2 TIMOTHI 3:3 - Cho Bible Common Language 2016

³ Ngahmi cu m’gein nak kä om ci, chihna nak kä om ci, chang ah ming m’shet ci, m’gäi m’cik ci, hlawhlang ciah kyak khai gui nei; ak ni phung cu thüi nak khai gui nei.

2 TIMOTHI 3:3 Referans Kwoze

JUDE 1:18

Ngahmi naw, “Ak hnu k’bäih ah khaw hnüüp gui ung ning päipih ciah chang gui, Khanpughi kä shüm hmat ne ami mät ah ng’yak hlü ah om ih ciah chang gui dang lawk khai gui nei” ci ne pyein ci gui.

ROMAN 1:31

A mi om she yawp sei, ami shaitaak ah phi kä om ci gui, ami paw chang phi kä chimgein ci gui.

MATTHE 10:21

‘Chang phäi nau gui tumat la tumat sih nak ung ng’ap tuk khai gui, nupa gui naw ami hta gui sih nak ung ap khai gui, ami hta gui naw phi, ami nupa ah m’cäi kä ngai ne ngawn phak khai gui.

2 PETER 2:14

Ngahmi cu hlahhlawng ciah hnumi bäng teng hlü u ne, a i awn käng büh hlawt ci gui. Ngami naw ayum nak kä htek cicu m’vam ung kyak sak ci gui, ami m’lung naw a i baw m’hni aih ci, Ngahmi cu Khanpughi ah k’phyun nak gah ci gui!

1 TIMOTHI 3:11

Ami chu gui cun phi akni ah m’lung ngaih om ih ci gui ah a kiak vai, khleei khlam ci gui ah kä kyak en sä. Ciimvai lunglang ne, ngaih gep vai ah chang ah ami kyak vai.

MATTHE 4:1

Cun kawn ah khoshe ah tüihtok nak a aut vai ah Bawipa Jesuh cu Mumcha naw bung ah hteh püi ci.

DANIEL 8:23

“Cun uknak khaw gui ang pyi nak vai ang et law ung, ngami cu sheka law aih u ne, m’kyuk nak gah khai gui. Cun kawn ah am lung ling ne, m’gäi m’cik ne, hleei hlak ciah ghangpughang om lawk khai.

THU PHLAAN 17:6

Cun ah hnumi nu naw Khanpughi ah chang gui ah si la Bawipa Jesuh ung bekhüt u sei, ami ngawn gui ah chang gui ah si cu aw ne, awktat sei ka hmuk ci. Ani hmu netah kei cu ang htei ah cäi ne ka tu ci.

THU PHLAAN 16:6

Ngami naw Khanpughi ah chang gui la purofet gui ah si cu huk sak ci gui nei, cun ah kyasei ami awk vai ah si cu na peit gui ah kyak ci nei. Ngami cu ami bi ah mäih ah gah ba ci gui ah kyak ci nei” cine a pyein cu ka ng’yak ci.

THU PHLAAN 13:17

Cun ah m’hnüt nak ah kyak ciah khiküi ah ming, kä cun ung ang ming dang sak ciah khei nak, awn kä ami m’hnüt tu ah chang phung cu sumlei ng’dong’pe ne kä gah tuk ci.

THU PHLAAN 13:15

Ak htük ung khiküi ah agup am ghin nak peit nak hning cu ak hnih nak ah khiküi ung om ci. Cun ah kyasei a gup cu ng’thu ne ani kä khawihnah tuk ci gui cu m’sih gui hning ci.

JUDE 1:16

Cun ah chang gui cu angtäi sei nawmpang u ne, katnak phi chang am m’suh m’noh ci gui; ngami naw ami mät ah ng’yak hlü ah ak shekha cu läk ci gui; ami mät ah mawng pyein ne khäghah u ne, ami mät hmawk ah chang phi m’hlüngtai ci gui.

2 PETER 3:3

Ak htük ah, ak hnubäih hnüüp ung, amät ah ng’yak hlü düt ah ghing ciah chang gui dang lawk khai ci cu, nami hmat vai nei. Ngami naw nangmi cu ning gaih m’gin gui ne,

JAMES 2:6

Cun ung phi nangmi naw pyamtham cicu chang ah kä nami ngai ci, bühmang ci gui naw nangmi cu ning yoshe na gui u ne, yung ah m’kawt mang ah khlaak ung ning hteh püi gui ciah kä kya ne ang?

TITUS 2:3

Acun ah mäih ah hnumi ng’vaiba gui phi theingcim ciah ghin nak a om vai ah nam cäi gui vai nei. Ngami cu chang ah thang m’shet ci gui, kä cun ung yu ah khleihtein gui ah kä ami kyak en vai nei. Akni phung m’theithang ba thei ciah ami kyak vai nei.

TITUS 1:8

Ani cu khin m’htei ci, ak ni m’hni ciah chang ah kyak khai. Ani cu htingling ci, düng ci, theingcim ci, pyein ah om ciah chang ah kyak khai.

1 THESSALONIAN 4:8

Shin ah m’theithang nak hnu ng’tuk püi ciah chang cu, chang hnu ng’tuk püi ciah kä kyak ci, Mumcha Theing na pe gui ciah Khanpughi cu hnu ng’tuk püi ciah kyak ci.

1 KORIN 7:9

Cun ung phi nami ng’yak hlü nak ah m’lung kä nami k’üüp hlawt läi ung nami ng’chula vai nei. M’lung so ne ling sei om ah mä ng’chula ne om cu bä tu ba ci nei.

1 KORIN 7:5

Nangmi naw k’taigü nak vai ah ng’dawt ne nami k’bäi ah akhin nami peit ah kawn ah, ng’chula goi ah ng’yak hlü cu kä nami ng’chei en sak vai nei. K’Taigü nak ang pyi kawn ah nami om man ah nami om ba vai nei. Cun ung vah nami m’lung cu htingling sak hlawt u ne Satan ah tüihtok nak cu nami m’khüt näng khai.

JOHAN 6:70

Bawipa Jesuh naw, “Kei naw chang gha-lei-goi ka ning ghü gui ciah kä kya ne ang? Cun ung phi nangmi ungka chang tumat cu, khoshe ah kyak ci nei” cine pyen na gui ci.

LUKA 16:14

Ngui ng’ya hlük ciah pharisee gui cu, cun ah ng’thu cu ng’ya u netah, Bawipa Jesuh cu m’lep nak ci gui.

LUKA 10:16

Bawipa Jesuh naw, Ang düihpüi gui-am, “Nangmi ah ng’thu ngai cicu kei ah ng’thu ngai ci, nangmi ning nawng gui ci cu, kei na nawng ci, kei na nawng ci cu, kei na tüi lawk cicu nawng ciah kyak ci” cine m’thein gui ci.

ISAIAH 60:14

Nangmi ning shedam na gui ciah ami hta gui cu law u ne, kawp u ne ami ning changsui nak m’dang khai gui nei. Acau ning päipih man ci gui ami van naw na khaw peiah law ne ning khawihnah khai gui nei. Ngami naw nang cu, ‘Bawipa ah mang Gaw’ ah ning khü khai gui nei. ‘Zion, Theingcim ciah Israel khanpughi ah mang gaw’ cik khai gui nei.

ISAIAH 53:3

Mik mi naw mi päipih ne mi hnu nak ci; Ani cu yaica ne m’neh m’awh ci. Ani teng khai tumat phi kä om ci — Ani cu akholä ah mäih ah mikmi naw mi nawng ci.

SAM 22:6

Kei cu chang ah kä ka kya ci; m’kyiit ah ka kya ci, chang ah päipih, shemshai ah ka kyak ci!

ATÜNNAK 49:7

Ani m’lungshe nak ung plah nak om khai, a i ah kyasei ci ung cun cu ng’hüüt ci. Ani m’lungso nak ung plah nak om khai, a i ah kyasei ci ung cun cu shekhak ci. Israel khaw avan ung ka püi sak gui khai. Ami chang gui ah ng’lung ah ka pawng sak gui khai.

2 PETER 2:19

Ngahmi naw chang-am ng’päiye nak shai ami taak ung phi, ami mät cu didap nak ah khleihtein ah kyak ci gui. A i ah kyasei ci ung, chang cu ani uk ciah khleihtein ah kyak ci.

SAM 15:4

Ani naw Khanpughi hnu ng’tuk püi cicu päipih ci, cun ung phi Bawipa läk cicu m’tam khah ci, ani cu a shaitak ah mäih ah angtäi sei bik ci, a mät ah chaw a häu ung a i ah kä ngai ci.

ROMAN 1:29

Ngami cu shekat nak a hlü hlü bi u ne, ngetngawng nak, shemshai nak, ng’yak hlü aih nak, om k’she nak, m’thüikhang nak, chang ngawn nak, ng’tuk nak, hleeihlak nak, ng’u hngeit nak, gui cu m’chei m’shoh ci gui. Ngami cu khleei u ne;