JEREMIAH 13:18 - Cho Bible Common Language 2016

¹⁸ Bawipa naw na pyen nak ci, “Ghangpughang la anu cu m’thein goi vä, ami mang kiang ungka kyum law u sä, a i ah kyasei ci ung ngami ah kyom ciah lukhu cu ami lu ungka kya law pyi ci nei.

JEREMIAH 13:18 Referans Kwoze

JEREMIAH 22:26

Kei naw nang la na nu cu omktu khaw ah ka nung k’täm lawk khai. Nangmi cu kä nami ng’tüi nak ah nami hteit lawk khai, nami van acu ah nami sik khai.

2 GHANGPUGHANG GUI 24:12

Ghangpughang Jehoiachin, anu, a hta gui, a bawi gui la mang im ung bawi gui ami van cu Babilonian gui ah ka ah ng’dawkphah ci gui. A uknak a kum cheit nak ung Nebukhadnezzar naw Jehoiachin cu thawng ung chum ci,

2 GHANGPUGHANG GUI 24:15

Nebukhadnezzar naw Jehoiachin cu pha ne Babilon ah hteh püi ci, Jehoiachin ah anu, akchu gui, a bawi gui, Judah ung tängpang ci gui avan cu hteh püi gui ci.

2 SHONTÄP NAK 33:19

Ghangpughang ah ak taigü la acun Khanpughi ah m’shan nak, ani kä ng’yu ba pha ung katnak abi gui-ani naw akshe a bi, Khogam Khawihnah nak ah hmun gui, ani naw a pyan ah khanpughinu Asherah ah gup la ani ah khawihnah ah a gup gui-cun gui a van cu prophet gui ah mawng ca-uk ung guk ah kyak ci.

ISAIAH 47:1

Bawipa naw pyen ci, “Babilon, na mang kiang ung ka kyum law ne, m’dek khan ah m’vut ung ngo ä. Ayanä nang cu ng’lami hta ah mäih ah a u naw kä a tuk man ah mang gaw ah na kyak ci, Cun ung phi nang cu kä na awigi hniphnoi ba ci! Tuhbäi nang cu khlei-htein ah na kyak ci!

2 SHONTÄP NAK 33:12

Ani cu yaica neta amlung neim sak ne, Bawipa a Khanpughi ah ng’hlat law ba ne, am htei vai ah ng’pa nak ci.

1 PETER 5:6

Khanpughi ah hlüngtai säih ciah a kut kaa ah nami mät naw nami mät ng’neim sak ne om vä, cun ung Khanpughi naw ni pi ciah akhin ung ning yu chang gui khai nei.

JAMES 4:10

Bawipa ah ma ah nami m’lung neim sak vä, cun ung ning m’hlüngtai gui khai nei.

MATTHE 18:4

Shin ah ak hmaw ah mäih ah am lung thawng ne neim sak ciah chang cu khankho uknak ung ak hlüngtai pibäih ah kyak ci.

JONAH 3:6

Nineveh ghangpughang naw cun ah mawng cu ng’ya neta, Mangkyang ungka tho law ne, a suinu suut ne, m’vut ung ngok ci.

ISAIAH 3:26

Mang gaw m’kawt gui cu kyap ne ng’pyang khai gui, mang gaw amät cun phi m’dek ung akplui ah ngok ciah hnumi ah mäih ah kyak khai.

2 SHONTÄP NAK 33:23

Cun ung phi ani cu apa ah mäih ah kä kya ne, amlung kä neim sak ci, Bawipa ah kä ng’hlat law ba ci, ani cu apa ah däm pi ci ah katnak bik ci.

PHYAWN NAK 10:3

Cun ah kyasei Moses la Aaron naw ghangpughang ah hteit ni neta ng’thu ani pyen cu, “Bawipa, Hebru gui ah Khanpughi ah ng’thu cu kei ah na ng’paa law nak vai cu a i güt na mak khai ang? Ka chang gui cu hteh sak gui ä, cun ung ngami naw na khawihnah khai gui nei.

NG’ÄI KYAH 2:10

Jerusalem ung aghi ng’vai gui m’dek ung adüm ah ngok ci gui, Ami lu cu m’vut bäng ah kyak ci. Ami pum ung suishe sui ci gui. Hnumi nong gui naw ami lu awn m’dek ung kawp ci gui.

PHYAWN NAK 39:28

lupawng, lukhu, linen chi tawi,

NG'THU K'THUUK~ 27:24

A i ah kyasei ci ung khawh cu kä ng’täi ci, changpakhui gui phi ng’täi ne kä om ci gui.

ISAIAH 3:20

la ami lukhu gui phi lak pe gui khai; ban la khei ung ami nak ah cecai nak gui;

JEREMIAH 29:2

Kei naw shin ah ca cu Ghangpughang Jehoiachin, anu, mang im bawigui, Judah la Jerusalem angvai gui, Shep pyaing ci gui, la bii bi thei ci gui, omktu ah ami hteh püi guikawn ah ka guic nei.

JEREMIAH 36:16

Ani naw a phat kawn ah, ngami cäi u ne ng’teng tu u neta, Baruk cu pyen nak ci gui, “Keimi naw shin cu ghangpughang am kami m’thein khai.”

NG’ÄI KYAH 1:6

Jerusalem ah bämcam nak cu ng’pyi khän ciah tumat ah kyak ci. Ani ah ang vai gui cu ei cawi ne aktha maih ciah kigang ah mäih ah kyak ci gui. Ngami cu sakap ah kut ung ami phiawn ah mäih ah ami thagui cu maih yawp ci.

NG’ÄI KYAH 1:9

Ani ah kä ng’gängsei nak cu ayäi ah hmuh vai kyak ci. Cun ung phi amät ah m’nü nak cu ani naw kä dang sak ci. Ani ah yung kyak nak cu kyih vai kyak ci, a u naw kä shungvong hlawt ci. Aga gui naw näng u sei, ani cu Bawipa naw ak chimgein vai ah kyap ci.

NG’ÄI KYAH 5:16

Keimi kami khähghah nak ungka, a i phi kä k’pawih ci nei. Keimi cu hmaka u ne tuhbäi kami ng’yiin ci.

EZEKIEL 16:12

Hna ung naak la hnga ung naak gui la kyom ciah lukhu phi ka ning pek ci.

EZEKIEL 21:26

Kei, uktu Bawipa naw ka pyen ci. Na mang lukhu la na lupawng cu suut ä. A i phi yän ä kaa ah mäih ah kä kya ba khai. Dukhaih ci gui cu huham pek gui vai, uktu gui cu yuk chak gui vai!

EZEKIEL 24:17

Na hngääk cu a u naw kä ning za en sä. Thüi kyap ciah mäih ah lukä pawng ne phahnak kä ng’leh ne, kä na hteh hton vai. Na hmai kä na shung vai, thüikyap ciah ei ah mäih ah ei kä na ei vai.”

EZEKIEL 24:23

Nangmi cu nami lu kä pawng ne, phahnak kä ng’cum ne kä nami hteit khai, kä nami thüi khai, kä nami kyap khai. Nangmi cu nami katnak ah phäh ah kyung u ne, tumat ah ma ah tumat nami ng’hlo ng’ei khai.

EZEKIEL 44:18

Cun ah kyasei ngami cu kä m’hu gui khai ah linen lupawn awn pawng u ne, linen chi sak khai gui, khei kä pat khai gui.

DANIEL 5:20

Cun ung phi ani cu chang ah ng’shei ne, am lung ling ne, m’ghämce law khäta, bawi mang kiang ungka m’hnawn u sei, m’tam nak ah hmun cu hteh tak ciah kyak ci.

JEREMIAH 22:24

Bawipa naw ghangpughang Jehoiachin Judah ghangpughang cu pyen nak ci, “Kei cu ghing ciah khanpughi akcang ah ka kyak ah mäih ah nang ka k’pat täng ung ka naak ah m’hnüt ah kut cüp ah na kyak ung phi, kei naw ka nang cu ning suut ne