HEBRU 7:19 - Cho Bible Common Language 2016

¹⁹ Moses ah thukhän naw a i phi kä kümpäng sak hlawt ci. Tuhbäi mikmi cu bä pi ciah ngaih u nak mi gah pyii ci kyasei, cun ah ngaih u nak awn Khanpughi ah pei ah mi ng’et lawk ci.

HEBRU 7:19 Referans Kwoze

HEBRU 4:16

Cun ah kyasei mikmi cu mi khüighaat ne, m’gein nak ah hmun Khanpughi ah mangkiang ung mi hteit khai nei. Cun ah hmun ung chik-hna nak la gein nak cu, mi ng’yak hlü phung ung mi gah khai nei.

HEBRU 9:9

Shin gui cu tuhchü tawk ne dang sak ciah a mawng gui ah kyak ci. Cun cu peit taak nak la ghuthaa nak gui naw khawihnah ciah chang gui ah m’lung cu kä kum be sak hlawt ci ciah kyak ci.

ROMAN 8:3

Hnicim chang ak tha kä om sei, thukhän naw kä a bi peit hlawt cu Khanpughi naw bi pyi ci nei. Khanpughi naw hnicim chang ung om ciah katnak cu m’kat khai ah A Htapa cu yuk m’kyum lawk ci. Ahtapa cu katnak k’täm ne m’di khai ah, hnicim chang ah mäih ah katnak nupuk nah ne ng’tüi lawk ci.

HEBRU 11:40

A i ah kyasei ci ung, Khanpughi naw mikmi ah hmawk ah bä ba pi ciah ng’bü nak am hnüt pyi ah hmawk ah kyak ci. Cun ah ang bü nak cu, cun ah chang gui mikmi awn mi kawng ät u ne, kümbe nak ung mi gawk vai ah hmawk ah kyak ci.

HEBRU 10:1

Jew thukhän gui cu be ci la bekhüt ciah akcang gui ah kä kyak ci: gawk lawk khai ah nikiom nak gui ah püpüi gui ah kyak ci. Thukhän ah ciah akum täi sei küikyan nak cu bi ah kiak ci. Cun ung a i hawkcha ah thukhän naw, Khanpughi ah lawk ciah chang gui cu, kümbe sak gui khai aw?

HEBRU 6:18

Shin ah shaitaak la ng’phyun nak cu, käng thawnghlai hlawt ci la Khanpughi ah hleeihlak nak kä om hlawt ciah a mawng hnih ah kiak ci. Cun ah kyasei ani ung mi ng’yi ciah chang gui cu, ana peit gui ah ngaih u nak htek sei pan vai ah mi thamah lawk ci.

ROMAN 5:2

Mikmi naw Jesuh Khrit cu mi yum ci kya sei, ani naw mikmi am, Khanpughi ah m’geinsei nak cu na hmat sak gui ci. Tuk bäi cun ah m’geinsei nak cu mi gah u ne, Khanpughi ah hlüngtai nak gah vai cun-phi ngaih gep nak om sei mi yeikyai ci.

HEBRU 8:6

Cun ung tuhbäi Khanpughi la ak chang gui ah ng’lak ung Bawipa Jesuh naw a pyan ah thukhän cu, bä pi ciah shaitaak ung ng’yung ci kya ne, thukhän gui ah tah a bä pi ah mäih ah, Taigü ah kia ne Bawipa Jesuh ah bilawh gui cun phi, cun ah taigü gui ah bilawh gui ah mä bä pi ci nei.

HEBRU 7:25

Cun ah kyasei ani ah ang ming ung Khanpughi ah lawk ciah chang gui phung angtäi sei hun gui ci. A i ah kyasei ci ung Bawipa cu cun ah chang gui ah hmawk ah Khanpughi ah ng’coi ng’pak khai ah, angtäi ah a ghin ah hmawk ah kyak ci.

KALATIAN 2:16

Chang cu Bawi Jesuh Khrit a yum nak bäng awn Khanpughi ung ng’düng nak gah ci, ng’thukän a läk nak awn ah kä kyak ci. Keimi cun phi Bawi Khrit Jesuh yum nak awn, Khanpughi ung düng nak gah vai ah, Bawi Khrit cu kami yum ah kyak ci, thukhän läk nak awn ah kä kyak ci. A u chang phi thukhän läk nak awn Khanpughi ung düng nak kä gah hlawt ci.

JOHAN 14:6

Bawipa Jesuh naw, “Kei cu lam ah ka kyak ci, thutak ah phi ka kyak ci, ghin nak ah phi ka kyak ci, kei ung kä hteit ciah chang phung cu Kapa ah om nak ah kä gawk khai.

SAM 73:28

Cun ung phi kei ah hmawk läi ah, Khanpughi awn ng’et ne, uk ciah Bawipa shungvong nak hmu ne, ani ah bi phung ng’shäu cu cäcat vai ah kyak ci nei!

HEBRU 7:11

Israel chang gui-am thukhän a peit gui yah ung, Levi pakhui taigü gui ung ng’yung ne a peit gui ah kya ci. Tuhbäi Levi pakhui taigü gui ah bilawh cu a khüm be vai sü ung, Aaron ah a hnün ung Melchizedek ah khui m’düng khai ah taigü ang dang lawvai kä hlü khai sü te.

1 TIMOTHI 1:1

Mi Hunbawi Khanpughi la mi ngaih u Jesuh Khrih ah m’hnüt nak awn Bawi Khrih ah düih püi ah ka kya ciah kei Paul naw —

KOLOSE 1:27

Khanpughi ah ng’bü nak cu, ng’yih cicu ak chang gui-am hmat sak gui vai ah kyak ci. Cun ah ng’yih ciah bä nak la mang nak cu, ak chang gui ah hmawk ah kyak ci. Cun ah ng’yih ci cu, Bawi Khrit nangmi ung om ci, ciah kya ne, a mawng cu nangmi naw Khanpughi ah bämang nak nami ng’pai tuk khai, ciah kyak ci.

EPHESIAN 3:12

Mikmi cu Bawi Krih ung mi kawngät nak la ani mi yum nak awn, Khanpughi ah ma ah m’lung üp thamah ne mi gawk pyi ci.

KALATIAN 3:24

Mikmi cu yum nak awn Khanpughi ung düng nak mi gah vai ah thukhän naw, Bawi Khrit a law ba güt ung na ngäng gui ci.

JOHAN 1:17

Khanpughi naw Thukhän cu Moses ung na pe gui ci, cun ung phi geinsei nak la düng nak cu Jesuh Chrit ung na pe gui ci.

NG’ÄI KYAH 3:57

Nang naw na m’shang ne kä kyih en vai ah na na m’thein ci.

ROMAN 7:7

Cun ah a kyak ung thukhän amät cu katnak ah mi pyein khai ang! Cun ah kä kyak ci! Cun ung phi katnak cu a i ang, cicu thukhän naw na hmat sak ci. A vaisü ah, “Chang ah khawh kä ng’yak hlü düt vai,” ciah thukhän naw kä a pyein vai sü ung, ng’yak hlü nak düt ah mawng cu kei naw kä ka hmat khai sü te,

KALATIAN 3:21

Cun ung thukhän la Khanpughi ah shaitaak cu hnu ng’tuk ni ne ang? Kä hnu ng’tuk ci goi nei! Chang ah hta naw ghin nak ah thukhän ami gah vai sü ung, acun läk nak awn chang phung cu Khanpughi ung düng nak gah khai sü te.

HEBRU 3:6

Bawi Khrit läi cu Khanpughi ah im uk ciah A Htapa ah kya ne, bekhüt ne om ci. Mikmi cu küighaat ne, mi ngaih u nak ah khan ah m’lung üp nak a om ah a kyak ung, Khanpughi ah im ah mi kyak ci.

HEBRU 7:20

Cun kawn ah phi Khanpughi ah phyun nak cu om ci. Ahei gui taigü ah ami kyak sang ung cun ah mäih phyun nak cu kä om man ci.

HEBRU 11:6

Zum nak kä om ci naw Khanpughi kä yei nak ci. Khanpughi om ci, cine Khanpughi shui ci naw m’cümhnah nak gah ci.

JAMES 4:8

Khanpughi ah pei ah nami law vai, cun ung nangmi ah pei ah Khanpughi lawk khai. Cheishoh ciah chang gui! Nami kut m’si vä. Thuvi ciah chang gui nami m’lung theing sak vä!