ISAIAH 2:4 - Cho Bible Common Language 2016

⁴ Chang pakhui küi kyang gui ah ng’cuh can gui cu ani naw m’khoi chak khai, ngami naw ami khüm cu lai thawn nak vai ah kawt u ne, ami k’htei cu sangsawn ah kyak sak khai gui. Chaung pakhui gui cu ng’tuk nak ah kä hteit ba khai gui. Ng’tuk vai ah kä pawng ba khai gui.

ISAIAH 2:4 Referans Kwoze

MIKHAH 4:3

Ani naw pakhui gui ah ng’lung ah ng’cuhcan nak m’düih khai, aksho ang et m’gäi ciah huham ah ng’lung ah. Ngami naw ami khim cu k’tuu ah shep u ne, ami htei cu ng’vin ah shep khai gui. Pakhui gui ng’tuk nak kä om ba khai, ga vai ah kä pawng htein ba vai.

HOSEA 2:18

A cunah akhin ung kei naw khisa gui la kha gui avan awn thukhän ka bik khai. Cun ah kyasei ngami naw kei ah chang gui cu kä nat sak khai gui. Kei naw khaw ungka likhim gui avan, ka heng khai — khim gui avan. Li gui avan maih khai. Ka chang gui cu dimdeeih ne phiawng htein sei ka om sak gui khai.

ZEKHARIAH 9:10

Bawipa naw, “Kei naw Israel ungka ng’tuk nak ah yatha gui la Jerusalem ungka ng’se gui cu, Ka lak khai nei; Ami ng’tuk nak ah li gui phi Ka m’di khai nei. Nami ghangpughang naw chang pakhui gui ah ng’lung ah dimdeeih nak bik khai nei; Ani naw vang tuinu ungka naw vang tuinu, Euphratis tuinu ungka naw, khaw cawi ah khüt khai ah, uk khai nei” cik ci.

ISAIAH 32:18

Khanpughi ah chang gui cu ng’ä ai nak phiawn nak khai gui, ami cin kyong dimdeeih ne phyawng m’hteim khai.

SAM 46:9

Ani naw m’dek khan ung ng’tuk nak avan düm sak ci, ani naw li gui cheiuh ne, k’htei gui m’di ne, shawi gui mei ung m’khih ci.

ISAIAH 9:7

Ani ah mang m’gäi huham cu bä law pi bä law pi ne, Ani ah uknak khaw cu angtäi sei dimdeeih khai. Ani naw David ghangpughang ah ng’shon m’täm ciah kya ne uk khai, ani ah huham cu düng nak la taga nak ung phung ne, Tuhbäi ung tün ne kho ang pyi güt uk khai. M’gäi ciah Bawipa naw shin gui avan bik khai ah k’bäi ci.

JOEL 3:10

Lai thawn nak ah m’si gui cu khim ah shep vä nami ng’vin gui cu k’htei ah shep vä. Aktha ken ci naw phi ng’tuk bik khai nei.

1 SAMUEL 2:10

Bawipa ah gaa gui cu dishum khai gui; Ani naw khan ah ka naw hmun kyeek awn hnu ng’tuk püi gui khai. Bawipa naw khaw ng’lei avan m’khoi chak khai; ani naw a ghangpughang huham pek khai, ani naw a ghü ah ghangpughang cu näng m’khüt sak khai.”

SAM 82:8

O Khanpughi, kyum law ne, khomdek khan cu uk law ä; changpakhui avan cu nang ah kaa nei.

THU PHLAAN 19:11

Cun kawn ah khankho m’kawt ng’hmawng sei ka hmuk ci. Cun ung ng’se bawk tumat om ci. Cun ah ng’se bawk ung ng’cum ci cu bekhüt la ng’düng nak ming nak ci. Ani cu ng’düng khai ah ng’thu m’chaa ne, ng’düng khai ah ng’tuk bik ci.

LAMKTU 17:31

A i ah kyasei ci ung khomdek chang avan, ghü ne am düih pyi ah Bawipa awn, ng’düng ciah ng’thumcha nak vai ah hnüüp cu, ak bäi pyi ah hmawk ah kya ci. Cun ah abi law vai ah mawng cu, cun ah Bawipa sih nak ungka a thawh ba sak nak awn, khäng htek ciah saksi m’dang pyi ci” cine pyein ci.

ISAIAH 9:5

Tu law gui ciah gakap gui ah phahnak gui la si kawp ciah suisak gui avan cu mei awn m’khih vai.

SAM 110:6

Ani naw pakhui gui cu m’khoi m’cha gui khai, ng’tuk nak ah hmun cu gook awn be sak khai; m’dekhan avan ung ghangpughang gui cu hnim gui khai.

SAM 96:13

Cun cu Bawipa law ne khomdek a uk law ung ah kyak khai nei. Ani naw hnicim chang gui cu düng nak la ni kyom nak awn uk khai nei.

ISAIAH 32:17

A i ah kyasei ci ung akehang sing naw düng nak cu bik khai, dimdeeih nak la ngaih gep nak cu angtäi sei om khai.

ISAIAH 33:22

Cun ah htinpaw ung gui gui avan cu akholä ah kyak ci; yih dung gui cu kä ng’phiaat hlawt ci! Mikmi naw ga gui ah khawhcham avan cu mi gut khai, cun gui cu da aih sei, shumng’kem ci gui naw phi gah tuk khai gui Bawipa amät cu mi ghangpughang ah kyak khai; ani naw mikhan ah na uk gui ne, na shungvong gui khai.

ISAIAH 42:1

Bawipa naw pyen ci, “Shin cu kei ah changshäm, kei naw thagui ka k’be nei — kei naw ka m’hni, ka ghü ah kyak ci nei. Kei naw ani cu ka mümcha awn ka be sak nei, Ani naw pakhui päng ung taga nak law püi khai.

JOEL 3:12

“Pakhui gui cu pawng ge u ne, m’khoicha nak ah khaw nawi ah lawk khai gui nei. A cu ah kei Bawipa cu ngo ne, peileng ah pakhui avan ka m’khoichak khai nei.

SAM 46:10

Ani naw, “Ng’tuk nak ung düm vä, kei cu Khanpughi ah na hmat vä, changpakhui gui ah khan ah ka hlüngtai ci, khomdek khan nüng ung ka hlüngtai ci.

ISAIAH 42:3

Ani naw ng’koi ciah m’long gong kä cheiuh khai, phät hlem hlem ciah meidäi kä k’phät khai. Ani naw chang van ah khan ah taga khai ah uk khai.

HOSEA 2:20

Kei naw ka shaitak paang ne ka kaa ah ka ning pyang khai, Nang naw kei cu Bawipa ah na na k’bäi khai.