HOSEA 6:3 - Cho Bible Common Language 2016

³ Bawipa cu mi hmat vai ah mi tha nak khai nei. Khaw a thaih law vai cu ahmat phyat ah mäih ah khomdek khan ah tui long khai ah kho a aa vai a hmat phyat ah mäih ah ani cu mik ah lawk khai nei.”

HOSEA 6:3 Referans Kwoze

HOSEA 14:5

Kei cu Israel gui ah khan ah khong gau khaw ung khaw a aa ah mäih ah ka kyak khai. Ngami cu cheipai ah mäih ah pai khai gui. Ngami cu lebanon sing ah mäih ah khäng sei ng’yung khai gui.

JEREMIAH 24:7

Ngami am kei Bawipa ah ka kyak ah ami hmat nak hlü cu ka pe gui khai. Cun kawn ah ngami cu kei ah chang ah kyak khai gui, kei cu ngami ah khanpughi ah ka kyak khai, a i ah kyasei ci ung ngami cu ami m’lung kyong avan awn kei ah ng’hlat law ba khai gui.

SAM 72:6

Ghangpughang cu lai ah khan ah kho a aa mäih ah, ng’lei ah khan ah khüi a book ah mäih ah kya sä.

THU PHLAAN 22:16

“Kei Jesuh naw nangmi Khrithabum gui-am shin ah a mawng gui cu shäu ne ning m’thein gui khai ah ka khankho chang cu ka tüi lawk ci nei. Kei cu David ah hta ng’shon ah ka kyak ci, ng’shü ne khang ciah thaihke aisi ah phi ka kyak ci.”

MATTHE 13:11

Bawipa Jesuh naw, “Nangmi naw Khanpughi ah kho ah mawng thuuk ne ng’kau cicu hmuhmat nak thei vai nami gah ci. Chang hei gui cu cun kä gah tuk ci gui.

ZEKHARIAH 10:1

Khawhtui khaw ah khaw aa khai ah Bawipa ah ng’yoi vä. Bawipa naw khaw k’aa ng’mei gui awn khaw aa sak sei, chang van ah hmawk ah lolai gui m’kim ne nik ci.

2 PETER 1:19

Cun ah kyasei keimi naw profet gui ah ng’shäu ah ng’thu cu kami yum law pi ci. Cun cu nami ngaih-tüh kheng vai nei, a i ah kia sei ci ung cun cu hmüp khui ung mei m’däi ah mäih ah, kho a thaih law güt nami m’lung kyong ung khäng ciah thaihke aisi ah kiak ci.

LUKA 1:78

Mikmi ah Khanpughi cu m’gein nak la k’dük nak awn be ci. Ani naw a hun nak ah akdei cu mi khan ah ng’shü law sak ne,

MALAKHI 4:2

Cun ung phi kei na läk ciah nangmi ah phäh ah ka hun nak huham cu khohni ah mäih ah nami khan ah so lawk khai, hni ah pyü ne gai nak law püi khai. Nangmi cu phyawng ne, sei im ungka lut law ne ng’hlü ciah sei hta ah mäih ah nami yei khai.

MIKHAH 4:2

ami chang gui naw, “Bawipa ah khomhtung ah mi hteit khai nei, Israel gui ah Khanpughi ah Taigü im ah. Ani naw mi bi vai angyak hlü cu na m’thei gui khai nei. Mikmi cu ani naw a ghü ah lam ung mi hteit khai nei. Bawipa ah m’thei nak cu Jerusalem ungka lawk ci, Zion ungka naw a chang gui cu ng’thu püi gui ci.”

HEBRU 3:14

Mikmi cu ak htük ah mäih ah a khüt nak ung khüt sei, khäng ciah ngaihgep a om ah a kyak ung Bawi Khrit awn bilo ghawm ciah chang ah mi kyak ci.

JOHAN 17:3

Ang täi ghin nak ci cu, nang Khanpughi ning hmat nak la na tüih law ah Bawipa Jesuh hmat nak ah kyak ci.

HOSEA 10:12

Kei naw ka pyen ci, ‘Nami mät ah phäh ah m’dek ak thai thawn vä. Düng nak cu geit u ne kei ah nami ng’ap nak ung m’theih pai lawk ciah hrilham cu khäm vä, Shin cu nangmi kei nami na Bawipa ah nami ng’hlah law nak ba vai ah akhin ah kyak ci nei. Kei cu law ne nami khan ah hrilham ka yuk lawn lawk khai nei.’

ISAIAH 54:13

“Na chang gui cu kei ka mät naw ka m’thei thang gui khai, bühmang nak la dimdeeih nak ka pe gui khai.

LAMKTU 17:11

Berea ah chang gui cu Thessalonika ah chang gui ah mä ami m’lung ng’htei pi ci. Cun ah kya ne Paul ah thu pyein cu k’tha na ne ngai ci gui. Paul la Silas ah thu pyein cu akcang la kä akcang ah ami hmat nak vai ah cacim cu ak hnüüp tä sei teng kheng ci gui.

HOSEA 2:20

Kei naw ka shaitak paang ne ka kaa ah ka ning pyang khai, Nang naw kei cu Bawipa ah na na k’bäi khai.

ISAIAH 44:3

Kei naw tui gha ciah khaw ung tui ka pek khai, khong’gau khaw ung tui lawng ka lon sak khai. Kei naw nami htanau gui ah khan ah ka mümcha ka yuk chah khai, nami hta ng’shon gui ah khan ah ka hriham ka yuk chah khai.

ISAIAH 32:15

Cun ung phi khanpughi naw ang mümcha cu natüih law ba gui mä khai. Amdek she pi ah kho cu amdek ni ah kya lawk khai, lo gui ung geitkaw akda m’thawk khai.

SAM 65:9

Nang naw na ng’dü khaw m’htei ne na m’dang nak cu; khaw na yuk aa sak ci, na bämang sak ci, m’dek na ni sak ci, tuihta na lon sak ci; khomdek phi geit awn na be sak ci. Shin cu nang ah bi lawh ah kyak ci.

THULÄÄN NAK 32:2

Kei ah m’theithang cu khaw aa ng’ma ah mäih ah hteeu khai. Khomdek khan ung khi ah mäih ah toi khai, Kei ah kang thu gui cu geit ayüt ah khan ah yu kyak ciah khaw goh ah mäih ah kyak khai. Hniphnoi ciah khumghaw ah khan ah yuk aa ciah ng’awigii ciah khaw aa ah mäih ah kyak khai.

MIKHAH 5:2

Bawipa naw, “Bethlehem Ephrathah, nang cu Judah khaw ung ak yawpi tumat ah na kyak ci, Cun ung phi nang ungka kei naw Israel Uktu cu ka law püi khai, ani ah kyong cu cau ge tün ne dang ge ciah kyak ci” cik ci.

EZEKIEL 36:25

Kei naw nami khan ah tuici awn ka ning k’peh gui khai, nami agup gui avan la nangmi ning lelawi sak gui ci nü ungka ka ning theing sak gui khai.

ISAIAH 5:6

Kei naw cun cu khumgho she gui awn kakdüi sak khai. Kai naw kä ka k’hteiuh pyang khai, m’dek kä ka k’seisan khai; ng’hling nu, ng’hling hta gui awn ka küm khai. Ani ah khan ah khaw kaa kä kya lawk khai ah khaw mei gui phi ka maa nak khai” cik ci.

NG'THU K'THUUK~ 4:18

Düng ciah chang ah hteh nak ah lam cu hni pyü ah mäih ah kyak ci. Dei law pi pi ne hni a luh law güt ung khang ci.

JOB 29:23

Lai bik ci gui naw htui kho k’aa ami dou ah mäih ah kei ah ng’thu gui cu dou man ci gui.

MIKHAH 5:7

Pawih ba ciah Israel chang gui cu khui päng ah phäh ah Bawipa ah tüih law ah thai ba ciah khüi ah mäih ah a ghing gui ah khan ah kia lawk ciah khaw goh ah mäih ah kyak khai gui.

SAM 19:4

Ngami ah thushäu cu kho ah ka avan ung hteit ci, m’dek ah khan avan ung ng’yak nei. Khanpughi naw khankho mik ung khohni ah im pyang ci;

JOHAN 7:17

Khanpughi ah ang yak hlü ah om hlük ciah chang phung naw, kei ah ng’thu pyein gui cu ang ngaih ung, Khanpughi ah ng’thu la kei ka mät ah ng’thu ah a kyak ah, ng’thumcha ne hmat khai nei.

2 SAMUEL 23:4

ng’mei kä om ciah khaw thaih hta ung, pyü ne sou ciah khaw hni ah mäih ah, khaw a aa thai ung khu m’sai m’kim sak ne, pyü ciah khaw hni ah mäih ah kyak ci nei.”

SAM 19:6

Ani cu khomik ah vang mawng ah lut law ne, vang mawng ah ng’phlän ne hteit ci. Ani ah a ng’lung ung a i phi kä ng’shung thei ci.

SAM 63:8

Kei cu nang ung ak htek ah ng’pang ngä sei, Na kut naw kei cu na k’phyawn ci.

ISAIAH 2:3

ami chang gui naw, “Bawipa ah khawmhtung Israel khanpughi ah Taigüim ah mi kya khai nei. Ani naw ana bi sak gui hlü cu na m’theithang gui khai nei; mikmi cu ani ah ghü ah lam ung mi hteit khai nei. Bawipa ah m’theithang nak cu Jerusalem ung ka gawk lawk ci; Ani naw Zion ung ka naw ak chang gui ng’thu püi gui ci.”

HOSEA 14:6

Ngami cu akthai ah tho ne ghing u ne, Oliv sing ah mäih ah kyom ci gui. Lebanon cedar sing ah mäih ah Ngami cu ng’ui Ng’hnam khai gui.