ISAIAH 30:2 - Cho Bible Common Language 2016

² Ngami cu kei kä na ng’shikca ah Egypt khaw ah h teit ne ng’hui ng’pa ci gui. Ngami cu Egypt naw ashungvong gui vai m’hni ci gui, cun ah kya ne Egypt Ghangpughang ung ami ngaih u nak ap ci gui.

ISAIAH 30:2 Referans Kwoze

ISAIAH 36:6

Egypt naw ning bawm khai ah an doui, cun cu m’long htung ng’shopawng nak ah mäih ah kyak khai nei-a cun cu hnget ne, na kut ning shun khai nei. Egypt ghangpughang cu chang naw ang khüng lawnak ah a kyak ung a cun ah mäih ah kyak ci nei.”

JEREMIAH 43:7

Ngami naw Bawipa ah thumkhän kä ngai u ne Egypt khaw Tahpanhes mang gaw ah khüt ne hteit ci gui.

KHEI NAK 27:21

Ani cu taigü Eleazar ung ng’yung khai, ani naw Urim la Thummim mang ne kei ung ng’thei khai. A cu cha ah Eleazar naw Joshua la Israel chang bum avan cu ami mawngma nak avan ung m’shümthei gui khai.”

NG’ÄI KYAH 4:20

Ngami naw mi ghin nak ah a phung cu khäm ci gui. Bawipa naw aghü ah ghangpughang, ani cu na tu law gui phung ung na shungvong gui khai ah mi ng’ap nak ah kyak ci.

JEREMIAH 42:20

nangmi cu aktung ah nami hma ci, nangmi ah hmawk ah Bawipa mi khanpughi ah tiagü vai ah nami na K’thäh ci, ani naw ang thumkhan phung nami bik kai ah phi shai nami tak ci.

JEREMIAH 42:2

kei cu na pyen nak ci gui, “Na bä ni, kami k’thäh cu na bi pe gui ä! Bawipa kami khanpughi ah keimi ah phäh ah na tai gü pe gui ä. Kami k’pawih ba ci avan ah phäh ah na k’taihü pe gui ä, Cau läi kami da man te ci; tuhbäi api hta kami k’pawih lawk ci, na hmuh ah mäih ah kyak ci.

JEREMIAH 37:5

Cunzah ung Babilonian gakap gui naw Jerusalem cu khaai ci gui, ngami naw Egyptian gakap gui naw Egypt khawgii kan ne kai lawk ci gui cicu ng’ya u neta, ng’hlat ba ci gui.

JEREMIAH 21:2

“Na bä ni, kei mi ah phäh ah Bawipa ah na thäh pe gui ä, a i ah kyasei ci ung Babilonia ghangpughang Nebukhadnezzar la a gakap gui naw mang gaw cu khai ci gui nei. Bawipa naw keimi ah phäh ah cäi aih vai tumat bawta m’dang ne, Nebukhadnezzar cu ng’hlah ei ba sak hman khai nei.”

ISAIAH 36:9

Nangmi naw Assirian bawi a hmawpi phi kä nami ng’tuk püi hning ci, nangmi naw Egypt gui cu yatha gui la ng’secum gakap ning tüih lawk khai gui ah hami ngaih u ci.

ISAIAH 18:1

Sudan tuinu gui ah a hnu tang un gang phia khäp ah k’aw ng’yak ah khaw tumat om ci.

ISAIAH 16:3

Ngami naw Judah chang gui ami pyen nak gui cu, “A i bi vai cu na m’thein gui vä. Hnüüp lung kholing ung gei khai ah hnim ciah sing ghing ah mäih ah keimi cu na shungvong gui vä, nami ng’hnim ung na ng’düm sak gui vä, Keimi cu chang geinvai gui nei; a u naw kä ana hmuh nak gui vai ung na thup gui vä.

2 GHANGPUGHANG GUI 17:4

Cun ung phi kum ät ung Hoshea naw Egypt ghangpughang So ah ng’shä tüi ne, ani naw abawm tu vai ah pyen neta Assiria am phlam kä pek ba ah om ci. Shalamanese naw cun cu hmat law neta Hoshea cu pha ne thawng ung chum ci.

1 GHANGPUGHANG GUI 22:7

Cun ung phi Jehoshaphat naw, “Bawipa mi ng’shi thäh nak vai ah a hei prophet om ba ne ang?” cine ng’shik ci.

SUKI GUI 9:15

Hing-kyam naw, “Kei cu nami ghangpughang ah akcang ah nami na hmoh hlü ah a kyak ung, kei ah hnim ung law ne nami ng’zii law vai. Cun ah kä nami kyak ung ka hlin ban gui ung ka mei lut law ne Lebanon sing gui cu ui yawp khai” cik ci.

JOSHUA 9:14

Israel gui naw ami ei amshah cu dou ci gui, cun ung phi Bawipa cu kä ng’shi thäh ci gui.

THULÄÄN NAK 28:68

Bawipa naw htinpaw awn Egypt khaw ah ning tüi ba gui khai. Ani naw acu ah kä nami hteit ba khai a ci pang ung phi ning tüi ba gui khai. A cu ah nami mät hta nau u ne, changshäm ah ami ning hleih gui vai ah nami ng’yoi khai. Cun ung phi a u naw kä ning hleih hlü gui khai.”

2 GHANGPUGHANG GUI 18:21

Egypt naw ning bawm khai ah na ngaih u ci nei, cun ung phi ani cu m’long ng’shopawng nak ah mäih ah kyak khai — acun cu hnget ne na kut ung ning shun khai. Cun cu Egypt Ghangpughang chang naw a ngaih u ung a cu cha ah a kyak thei su ah kyak ci.

ISAIAH 8:19

Cun ung phi chang gui naw viik ne, sawbek ciah ng’cäbang ci la k’ce gui ah ng’thu nami k’thäh vaiah ning m’thein gui khai gui. Ngami naw, “Cun kawn ah chang gui naw mumcha gui ah ng’thu k’thäh hning ci gui, akghing nak vai sü aksi cu ng’shica hning ci gui” cik khai gui.

JEREMIAH 2:18

A i ah ang nami ngaih, Egypt ah hteit ne, Nile tuinu ung tui aw ne, nami bä pi khai ang? A i ah ang nami ngaih, Assiria ah hteit ne, Euphratis tuinu ung tui aw ne, nami bä pi khai ang?

HOSEA 7:13

“Ngami cu ng’yiin ci gui. Kei cu na hteh ta u ne na hnungtuk püi ci gui. Ngami cu m’di gui vai. Kei naw ka hun gui hlük ci, cun ung phi ngami naw kei ami na khawihnah cu chei ci.

HOSEA 8:9

Ng’sela ah mäih ah ami m’lung ling ci. Israel chang gui cu ami mät ah lam ung hteit ci gui. Ngami naw Assiria ah hteit ne ami m’htei gui vai ah ng’shui ci gui. Ngami shungvong gui khai ah ahei pakhui gui cu ngui pe ne ghüh ci gui.

HOSEA 8:10

Cun ung phi tuhbäi kei naw hteit ne k’bum gui ne ka m’kyuk gui khai. Kä shou pha sei ngami cu Assiria uktu bawi ah shedam nak gah lawk khai gui. Ngami cu ng’hleei lawk khai gui.