JEREMIAH 12:14 - Cho Bible Common Language 2016

¹⁴ Bawipa naw pyen ci, “ka chang Israel gui am ka pek gui ah khaw m’di ci gui ah Israel gui ah pei leng ah ka gui am kei naw ka pyen nak gui vai amawng om ci. Sing ghing ang yung ah mawih ah mäih ah cun ah changshe gui cu kei naw ami khaw ungka ka la gui khai, kei naw Judah gui cu ngami ungka ka gung gui khai.

JEREMIAH 12:14 Referans Kwoze

ZEKHARIAH 2:8

Nangmi ning ng’tuk püi gui ci cu, kei ah ka, aknipikbäih ng’tuk püi ciah kyak ci” cik ci. Cun ah kyasei M’gäi ciah Bawipa naw shin ah ng’thu na m’kan ne, a chang gui m’di ciah pakhui gui ah om nak ah ana tüih ah kyak ci.

JEREMIAH 3:18

Israel cu Judah awn ng’dawn ne, khaw ah a siiptäng om k’tu khaw ah ka law u ne, nami pupa gui am angtäi sei ami kaa nak vai ah ka pek gui ah khaw ung lawk khau gui.

JEREMIAH 49:7

Shin cu Edom ah mawng m’gäi ciah Bawipa naw a pyen ah kyak ci; “Edom chang gui naw nik ciah ami m’kheicha nak gui maih sak u ne ma? Ngami m’shüm thein ciah chang gui naw a i bi vai cicu kä m’thein ba gui u ne ma? Ami cüivai nak avan cu maih yawp ne ma?

JEREMIAH 2:3

Israel gui, kei bäng naw nangmi ka ning ka na gui ci; Nangmi cu theingcim ciah kei ah ka ah nami kyak ci. Kei naw nangmi ning natsak gui ciah chang nü ah khan ah, yai ca nak la leigai ka tui lawk khai, Kei, Bawipa naw ka pyen ci.

SAM 106:47

O Bawipa kami Khanpughi, na hun gui ä, chang khuihei gui ah ng’lung ungka na k’plawk ba gui ä, cun ah kyasei keimi cu yeikyai ne, nang ming theing kami m’taam khai.

THULÄÄN NAK 30:3

Bawipa nami Khanpughi naw ning chimgein gui khai. Ani naw a ning püipyang sak nak gui ah chang gui ah khaw ungka naw ning law püi ba gui khai. Cun kawn ah ning bühmang sak ba gui khai.

ZEKHARIAH 1:15

Zeikyai ding gei ciah pakhui gui ah khan ah anghtei ah ka m’lungshe ci nei. A i ah kyaseici ung kei naw ka chang gui ah khan ah ka m’lungshe nak ka m’dang law vai ung, cun ah pakhui gui naw, ka chang gui ani geinvai vai ah akshe ah bik ci gui nei.

HOSEA 1:11

Judah chang gui la Israel chang gui cukawng ät ba khai gui. Ngami naw ami mät ah phäh ah ng’vaihta tumat ghü khai gui. Ngami cu ami khaw ung geit kaw u ne, bühmang ba khai gui. Ä! Jezreela ah hnüüp cu dämduh ciah hnüüp ah kyak khai!

EZEKIEL 37:21

m’thein gui ä, kei, uktu Bawipa naw, ka chang gui cu ami hteh nak ah changpakhui gui ungka ami van ka la ba gui khai, atäng ah ka bum ba gui khai, ami mät ah khaw ah hteh püi ba gui khai nei.

EZEKIEL 36:24

Kei naw nangmi am m’lung akthai, ngaih akthai ka ning pe gui khai. Kei naw lung ah liu ciah nami m’lung liing cu ning lak pe gui ne, beik ng’yak nak ah m’lung cu ka ning pe gui khai.

EZEKIEL 28:25

Uktu Bawipa naw pyen ci, “Israel chang gui cu kei naw ka püipiang sak nak gui ah changpakhui ungka kei naw ka law püi ba gui khai, cun ung changpakhui avan naw kei cu ka theingcim ciah hmat khai. Israel chang gui cu ami mät ah khaw ung om khai gui, cun ah khaw cu kei naw ka changshäm Jakob am ka pek ah kyak ci.

JEREMIAH 48:1

Shin cu Moab ah mawng m’gäi ciah Bawipa naw a pyen ah kyak ci: “Nebo chang gui cu m’gein gui vä — Ngami ah gaw nu cu di pyi ci nei! Kiriathaim cu tu ne khäm ci gui, m’gäi ciah amang pang cu gäi ci gui, achang gui cu lü ng’aa ci gui nei;

JEREMIAH 32:37

Kei naw ka m’lungshe nak la ka nget ngawn nak awn ka püi pyang sak nak gui ah khopäing aran ungka chang gui cu ka k’bum ba gui khai nei. Cun kawn ah kei naw dimdeeih nak awn law püi ba gui ne shin ah khaw ung phyawng ne ka om sak gui khai.

SAM 105:15

“Ka ghü ah ka changshäm gui cu kä nami hnim gui vai; ka prophet gui cu kä nami tawn en vai.”

THULÄÄN NAK 28:63

Bawipa naw nangmi cu nami bühmang vai ah ning pyang gui ne, nami da vai ah ning pyang gui ne a yeikyai ah mäih ah nangmi ning m’di gui ne nami khan ah dishum nak vai law püi ne, yeikyai khai. Nami khäm vai ah khaw ungka ka ning mawi ba gui khai.

JEREMIAH 48:47

Cun ung phi lawk khai ah hnüüp gui ung Bawipa naw Moab cu bühmang ba sak khai nei. Shin gui avan cu Moab ah khan ah kya lawk khai gui Bawipa naw a pyen ah kyak ci.

JEREMIAH 49:1

Shin cu Ammon ah amawng Bawipa naw a pyen ah kyak ci: “Israel chang gui a hawi ang? Ami khaw ghung khai a u kä om ne ma? A i ah kyasei kat pakhui gui ah khopäng cu molek khawihnah ci gui am khäm sak gui na ami om sak gui ang?

JEREMIAH 25:9

‘Kei naw a siiptäng ah chang gui avan la ka changshäm Babilonia ghangpughang Nebukhadnezzar cu ka tüi lawk khai. Judah gui la khaw mah gui cu hnungtuk ne tu u ne, ami pei leng ah khochang pakhui avan hnungtuk khai gui cu kei naw ka law püi khai. Kei naw shin ah pakhui la a pei leng ung ka gui cu ka m’di lawk khai, khonglän ung dii khai ah ka nawng khai, hmuk ciah chang cu cäicat ne ng’hlet khai. Kei, Bawipa naw ka pyen nei.”

EZEKIEL 28:26

Ngami acu ah phyawng m’hteim ne om khai gui. Ngami im gui co u ne sapyit gui geit khai gui. Ngami shedam na gui ciah ami peileng ah ka gui man cu kei naw ka m’kyuk gui khai, Israel gui cu phyawng htein ne om khai gui. Cun kawn ah ngami naw kei cu Bawipa ami na Khanpughi ah na hmat khai gui.

EZEKIEL 36:5

“Kei, uktu Bawipa naw, angveing ung pakhui gui la aktung pi ah Edom cu hnungtuk püi ne, ka m’lungshe nak ak hlüngpi awn ng’thu ka pyen ci nei. Ngami naw yeikyai nak la khokätä nak awn kei ah khaw cu tu ne khäm u ne, ka khaw la khulim khaw gui phi kaa nak ci gui nei.