ATÜNNAK 24:12 - Cho Bible Common Language 2016

¹² Ani naw, “Ka Bawi, Abraham ah Khanpughi, kei am näng nak na yuk pe ne, ka bawi am na shaitak kümbe sak ä.

ATÜNNAK 24:12 Referans Kwoze

ATÜNNAK 24:27

“Bawipa cu m’hlüngtai nei, ka bawi Abraham ah Khanpughi naw, ka bawi ung shai ataak cu bekhüt ne k’pang ci nei. Bawipa naw kei cu ka bawi ah khochang gui ah na hteh püi ci nei” cik ci.

2 GHANGPUGHANG GUI 2:14

Ani naw Elijah ah suinu awn tui that neta a pyen cu, “Bawipa, Elijah ah Khanpughi cu a hawi ang?” Ani naw tui cu that ba mä ci.

PHYAWN NAK 3:15

Kei, Bawipa, Ami pupa gui ah Khanpughi, Abraham, Isaak, Jakob ni ah Khanpughi naw, nangmi ah ana tüih law nei, cine Israel chang gui am na m’thein gui vai. Cun cu khonglän ung ka ming ah kyak ci. Cun cu ma lam ung hta ng’shon gui naw ami na khü vai ah kyak ci.

PHYAWN NAK 3:6

Kei cu na pupa gui ah na Khanpughi, Abraham, Isaak la Jakob ni ah na Khanpughi nei” cik ci. Moses cu Khanpughi a hmuh vai ah kyi neta a hmai k’bawm ci.

ATÜNNAK 26:24

A cu mü Bawipa naw ng’dang law neta, kei cu napa Abraham ah Khanpughi ah ka kyak ci nei. Kä na kyih vai, kei naw ka ning om püi ci. Ka chang Abraham ung ka shaitak ah mäih ah hriham ka ning pek khai. Chang chün ah ka ning pungpiah sak khai.

ATÜNNAK 24:48

Kei naw m’khukdong ne Bawipa cu khawihnah neta, ‘Bawipa hlüngtai sä, ka bawi Abraham ah Khanpughi naw, lam ka hteh nak ung, ka bawi ah pakhui chang gui ah na hteh püi ci nei. Ka bawi ah hta ah chu vai phi ka hmu pyi ci nei’ ka cik ci.

ATÜNNAK 24:42

Tuh ngawi tuishawk ung gawk law neta, ka taigü ci, “Bawipa, ka bawi Abraham ah Khanpughi, ka bi nak ung näng nak na pe ä.

PHILIPPIAN 4:6

A i a mawng ama ung phi kä nami ng’ä ai vai, angtäi sei m’hlüngtai nak ah m’lung awn k’taigü u ne, nami ng’yak hlü gui cu Khanpughi ah nami ng’yoih vai.

MATTHE 22:32

Khanpughi naw, ‘Kei cu Abraham ah Khanpughi, Issak ah Khanpughi, Jakob ah Khanpughi ah ka kyak ci nei. Ani cu aksi gui ah Khanpughi ah kä kyak ci, ghing ci gui ah Khanpughi ah kyak ci,” cine m’thein gui ci.

NG'THU K'THUUK~ 3:6

Na bi nak päng ung Bawipa om ciah na shüm vai. Ani naw düng ciah lam ning m’shüm khai.

SAM 127:1

Khanpughi naw im kä a cawh ung, Im co ciah bi cu a kholä ah kyak ci; Khanpughi naw gaw kä a ngäng ung, Gaw ngäng ciah ngäng cu a kholä ah kyak ci.

SAM 122:6

Jerusalem ah dimdeeih nak vai ah taigü vä: Nang ning m’hni ci gui cu bämang u sä.

SAM 118:25

Na hun gui ä, Bawipa, na hun gui ä! O Bawipa, näng nak na pe gui ä!

SAM 37:5

Bawipa am na pum pe ä; ani ung ng’ap ä, ani naw ning m’htei khai nei;

NEHEMIAH 2:4

Uktubawi naw, “Cun ung nang naw a i ang na ng’yak hlü?” Kei naw khankhaw Khanpughi ah ma ah taigü neta,

NEHEMIAH 1:11

Tuhbäi kei ah taigü na ngaih pe ä, nang ning m’tamkhah hlük ciah a hei na chang gui ami van ah taigü phi ngaih peä. Tuhngawi kei ung näng nak na yuk pe lawä, uktu bawi am kei cu na chimgein sak ä.” Cun yah ung kei cu uktu bawi am sapyit tui thak ciah ka kyak ci nei.

1 GHANGPUGHANG GUI 18:36

Khaw k’awi täng khawihnah nak ah khin ung prophet Elijah naw sonkiang pei ah law neta ak taigü cu, “O Bawipa, Abraham, Issak, Jakob ni ah Khanpughi, Israel gui ah Khanpughi ah na kyak ah mawng, kei cu na na changshäm ah ka kyak ah mawng, shin gui avan nang ah thumkhän awn ka bi ah mawng cu tuhbäi m’dang law ä.

ATÜNNAK 43:14

Cun ah chang ah m’lung kyong ung nangmi a ning yei nak gui vai ah hlüngtai ciah Khanpughi naw bii bi sä! Nami phäi tumat la Benjamin phi ning pe ba gui sä. Kei ah hmawk ah ka hta gui cu maih khai gui ah a kyak ung, maih khai gui ah va kya khai nei” cine m’cäi gui ci.

ATÜNNAK 32:9

Cun kawn ah Jakob ah taigü cu, “Ka pughi Abraham ah Khanpughi, kapa Isaak ah Khanpughi, ka taigü cu na ngai pe ä! Nang Bawipa naw ka khaw, ka chang gui ah ka hteh ba vai ah na pyen ci. A päng ung na näng vai ah ka ning m’htei khai nei, na cik ci.

ATÜNNAK 31:42

Kapa ah Khanpughi, Abraham la Isaak ah Khanpughi naw, kei kä a na om püi vai sü ung nang naw kei cu ka k’plui ah na na gawt ba khai süte nei. Khanpughi naw ka bilawh la ka yaica cu hmuh neta, zanmü nang cu a ning k’dee ah kyak ci nei.

ATÜNNAK 28:13

Bawipa cu a pei ah ng’düi neta, “Kei cu Bawipa, Abraham la Isaak ah Khanpughi nei, Nang la na htangshon am tuhbäi na ng’yän nak ah khaw cu ka ning pek khai nei.

ATÜNNAK 27:20

Isaak naw, “A i hawkcha ah shin ah ng’ghit ah na gah law ang, ka hta aw?” cik ci. Jakob naw, “Na Khanpughi Bawipa naw ka hmuh vai ah na m’htei ci nei” cik ci.

ATÜNNAK 27:10

Cun hteh püi ne na m’bei vai, kä a sih pha ung hriham ning pek khai” cine pyen nak ci.

ATÜNNAK 15:1

Cun kawn ah ang muimang ung Bawipa naw ng’thu püi sei Abram naw a hmuh ng’yak cu, “Abram, kä na kyih vai, kei naw nang cu ka ning shungvong khai, m’cümhnah aktung ka ning pek khai” ciah kyak ci.

ATÜNNAK 24:21

Cun ah chang naw cun ah hnumi hta cu hmu neta, ani ah law nak ah mawng ung Bawipa naw am htei la kä am htei ah mawng cu adüm ah om ne teng ci.

ATÜNNAK 32:10

Na m’hni nak la na bekhüt nak cu kei changshäm awn kä khinkha ci nei. Cau kei naw Jordan tuinu cu ng’shopawng bäng awn ka kat lawk ci nei, cun ung phi tuhbäi chang bum hnih kami law lawk ci.