei ah ng’düi neta, ani läk khai pyen ne Bawipa ung thukhän bik ci, ang thukhän gui k’pang ne, amlung ngaih gui avan awn ang thumkhän gui yum ne, ca uk ung ami guk ah thukhän gui cu akcang ah ka bik khai ci sei, chang gui ami van naw thumkhäm cu k’pan vai ah shaitak ci gui.

HOSEA 5:15

“Kei naw ka chang gui cu ami kat nak awn ng’büh ne yaica u ne, law ne kei ami na shui law güt ung kei naw ka nawng gui khai. Ngami ami yaica law ung kei ami na shui vai ah k’tha na lawk khai gui nei.”

SAM 119:69

Chang ah ng’shei ci gui naw kei ah mawng cu hleei ne pyen ci gui, cun ung phi ka m’lung kyong avan awn na m’shüm thein nak cu ka läk ci nei.

JEREMIAH 3:10

Shing gui avan ah kawn ah Israel ah kä bekhüt ciah anau Jodah cu ng’she ne kei ah law ba ci, ani cu amlung kä theing ci, kei Bawipa naw ka pyen nei.”

1 GHANGPUGHANG GUI 2:4

Nang naw na ngaih ah a kyak ung, Bawipa naw abi ah shaitak cu k’pang khai, ani naw ana pyen nak cu, kei ah ka htang’shon gui naw ami m’lung kyong m’lung ngaih avan awn ani ah thumkhän cu bekhüt ne, geing na ne ami läk ah chuih Israel cu uk khai gui nei.

SAM 32:6

Cun ah kyasei, na changnigui cu, ami ng’yak hlü ah khin ung taigü khai gui nei. Tuinu ng’güüt ne a law, law ung phi, kä k’pha gui khai nei.

LAMKTU 8:36

Ngah ni cu hteit gäk gäk ni netah tui ah om nak ah gawk lawk ci gawi. Cun kawn ah cun nah bawi naw, “Shin yah ung tui om ci, tui kä kang hnim cang vai ah na shung shet ciah mawng a i om ne ang?” ci neh ng’shik ci.

1 SHONTÄP NAK 22:19

Tuhbäi na Bawipa Khanpughi ah bii cu na m’lung kyong avan na ghin nak avan awn na bi vai. Taigüim cawh vai cu tuhbäi na k’tün vai, cun ung nang naw Bawipa ah Thukhän M’küm la khawihnah nak ung mang ah a hei theingthap ci avan cu nang naw cun ah kyong ah na tha hning khai” cik ci.

1 SHONTÄP NAK 28:9

Cun kawn ah Solomon a pyen nak cu, “Ka hta aw, kei naw ka ning bi sak cu, na pa ah Khanpughi cu yum ne, na m’lung naw ng’ya hlü ne kä ng’pai ciah m’lung ngaih awn abii na bi vai. Ani naw mikmi ah ngaih-tüh la ng’yak hlü avan hmat ci. Nang ani ah na hteh ung ani naw ning dou khai; cun ung phi nang naw nang hlah tak ung, ani naw khonglän ung ning nawng khai.

ISAIAH 45:19

Kei naw m’zih ne thu kä ka pyen ci, ka ng’bü nak phi kä ka thup ci. Israel chang gui naw a khaw shiu ah kei ami na shui vai ah kä ka k’thäh man ci. Kei cu Bawipa nei, düng ciah thu ka pyen ci nei; kei naw hman ci cu ka ng’hmat sak ci nei.”

SAM 145:18

Ani naw ani khü ci gui la m’lung neim nak awn khü ci gui cu k’et gui ci.

ISAIAH 65:10

Ngami naw kei cu na khawihnah khai gui, ngami naw ami htome gui la ami seipat gui cu akhei täng ung sharon dou ung, ak kyang täng ung khüikha khong nawi ung ami lum vai ah lam shüm khai gui.

JEREMIAH 50:4

Bawipa naw pyen ci,” Cun ah khin a gawk law ung Israel la Judah gui ami van kyap u ne, kei, ami na khanpughi cu na shui khai gui.