ISAIAH 43:2 - Cho Bible Common Language 2016

² Thuuk ciah tui nami kan yah ung kei naw ka ning om püi gui khai nei; Nami khüi kha nak naw kä ning küm gui khai nei. Nangmi cu meikdäi kawt ne nami hteh yah ung mei naw kä ning ui gui khai nei.

ISAIAH 43:2 Referans Kwoze

ISAIAH 41:10

Kä kyikawk vä kei naw ka ning om püi gui ci nei! Kei cu nami na khanpughi nei — a i naw kä ning m’kyih sak gui khai nei! Kei naw ka ning khüi ghat sak gui khai, ka ning m’htei gui khai; kei naw ka ning shungvong gui khai, ka ning hun gui khai.

JOSHUA 1:9

Na shüm ba vai, kei naw ka ning thumkhän cu, Na khüghat vai, na thamah vai! Kä na kyih vai, na k’tha kä a ken vai, Kei, Bawipa na Khanpughi naw na hteh nak päng ah ka ning om püi ci nei.”

SAM 66:12

Nang naw kami ga gui am na na leh sak gui ci. Keimi mei la tui ah khan ah kami hteit ci, cun ung phi phyawn nak ah hmun ung na na hteh püi gui ci.

SAM 23:4

Sih nak ah khomü ung ka gawk law ung phi, kä ka kyik khai nei, Nang, Bawipa naw na om püi ne, Nang shopawng la nak htei pawng awn na shungvong ci nei.

SAM 91:15

Ami na khü ung ka m’shang gui khai. Ami geinvai yah ung ka om püi gui khai. Kei naw gung gui ne, ka m’taam gui khai.

HEBRU 11:29

Israel chang gui naw tuisen tuinu, kho kawng ah hteh ah mäih ah ami kah cu yum nak awn ah kyak ci. Cun ung phi Egypt chang gui naw, ami ak kah vü tu sangung ngami cu tuinu naw hteh gui yawp ci.

JOSHUA 1:5

Joshua, nang na ghin ah chuih a u naw kä ning m’di hlawt khai nei. Kei naw Moses ka om püi ah mäih ah ka ning om püi khai nei. Kei naw angtäi sei ka ning om püi khai, kei naw kä ka ning nawng phung khai.

MATTHE 1:23

Cun ah ng’Thu cu; “Ng’Lamihta cu käü mah ne, Pamihta ah hta lawk khai. Ani cu Immanuel ah ang ming sui khai gui. (Immanuel ci cu mik awn atang ah om ciah Khanpughi ah kyak ci.)

SAM 66:10

Nang naw na na m’nüm gui ci, Khanpughi; Ngui cu mei awn m’nüm ah kyak ci, cun ah kyasei na na m’nüm gui ci.

PHYAWN NAK 14:29

Cun ung phi Israel gui cu m’dek hu ung hteit ne tuinu kaan ci gui, vang ah vei ah tui k’paang om ci.

2 TIMOTHI 4:17

Cun ung phi Bawipa cu kei ung om ne k’thagui na pe sei, chang pakhui hei gui am Thu Ni cu ng’shäu ne kam thein gui hning ci, sih vai ah ami na k’bäi nak ungka phi ka phyawng ci nei.

ISAIAH 41:14

Bawipa naw pyen ci, “Israel gui, nangmi nami zaw ken pang ung phi, kä nami kyihkyawk vai nei, kaning m’htei gui khai nei. Kei, Theingcim ciah Israel khanpughi cu nangmi ning hun gui ciah ka kyak ci nei.

2 TIMOTHI 4:22

Bawipa cu na mümcha awn a täng ah om sä, Khanpughi ah chimgein nak cu nami van ah khan ah om sä.

ZEKHARIAH 13:9

K’pawih ba ciah bum ät cu kei naw ka m’nüm gui khai. Ngui cu mei awn m’ciim ah mäih ah kei naw ka m’ciim gui khai. Ghui m’nüm ah mäih ah ka m’nüm gui khai. Cun kawn ah kei ah ma ah taigü lawk khai gui, kei naw ka m’shang gui khai. Ngami cu ka chang gui ah ami kyak ah mawng kei naw ka m’thein gui khai. Kei cu ami na Khanpughi ah pyen ne ngami cu ng’kiaa lawk khai gui.”

ISAIAH 30:27

Bawipa ah huham la bämang nak cu asang ah ka naw phi hmuh hning vai nei. Mei kdäi la meikhu naw ani ah m’lungshe nak cu m’dang ci nei. Ani ang thu ung, aniah thulung naw mei ah mäih ah ui ci nei.

ISAIAH 29:6

m’gäi ciah Bawipa naw ng’pheet ciah hmumkyeek la shihpi thüng awn ning gung gui khai nei. Ani naw puikhokhi la meikdäi ng’lam cu tüi lawk khai nei;

MALAKHI 4:1

Hlüngtai ciah Bawipa naw, “Chang ah ng’shei ci gui la changshe gui cu khu chawng mei naw a uih ah mäih ah a uih sak gui vai ah hnüüp gawk lawk ci nei. Cun ah hnüüp ung ngami gui cu ui gui yawp khai, a i phi kä k’pawih ba khai.

PHYAWN NAK 3:12

Khanpughi naw, “Kei cu nang awn a täng ah ka om khai, nang naw ka chang gui Egypt khaw ah kaa na law püi ba gui ung, shin ah m’htung ung na na khawihnah khai. Cun cu kei naw ka ning tüih ah mawng ang dang nak ah kyak khai.”

SAM 32:6

Cun ah kyasei, na changnigui cu, ami ng’yak hlü ah khin ung taigü khai gui nei. Tuinu ng’güüt ne a law, law ung phi, kä k’pha gui khai nei.

ISAIAH 43:5

Kä nami kyih vai nei, ka ning om püi gui ci nei! “A shou pikbäih akiang täng lah ak hla pikbäih akhei täng ung ka, nami chang gui cu nami khaw ah ka law püi ba gui khai nei.

JEREMIAH 42:11

Babilonia ghangpughang cu kä kyih ba vä, kei naw ka ning om püi gui ci nei, ani ah huham ung kei naw ka ning gung gui khai nei.

JEREMIAH 46:28

Kei cu nangmi ah law ne ka ning hun gui khai. Kei naw ka ning püi pyang sak nak gui ah pakhui khaw avan cu kei naw ka m’di gui khai. Nangmi cu kä m’kyuk ah kä ka ning hteh sak gui khai; cun ung phi kei naw ka ning m’kyuk gui ung akdei dang ah bik khai. Kei, Bawipa, naw ka pyen nei.”

DANIEL 3:23

Shadrak, Meshak la Abedneko gui cu gui awn ami khih gui ah kyak ci, ngami cu mei caang ah ang lung ung yuk chah gui ci gui.

HAKKAI 1:13

Hakkai naw Bawipa ah ng’thu chang gui am a pek gui cu, “Kei cu nangmi awn atäng ah ka om khai, cun cu ka shaitak nei” ciah kyak ci.

JOB 5:19

Akhin päng ung ani naw nat nak päng ng ning hun khai;