JEREMIAH 13:23 - Cho Bible Common Language 2016

²³ Asa le naw avun cu ng’thawng sak hning ne ang? Kawng hta naw a git ng’plon sak hning ne ang? Cun gui ami kyak hning ah a kyak ung akshe gui cu angdüng ah kya thei khai gui nei.

JEREMIAH 13:23 Referans Kwoze

JEREMIAH 2:22

Nang cu aktung pikbäih ah satpia awn na ng’si ung phi, nang ah katnak cu dang sei ka hmuk ci nei.

JEREMIAH 9:5

Ngami ami van naw ami teihpüi gui lam h ma sak u ne, a u naw a hman kä pyen ci; Ngami naw ami m’lei cu hleei nak m’thei u ne, ami katnak cu kä nawng hlawt ci gui. Ngami naw ngawn pha nak tumat kawn ah tumat bi u ne, hleei hlak nak tumat cu ahei tumat naw läk law ba ci. Bawipa naw pyen ci, ani ah a chang gui naw ani cu hnungtuk ci gui.

JEREMIAH 17:9

“Hnicim chang ah m’lung ngaih cu a u naw hmat hning khai aw? Cun cu thuvi theileh aih ci nei. Chang ah m’lung hnga ung m’tui ne kä m’khüt vai ah natnak om ci.

JEREMIAH 5:3

Akcang ah Bawipa naw bekhüt nak cu shui ci nei. Ani naw ning m’gein gui sei phi nangmi naw a i ah kä nami ngai ci; ani naw ning deng gui sei phi, nami ng’thei vai ah nami mak ci. Nangmi cu nami m’lung liing sei, nami katnak ungka kä nami ng’hlat law ba ci.

JEREMIAH 2:30

Kei naw ka ning m’kyuk ci, cun ung phi cun cu kä nik ci; nami ng’düng vai ah kä nami n apian sak ci. Nget ciah phongkawng ah mäih ah nang naw na prophet gui cu na ngawn ci.

ISAIAH 1:5

A i ah kyasei nangmi naw nami hnu ng’tuk püi lä ang? Nangmi naw m’kyuk nak nami ng’ya ba hlü mä ne ma? Israel gui, nami lu cu hmaleim bäng ah kyak ci, nami m’lung la ngaih cu gaw pai pyi ci nei.

NG'THU K'THUUK~ 27:22

Nang naw chang a gu ang a sih ü awng güt na m’ghuih ung phi, ani ah gu ang nak cu ani ungka maih khai ah kä na m’ghuih hlawt khai.

JEREMIAH 4:22

Bawipa naw pyen ci, “Kei ah ka chang gui cu anglam ci gui; ngami naw kä na hmat ci gui. Ngami cu gu ciah a hmawhta gui ah mäih ah kyak ci gui; ngami ung hmuhmat nak kä om ci. Ngami cu akshekha bi nak ung bi thei aih ci gui, cun ung phi akni bi nak ung shum ci gui.

1 SAMUEL 19:21

Saul naw cun ah mawng cu ng’ya neta, chang akda pi tui ba gui ci, ngami phi ng’lam ne m’lau ne kya tuk ci gui. Ani naw a thum nak ah chang gui tüiba gui ci, ngami phi acun ah mäih ah kya tuk ci gui.

2 GHANGPUGHANG GUI 17:40

Cun ung phi cun ah chang gui naw kä ngai ci gui, ngami naw cau ami thungyo cu läk lä ci gui.

THUSHÄUTU 1:15

Ng’koi cicu kä nami ng’düng sak hlawt khai; kä om cicu kä nami khei hlawt khai.