DANIEL 12:4 - Cho Bible Common Language 2016

⁴ Ani naw na pyen nak ci, “Tuhbäi, Daniela, ca-uk na m’khüp vai. Khaw kä a khüt pha ah chuih cun ah khan ah m’hnüt nak na k’daih vai. Cun yah ung a i ah kya lawk ci, cicu ami hmat vai ah chang akda naw a kholä ah tha nak khai gui.

DANIEL 12:4 Referans Kwoze

DANIEL 12:9

Ani naw na m’shang ne, “Tuhbäi na hteh vai, Daniela, Shin ah ng’thu gui cu adüm ah gim ne, khaw a khüt güt ung thuh vai nei.

THU PHLAAN 22:10

Cun kawn ah khankho chang naw, “Shin ah a mawng gui a bä law nak vai ng’et law pyi ci kyasei, shin ah ca-uk ungka ng’cäi nak ah ng’thu gui cu kä na m’yih en vai nei.

DANIEL 8:26

Mühun la kho ngawi ah khawihnah nak ah mawng muimang kei naw ka ning m’thein cu akcang ah kya lawk khai. Cun ung phi tuhbäi m’yih vai, a i ah kyasei ci ung a cun ah a kyak law nak vai cu kho ak shou lüng ba cang khai.”

DANIEL 8:17

Kabriel cu law ne ka pei ah ng’düi sei, kei cu kyih aih neta m’dek ung kyu ne ka ng’yän ci. Ani naw na pyen nak ci, “Chang aw, amawng cu hmat ä, shin ah muimang cu kho ah ng’pyi nak vai ah a mawng ah kyak ci.”

THU PHLAAN 10:4

Cun ah ng’hmumkyeek ciah ng’thu cu ka guk khai ah pawng ngätah, “kä na guk-en vai nei, chih vei ng’hmumkyeek ciah ng’thu cu na m’yih vai nei” ciah khankho ah k’aw cu ka ng’yak ci.

DANIEL 12:13

“Nang Daniela, khaw akhüt güt ung na bekhüt vai. Cun kawn ah nang cu na sik khai, cun ung phi akhin ang pyi law ung, na ng’chuh na gah khai ah nang cu na tho ba khai nei.”

ISAIAH 32:3

Chang gui ah hlü nak ami hmuh ng’yak nak thei vaiah ami mik, ami k’hnga hmawn pe gui khai nei.

ISAIAH 8:16

Nangmi, ka ning düihpüi gui naw khanpughi naw ana pek ah ng’thu gui cu ngäng ne nami m’htei vai.

MATTHE 24:14

Khankho uknak ah mawng thu ni cu khodek khan avan ung chang nüng ah ma ah saksi ne pyein yawp kawn ah, kho ah ng’pyi nak vai ah khin cu gawk lawk khai nei.

ISAIAH 11:9

Zion ah khan, khanpughi ah m’htung theing ung, nat nak la akshe a i pi kä om khai. Tuinu cu tui awn abe ah mäih ah khaw cu Bawipa ah hmuh hmat nak awn be khai.

DANIEL 11:40

“Siria ghangpughang ah akhin ang pyi law ung, Egypt ghangpughang naw tu lawk khai. Siria ghangpughang naw a huham avan, yatha gui, ng’sela gui la htinpaw akda mang ne ng’tuk püi tuba khai. Ani naw tui klaw ah mäih ah khopäng akda cu tu gui khai.

DANIEL 11:33

Cüivai ciah ang vaihta gui naw chang akda am cüivai nak ah mawng m’thein khai gui. Cun ung phi kä shou pha sei amshah cu ng’tuk nak ung ngawn gui khai gui, amshah cu guttep u ne thawng ung chum khai gui.

ROMAN 10:18

Cun ung phi chang gui naw cun ah thu cu kä ng’ya u ne ang! Ka ning ng’shi gui hlük ci: Ngahmi naw akcang ah ng’yak ci gui. Cacim theing ung; “Thu Ni ng’shäu ci gui ah k’aw cu khomdek khan avan ung Thang ne gawk ci; Ngah mi ah Thu m’kha cu kho cawi kheng ah khüt ne gawk pyi ci nei” ciah om ci nei.

DANIEL 10:1

Cairus cu Peisia ghangpughang ah a kyak nak a kum thum ung Belshazzar ah phi ami pyen ah Daniela ung ng’thu m’khäh gawk lawk ci. Thu m’khäh cu akcang ah kyak ci, cun ung phi kä hmat hlawt vai ah kyak ci. Cun cu ani ah muimang ung ng’phlan ne gawk lawk ci.

ISAIAH 30:26

Cha cu hni ah mäih ah ng’shü khai, hni cu ang shü man ah ak chih ah pyü ne ng’shü khai, hnüüp chih ung ang shü vaisü hnüüp ät ung ang shü ah mäih ah kyak khai. Bawipa naw achang gui am a pek gui ah hmaleim gui halwp ne, am tui pek gui kawn ah shin gui avan cu kya lawk khai nei.

THU PHLAAN 5:1

Mang kiaang ung ngok ciah akpat lam a kut ung ca k’chaw cu ka hmuk ci: cun ah ca k’chaw cu vang ah vei ah ca be sei gu ne, m’hnüt nak chih awn m’hnüt ah kyak ci.

ISAIAH 29:11

Prophet ah muimang ah mawng cu nangmi am ning m’zih gui vai nei; cun cu m’hziütah ca k’chaw ah mäih ah kya khai nei. Nang naw cun cu la neta, caphat thei ciah chang am phet ne aning m’thein vai ah na pyen ah a kyak ung ani naw kä ka phat khai, cik khai nei, a i ah kyasei ci ung cun cu m’hnüt ah kyak ci.

JEREMIAH 5:1

Jerusalem chang gui, nami lam gui ung dawng vä! Veing ne teng vä! Nami mät ah phäh ah teng vä! Ami sum lei hmun gui ung shui vä! Ng’düng nak bik ciah chang, Khanpughi ung bekhüt vai ah k’tha nak ciah chang, nami hmuh hning khai aw? Nami hmuh ah a kyak ung, Bawipa naw Jerusalem cu m’geisei khai nei.

DANIEL 10:14

Nang ah na chang gui ung ngawi ah a i ah kya lawk khai ci cu, kei naw law ne ka ning hmuhmat sak ci nei. Shin cu ngawi ah kya lawk khai ah mawng muimang ah kyak ci.”

DANIEL 12:5

Cun kawn ah chang hnih cu tuinu ah kem ung vangtäng tumat ciah ng’düi ni sei ka hmuk ci.

DANIEL 8:19

a pyen cu, “Khanpughi ah m’lung she nak a i cha ah kya lawk khai ci cu, kei naw ka ning m’dang nei. Muimang ah mawng cu kho ang pyi nak vai ah khin ah kyak ci.