ATÜNNAK 27:29 - Cho Bible Common Language 2016

²⁹ Chang pakhui päng cu na changshäm ah kya ne, chang sing päng naw ning ng’coi paa na u sä! Na ng’khaw chang gui phung avan uk ä, na nu ah hta gui cu ng’coipaa law u sä. Nang ning m’tam ci phung cu m’tam nak gah sä, nang am hriham ning pek ci phung naw hriham gah sä” cine m’shum phyuk ci.

ATÜNNAK 27:29 Referans Kwoze

KHEI NAK 24:9

Pakhui cu m’gäi ciah kawng hlui ah mäih ah kyak ci. Ani a ih sang ung a u naw kä m’tho dat ci. Israel am hriham pek cicu hriham gah khai, Israel plah tam cicu plah tam hmuk khai.”

ATÜNNAK 12:3

Hriham ning pek ci cu, Hriham ka pek khai, Ning plah taam ci cu, Ka plah taam khai, Nang ung chang pakhui avan cu, Hriham ka pek khai” cine pyen ci.

ISAIAH 49:23

Nangmi ah hmawk ah ghangpughang cu pa ah mäih ah kya ne, ghangpughangnu cu nu ah mäih ah kyak khai. Ngami naw nang ah ma ah kawp ne ning m’tamkhah khai gui; Ngami naw ami m’lung neim sak ne, ami ning changmsui nak cu m’dang khai gui. Cun kawn ah Kei, Bawipa ah ka kyak cu nang naw na hmat khai, kei naw ka m’htei vai ah na k’äih ci phung cu am’lung kä thüi khai.”

ISAIAH 45:14

Bawipa naw Israel gui pyen ah gui ci, “Egypt la Sudan gui ah ami khawh cu, nangmi ah kaa ah kyak khai nei, däm ng’sau ciah Seba gui cu nami Khleiktein ah kyak khai gui nei; ngami naw m’sigui awi ne ning läk gui khai gui nei. Ngami naw nami ma ah m’khukdong u neta, ng’kiaa ne pyen khai gui, khanpughi cu nangmi awn atäng ah om ci, ani bäng nei khanpughi.

ISAIAH 49:7

Israel ah theingcim ciah Khanpughi la hunbawi naw, chang gui naw ak nui ah ami päipih, chang pakhui gui naw ami thüi gen, uktu gui ah changshäm am a pyen nak cu; “Ghangpughang gui naw ning laut sak u ne, tho ne ami ning chang m’sui nak cu m’dang khai gui; Manghta gui naw phi cun cu hmu u neta, kawp ne ning chang m’sui khai gui.” Shin cu kya lawk khai, a i ah kyasei ci ung Bawipa naw a changshäm cu ghü pyi ci; Israel ah Theingcim ciah khanpughi naw a shaitak cu k’pank khek ci.

ISAIAH 9:7

Ani ah mang m’gäi huham cu bä law pi bä law pi ne, Ani ah uknak khaw cu angtäi sei dimdeeih khai. Ani naw David ghangpughang ah ng’shon m’täm ciah kya ne uk khai, ani ah huham cu düng nak la taga nak ung phung ne, Tuhbäi ung tün ne kho ang pyi güt uk khai. M’gäi ciah Bawipa naw shin gui avan bik khai ah k’bäi ci.

SAM 72:8

A uknak cu vangtäng tuinu ungka naw vangtäng tuinu ah khüt khai, Euphratis ungka naw kho cawi avan ung khüt khai.

1 GHANGPUGHANG GUI 22:47

Edom kho ung ghangpughang kä om ci; acun cu Judah ghangpughang naw am düih ah uktu naw uk ci.

KHEI NAK 23:8

Khanpughi naw kä a plah tam cu kei naw a i hawkcha ah ka plah tam vai ang? Bawipa naw akshe ah kä ang thu püi cu kei naw i hawkcha ah ka ng’thu püi vai ang?

ATÜNNAK 37:7

Mikmi cu lai ma ah htang aat ne mi pawk yah ung, kei ah htang pawk cu ng’düi law khäta, nangmi ah htang pawk gui naw, koi ne khawihnah ci gui” cine pyen ci.

ATÜNNAK 27:37

Isaak naw, “Ani cu nang ah bawi ah ka pyan pyi, mi ng’khaw chang gui avan ani ah changshäm ah ka k’bäi pyi, htang m’guh la sapyit avan ka ap pyi, tuhbäi nang ah phäh ah a i phi kä ka bi ba thei ci nei, ka hta aw” cine pyen nak ci.

THU PHLAAN 19:16

Ani ah asuinu la a phei khaw ung, “Bawi nüng ah Bawi, mang nüng ah Mang” ciah ming cu ng’guk ci nei.

MATTHE 25:45

Cun kawn ung ghangpughang naw, ‘Kei naw akcang ka pyein cu shin ah chang gui ungka ak yoken pi ah chang käm hteihtang ne nami om phung cu, kei kä nam hteihtang ne nami om ah kyak ci’ cine kyak na gui khai.

MATTHE 25:40

Ghangpughang naw, ‘Kei naw akcang ka pyein cu, shin ah ka nau gui ung kaa, yoken pi ciah chang, nam hteihtang tu phung avan cu kei na nam hteihtang ah kyak ci nei’ cine kyak nak khai.

1 SHONTÄP NAK 5:2

Judah pakhui cu a khüighat pikbäih ah kyasei, pakhui avan uk khai ah ani am ami pek ah kyak ci.

1 GHANGPUGHANG GUI 4:21

Solomon ah uknak khaw ung Euphratis tuinu ungka naw Philistia la Egypt khawgi ung khüt ciah pakhui khaw avan ah kyak ci. Ngami naw ani am khaw phlam pe u ne, ani a ghin ah chuih a uknak ka ah om ci gui.

ATÜNNAK 25:33

Jakob naw, “Hta htük ah kyak nak na na pek khai ah ng’thu na m’khän ma vai” cik ci. Esau naw ng’thu m’khän neta, hta htük ah kyak nak cu Jakob am ap ci.

ATÜNNAK 9:27

Khanpughi naw Japheth cu hlüngtai sak sä. A hta ng’shon gui cu Shem ah chang gui awn om ghawm u sä! Kanaan cu Japheth ah changshäm ah kya sä” cik ci.

ATÜNNAK 27:30

Isaak naw hriham a pek nak ng’pyi sei, Jakob cu a hteh ba vai am, a phäi Esau cu sa yüh te ci law ba ci.

ATÜNNAK 27:40

Khim awn na hnun na m’ghin khai, Na nau ah changshäm ah na kyak khai, Na ng’küknet püi ung phi ani ah k’pan nak ungka a hei ah na gawk khai” cine pyen nak ci.

ATÜNNAK 37:10

Joseph naw ang’mang cu apa am m’thein tu khäta, apa naw m’lungshe neta, “Na ng’mang cu a i hawkcha ah ang? Na nu ni, na phäi gui ni, kei ni naw nang cu law ne kami ning khawihnah khai ah na ngai ne ma?” cine pyen nak ci.

KHEI NAK 24:18

Ani naw Edom ung aga gui cu näng gui khai nei. A mi khaw cu a khawh ah pyang khai nei. Cun cu Israel gui naw k’tä ne näng khai gui nei.

ISAIAH 60:12

Cun ung phi, nangmi ah bi kä bik ciah chang pakhui gui cu, ng’pyi khai gui ah m’di gui khai nei.

ISAIAH 60:14

Nangmi ning shedam na gui ciah ami hta gui cu law u ne, kawp u ne ami ning changsui nak m’dang khai gui nei. Acau ning päipih man ci gui ami van naw na khaw peiah law ne ning khawihnah khai gui nei. Ngami naw nang cu, ‘Bawipa ah mang Gaw’ ah ning khü khai gui nei. ‘Zion, Theingcim ciah Israel khanpughi ah mang gaw’ cik khai gui nei.