JEREMIAH 17:13 - Cho Bible Common Language 2016

¹³ Bawipa, nang cu Israel gui ah ngaih u ah na kyak ci; Nang ning nawng ciah chang avan cu lü ng’aa nak ung gawk khai. Ngami cu m’vut ung guk ah ming ah mäih ah maih khai gui. A i kyasei ci ung Tuici lawng ah na kyak ciah nang Bawipa ami ning nawng ah phäh ah kyak ci.

JEREMIAH 17:13 Referans Kwoze

THU PHLAAN 7:17

A i ah kyasei ci ung mangkiaang ah lai ung om ciah Htomehta naw, ngami cu ngung gui ne, ghin nak tui k’gei ah khawng nak ah khah püi gui khai. Khanpughi naw phi ngami ah mik ungka ng’phli tui phung cu ghu pe gui khai” cine pyein ci.

THU PHLAAN 22:1

Khankho chang naw kei-am ghin nak tui ah lon nak ah tuinu phi na m’hnuh ci. Cun ah tuinu cu k’pyülung ah mäih ah vai ne, Khanpughi ah Htomehta ah mang kiaang ungka mang gaw ah gaw ng’lung lam nu ung yu long vük ci.

JOHAN 4:14

cun ung phi kei ah pei tah tui awk cicu a ngawi ah phi tui kä gha ba khai. Cun ah tui cu ani ah m’lung kyong ung ghin nak tui gei ah khawng ne long ne, ani-am angtäi ghin nak cu pek khai” cik ci.

JOHAN 4:10

Bawipa Jesuh naw, “Nang naw Khanpughi ah m’gein nak la, tuhbäi tui ning ng’yoi cicu na hmat vai sü ung, ani ah ghin tui gei cu nang yoi khai sü te, ani naw phi cun ah tui cu ning pek khai süte” cik ci.

THU PHLAAN 21:6

Ani naw leng ba mä ne, “Bi ng’pyi ci nei, kei cu Alpha la Omeka, tün nak la khüm nak ah ka kyak ci, tui gha ciah chang-am ghin nak ah tui cu alä ah ka awk sak khai.

ISAIAH 1:28

Cun ung phi shekak ci la ani hnu ng’tuk püi ciah chang phung cu ani naw güüt khai. Ani nawng ciah chaung päng cu, ani naw ngawn khai.

LUKA 10:20

A i gaa phi nami khan ah gawk lawk khai, cun ung phi khoshe nami m’khüt näng ah phäh ah kä yeikyai vä, khankho ah nami ming guk pyi ah phäh ah yeikyai vä” cik ci.

JEREMIAH 14:8

Nang bäng cu Israel gui ah ngaih u ah na kyak ci; nang bäng cu lei gai ung na hun gui ciah na kyak ci. Nang cu a i ah kyasei mi kho ung khin ah mäih ah mü ät bäng ip tuk ciah lam hteit khin ah mäih ah na kiak?

THU PHLAAN 20:15

Ghin nak ca-uk ung ang ming kä ng’gu tuk ciah chang gui phung cu cun ah meidäi ung yuk shum gui yawp ci gui.

ISAIAH 66:5

Bawipa naw a pyen cu ngai vä, ani kyih aa ci gui la angthu ngai ci gui: “A i ah kyasei ci ung nangmi cu kei ung nami bekhüt ci, nami mät ah chang amshah naw ning gen gui ci, ngami cu nangmi awn a i phi kä bi ghawn khai gui. Ngami naw ning m’lep gui ne ami pyen cu, Bawipa naw a dämduh nak m’dang ne ning hun gui sä, cun ung nang mi yei uk ci sei kami ning hmu gui khai.’ Cun ung phi ngami amät cu lü ng’aa khai gui nei.

SAM 73:27

Nang ung ng’shawng ne om ci gui cu nang naw na m’di gui khai; nang ung kä bekhüt ci gui cu nang naw na m’di gui khai.

JEREMIAH 2:13

Cun cu ka chang gui naw katnak hnih ami bi ah phäh ah kyak ci: Ngami naw tui ci lawng ah ka kyak ciah kei cu na ng’hlah tak ci gui, ngami naw tuihlüng co ci gui. Cun cu teek ciah tuihlüng ah kya ne a i tui phi kä ng’tang ci.

JOEL 3:16

Zion m’htung khan ah ka naw Bawipa ng’hawh ci; ak aw cu Jerusalem ungka hmum kyeek lawk ci; Khomdek la khomik ng’thüng ci. Cun ung phi ani naw a chang gui shungvong gui khai.

JEREMIAH 2:17

Israel, nang naw shin cu na mät ah khan ah na law püi ci! Kei naw lam anglät ung lam ka ning m’shüm gui yah ung na Khanpughi Bawipa, kei cu na na nawng ci.

THU PHLAAN 22:17

Mumcha Theing la Ceimah khai ah ng’laamihta naw, “Law ä” cik ci goi. Cun ah ng’thu ng’yak ciah chang nüng naw phi, “Law ä” ci ne pyein sä, Tui gha ciah chang cu law sä, ghin nak ah tui ng’ya hlük ciah chang phung naw a lä ah dou sä!

1 TIMOTHI 1:1

Mi Hunbawi Khanpughi la mi ngaih u Jesuh Khrih ah m’hnüt nak awn Bawi Khrih ah düih püi ah ka kya ciah kei Paul naw —

LAMKTU 28:20

Cun ah kyasei nangmi awn ng’hmuh vai ah ka k’tha nak ah kya ci. Kei shin ah m’si gui, gui awn ami na khih cu, Israel chang gui naw, mi ngäng ah Bawipa ah hmawk ah kyak ci” cine pyein ci.

DANIEL 12:2

Si pyi ciah chang gui akda cu ghing ba khai gui, amshah cu angtäi ghin nak ung yeikyai khai gui, amshah cu angtäi thüisei nak ung yaica khai gui.

EZEKIEL 36:32

Israel, kei naw nami hmat vai ah ka ng’yak hlü cu, kei naw shin gui shi nangmi ah phä ah ka bi ah kä kyak ci nei. Kei naw ka ng’yak hlü cu nami bilawh ah phäh ah nami thui hmai lüng’aa vai ah kyak ci nei. Kei, uktu Bawipa naw ka pyen nei.”

EZEKIEL 16:63

Nang naw na bi ah cheishoh nak avan cu kei naw ka ning geinsei khai. Cun ung phi cun gui cu nang naw shüm ba neta, na shai kä na m’aan ah phi nang aa aih khai.” Uktu Bawipa naw a pyen nei.

JEREMIAH 17:17

Kei ah phäh ah kyih vai ah kä kya en sä; khüikha nak a gawk law yah ung kei ah phiawn nak hmun ah na kyak ci.

JEREMIAH 17:5

Bawipa naw pyen ci, “Kei na ng’hlah tak ci gui cu kei naw ka m’kyuk gui khai, ngami cu hnicim chang ngaih u u ne, she thei ci k’thagui nak ci gui.

NG'THU K'THUUK~ 14:14

Changshe gui naw ami mat ah shetkat nak gah ci gui, Changniguio naw ami mat ah om ih awn m’cümhnah nak gah ci gui.

NG'THU K'THUUK~ 10:7

Changnigui cu shüm gui vai. Cun cu phyuhtheh nak ah kyak ci, changshe gui cu ang ghit ah m’hnih gui vai kyak ci.

SAM 97:7

A gup khawihnah ci gui phung cu lü ng’a ci gui nei, khanpughi gui ami van cu Bawipa ah ma ah kawp ci gui nei.

SAM 22:4

Kami pupa gui naw ning ngaih u ci gui; Ning ngaih u, u se, na hun gui ci.

SAM 71:5

Uk ciah Bawipa, nang cu ka ning ngaih u ci nei; ka hmaw yah ung tün ne nang ung ka ng’ap ci nei.

JEREMIAH 17:18

Kei na dukdeiu nak ci gui ah khan ah thüisei nak law püi ä. Cun ung phi Bawipa, kei cu nak pawih na ä. Ngami cu kyihkyawk nak awn be sak gui ä, cun ung phi kei cu kä na kyihkyawk sak en ä. Ngami ah khan ah leigai law püi ne, akhui k’pii ah kyak sak gui ä.

JEREMIAH 19:4

Kei naw shin ah ka bi lawk khai a i ah kyasei ci ung chang gui naw kei na nawng u ne ahei khanpughi gui am khawihnah nak ami douthak nak awn shin ah hmun cu lelawi sak ci gui. Cun ah khanpughi gui cu ami mät ami pupa gui la Judah ghangpughang gui a u naw phi kä a hmat ah kyak ci. Ngami naw shin ah hmun cu changnigui ah si awn be sak ci gui,

JEREMIAH 50:7

Ngami cu hma gui ci ami van naw ami tuk gui ah kyak ci. Ami ga gui naw, “Ngami cu Bawipa hnung tuk püi ne hmakak ci gui, cun ah kyasei mikmi naw mi bi cu kä hma ci. Ami pupa gui Bawipa ngaih u ci gui, cun ah kyasei ngami ami mät phi ani ung ami bekhüt vai ah kyak ci.’

EZEKIEL 13:9

Muimang pyan ne, kä bä ciah ng’cängbang ciah prophet gui nangmi cu kei naw ka ning m’kyuk gui khai nei. Ka chang gui naw m’hnüt bäi vai ah ami ng’bum nak ung nangmi kä name om tuk khai nei; Israel pahta chang gui ah ming guk nak ung nangmi ah ming kä k’boih tu vai nei; nangmi cu name khaw ung kä name law bap hung khai nei. Cun kawn ah nangmi naw kei cu Uktu Bawipa ah name nah mat khai nei.

ZEKHARIAH 9:12

Law ba vä, ami k’täm ah chang gui, Tuhbäi nami ngaih u vai om ci nei; Phyawn nak ah nami hmun ung law ba vä. Tuhbäi kei naw ka ning m’thein gui cu, Nami geinvai nak avan ah khan ah, a goi ah hriham ka ning pe gui khai nei.

ZEKHARIAH 13:1

Hlüngtai ciah Bawipa naw, “Cun ah khin a gawk law ung David ah htangshon la Jerusalem chang gui ah shekat nak la hmühma nak cu m’si nak vai ah tuilawng cu ng’hmawng lawk khai.

SAM 69:29

Kei cu m’neh m’awh ne ka gein vai ci; O Khanpughi, na zu chang ne, na hun ä!