EZRA 8:21 - Cho Bible Common Language 2016

²¹ Cä ah Ahava tui cawh pei ung mik mi ah phäh ah tuhbäi ka pek ci. Mi van ei hlawi ne mi Khanpughi ah ma ah m’lung mi ng’neim sak khai. Mihteh nak ah lam ung ma ana tawn gui vai ah mi k’thäh khai. Mi mät mi hta nau gui la mi khawh cham avan ana shungvong gui vai ah,

EZRA 8:21 Referans Kwoze

2 SHONTÄP NAK 20:3

Jehoshaphat cu kyikyawk neta, Bawipa naw lam am shüm vai ah taigü ci. Ami khopäng avan ung chang gui ei hlawi ne ami taigü vai ah thu k’bäi ci.

JOEL 1:14

Ei hlawi taigü vai ah k’bäi vä; chang van ng’bum vä! Ang vai gui la Judah chang gui avan Bawipa nami Khanpughi ah Taigü kyong ah bum u ne, ani ah kyap lau vä!

ISAIAH 30:21

Nangmi cu lam hma u ne k’eng täng ni mä, k’pat täng ni mä nami ci law ah a kyak ung, nangmi naw nai hnu ah ani ak’aw nami ng’yak khai, “lam shin ung nei. Shin ung hteit vä” cik khai nei.

1 SAMUEL 7:6

Cun ah kyasei ami van Mizpah ung lawk ci gui. Ngami naw Bawipa am douthak nak ah, tui than ne k’peh u ne, cun hnüüp mü ne ei hlawi ci gui. Ngami naw, “Mikmi cu Bawipa hnu ng’tuk püi ne mi hma ci nei” (Israel gui ah lung ah Samuel naw abi nak cu Mizpah ah kyak ci)

JONAH 3:5

Nineveh chang gui naw Khanpughi ah ng’thu cu yum ci gui. Chang päng naw ei hlawi vai ah k’bäi u ne, chang avan akbä pi ungka naw ak ghawipi ung khüt sei, ng’yu nak m’dang nak ah suishe sui ci gui.

TAIGÜTHUM 16:29

Shin ah thungyo gui cu lawk khai ah a khin avan ung ngaih mah nak gui vai ah kyak ci. A cha chih nak ah, a hnüüp gha hnüüp ung Israel chang gui la ami ng’lung ah om tuk ciah a khawhei chang gui cu ei ami hlawi vai, a i phi kä ami bi vai.

TAIGÜTHUM 23:29

Cu hnüüp ung chang tumat mat naw ei a ei ah a kyak ung, ani cu Khanpughi ah chang tumat ah kä k’bäi ba vai.

LAMKTU 2:39

Khanpughi ah shai tak cu, nang mi ah hmawk, nami hta naü gui ah hmawk lah ang shawng ah om ci gui ah Khanpughi naw akhü gui ah chang gui phung ah hmawk ah kyak ci” ci neh m’thein gui ci.

ISAIAH 42:16

“Kei naw amik m’dauh ciah ka chang gui cu kä ami hteh nak man ah lam ung ka ng’khah püi gui khai. Ami mü hmüp nak cu akdei ah ka m’hlat khai, ghat ciah khaw cu ami ma ah ng’mi khai ah ka pyang khai. Shin gui cu kei ah shaitak ah kyak ci, kei naw kä chah ne ka k’pang khai.

SAM 5:8

Bawipa, kei cu ka ga da aih aih ci nei! Na ng’yak hlü ka bi vai ah lam na m’shüm ä; Ka ning läk vai ah na lam na pyan pe ä.

EZRA 8:15

Kei naw chang bum avan cu Ahava gawnu ung long lawk ciah tui cawh pei ung ka ng’bum sak gui ci. Cun ung hnüüp thum phung tu na kami om ci. A cu ah taigü gui ng’bum tu u sei ka hmu gui ci. Cun ung Levit a u kä om tuk ci.

JEREMIAH 10:23

Bawipa, a u naw amät ah mawng lam kä m’khüt ciah ka hmat ci nei; a u naw phi amät ah ghin nak cu kä k’pang hning ci nei.

ISAIAH 58:5

Einmai hlwi ng, nami mät naw nami mät nami yaica sak ci; khum’ghaw ah ng’voi ah mäih ah nami lu ngüm ne kawp ne, sui she phüi ne, m’vut ung ng’zaän ne nami kyak ci. Cun ma nangmi naw ei hlawi ah nami pyen? A cun ah mäih cu kei naw ka yei nak khai ah nami ngai ne ma?

ISAIAH 58:3

Chang gui naw ng’shih ci gui, “Bawipa naw a i ah kä ana sui gui ung, a i vai mikmi ei mi hlawi vai ang? Ani naw a i ah ka ana ngaih gui ung a i vai ei kä ei ne mi hteh vai ang? Bawipa naw ngami pyen na gui ci, “akcang cu, nangmi ei nami hlawi sang ung nami mät ah ng’yak hlü shui u ne, nami chang gui nami shedam na gui ci.

ISAIAH 49:10

ngami cu kä cawi phung, kä gha phung khai gui. Ngami m’hni gui ci naw lamshüm gui ci kya sei, khohni ling la khong’gau kholing naw kä nat sak gui khai. Ani naw tuilawng gui ah om nak ah hteh pui gui khai.

NG'THU K'THUUK~ 3:6

Na bi nak päng ung Bawipa om ciah na shüm vai. Ani naw düng ciah lam ning m’shüm khai.

SUKI GUI 20:26

Cun ung Israel chang gui ami van Bethela ah hang kai u ne kyap ci gui. Ngami cu a cu ah Bawipa ah ma ah ngaw u neta mühun güt ung ei kä ei ci gui. Ngami naw hmuhchum douthak nak cu douthak u ne, khawihnah nak along ah m’khih u ne, cun gui avan cu Bawipa ah ma ah bik ci gui.

TAIGÜTHUM 16:31

Cun ah hnüüp cu ang htei ah theingcim ciah hnüüp ah kyak ci. Ei ami hlawi nak la a i kä ami bi nak ah khaw hnüüp ät ah kyak ci. Shin ah thungyo gui cu lawk ciah a khin avan ung ngaih nak vai ah kyak ci.

ISAIAH 35:8

A cun ung lam ng’kiung nu om khai, cun cu “Theingcim khaw ah Hteh nak lam” ah pyen ci gui. Kat nak bik ciah chang phung cun ah lam ung kä hteit tuk khai; A u akgutak naw phi cun ah lam ung hteit cicu lam hma khai ah kä m’shüm khai.

SAM 8:2

Cun cu hmawhta la nausen naw a m’cu ah kyak ci. Nang cu ga avan ah kut ung ka ning hun ne, ning phyawn ci nei, Ning tuk püi ci phung nang bäng naw düm ah na om sak hning ci.

EZRA 8:31

Cun cu keimi naw Jerusalem ah hteh ba vai ah Ahava tui cawh hteh ta ne, kami hteh nak ah a cha ät nak, a hnüüp gha lei goi nak ah kyak ci. Kami Khanpughi naw na om püi gui ne, ga ah tuk nak la lam ung ga ah ng’mah nak ung na shungvong gui ci.

KHEI NAK 14:31

Nangmi naw nami hta gui cu, pha gui khai gui ah nami pyen ci, cun ung phi nangmi naw nami hnungtuk püi ah khaw ah kei naw ngami cu ka hteh püi gui khai, cun cu ngami ah im ah kyak khai.

KHEI NAK 14:3

A i ah kyasei Bawipa naw cun ah khaw ung ana hteh püi gui ang? Ng’tuk nak ung mikmi gui cu na ngawn gui khai, Mi chu gui la mi hta gui cu pha gui khai gui. Egypt khaw ah ng’hlat ne mi hteh ba ung kä bä tuba khai aw?” cik ci gui.

JONAH 3:7

Ani naw Nineveh chang gui am ng’shäu nak thu m’shäk gui ci, “Shin cu ghangpughang la a bawi gui ah ng’thu küi nei; A u naw a i kä ah ei awk en vai; chang avan, sei avan, htome avan naw a i kä a ei awk vai ah kami k’bäi ci nei.

2 SHONTÄP NAK 20:4

Judah khaw mang gaw päng ungka chang gui cu Bawipa ah lam shüm nak ng’yoi thäh khai gui ah ang ghit ah Jerusalem ah gawk lawk ci gui.

NEHEMIAH 9:1

A cun ah cha a hnüüp m’ku lei phli nak ung Israel chang gui cu ami hmakat nak thüi ne ami ng’yu ba ah mawng ami m’dang nak ah ei hlawi khai gui ah ng’bum ci gui. Ngami cu akhui hei chang van ami van awn ami mät ng’pai pyi ci gui ah kyak ci. Ngami cu ami thüisei nak dang khai ah suishe sui ne, ami lu khan ah m’vut tha u ne kyak ci gui. Cun kawn ah ng’düi law u neta ami mät la ami pupa gui ah m’cheishoh ah hmakat nak gui cu ng’yu ba ci gui.

ESTA 4:16

“Hteit ne Jew gui avan Susa ung k’bum gui ä. Ei hlawi ne kei ah phäh ah taigü vä. Hnüüp thum la mü thum ung ei kä nami ei, tui kä nami awk en vai nei. Kei la ka changshäm hnumi hta gui phi acun ah kami bik khai nei. Cun kawn ah shin cu thukhän awn a hnungtuk ung phi, kei cu ghangpughang ah ka hteit khai. Shin bi ah phäh ah sih vai a kyak ung phi ka sik khai nei” ciah kyak ci.

SAM 5:9

Kei ah ka ga gui ah thu ung bekhüt nak kä om phung ci; Ngami naw ah m’di hlü bäng ci gui. Ngami ah ng’thu cu ng’awi gi müi ne, hnip ci, Cun ung phi chang m’di nak ah hleei awn be ci.

SAM 137:1

Babilon tuinu gui pei ah ngo u neta; Zion mang gaw cu shüm ba ne kami kyap ci.

JEREMIAH 42:3

Bawipa kami khanpughinaw kami hteh nak vai ah lam la kami loi lawh vai cu ana m’hnuh gui vai ah na taigü pe gui ä.”

DANIEL 9:3

Kei cu düng nak awn Bawipa Khanpughi ah ka taigü ci, ani ung ka ng’coi pak ci, ei ka hlawi ci, sui she sui ne m’vut ung ka ngok ci.