2 SAMUEL 7:16 - Cho Bible Common Language 2016

¹⁶ Nang ung angtäi sei na hta ng’shon om khai, nang ah uknak khaw cu kä ng’pyi hlawt khai ah kei naw ka pyang khai. Nang ah uknak ng’shon cu kä ng’pyi hlawt khai!” cik ci.

2 SAMUEL 7:16 Referans Kwoze

2 SAMUEL 7:13

Ani cu kei ah phäh ah pum im co ciah chang tumat ah kyak khai, ani ah uknak khaw cu ng’täi ne om khai ah kei naw akcang ah ka pyang khai.

ISAIAH 9:7

Ani ah mang m’gäi huham cu bä law pi bä law pi ne, Ani ah uknak khaw cu angtäi sei dimdeeih khai. Ani naw David ghangpughang ah ng’shon m’täm ciah kya ne uk khai, ani ah huham cu düng nak la taga nak ung phung ne, Tuhbäi ung tün ne kho ang pyi güt uk khai. M’gäi ciah Bawipa naw shin gui avan bik khai ah k’bäi ci.

DANIEL 7:14

Ani cu huham nak, m’tamkhah nak la bawimang nak huham ami pek ah kyak ci. Cun ah kyasei changpakhui gui, pahta gui, pa ng’tän gui avan naw a bi bik ci gui. Ani ah huham cu kä ng’pyi hlawt khai, ani ah uknak khaw cu kä maih hlawt khai.

DANIEL 2:44

Cun ah uktu gui ah a khin ung khankho Khanpughi naw kä ng’pyi hlawt ciah uknak khaw cu m’düih khai. A cun cu a u naw kä näng hlawt khai, ani naw ahei uknak khaw gui cu m’di yawp ne, khonglän ung om khai.

SAM 45:6

Khanpughi ah ning pek ah uk nak kho cu a ngawi ah phi kä ng’pyi hlawt khai nei. Nang naw na chang gui cu taga nak awn na uk gui ci

ATÜNNAK 49:10

Mang ah hteipawng cu Judah naw kawt khai. A hta ng’shon naw khonglän ung uk khai. Pakhui gui naw khawh pe lawk khai gui. Ani kyih aa ne ama ah kawp khai gui.

THU PHLAAN 11:15

Cun kawn ah akchih nak ah khankho chang naw ak phyungheng cu tum khätah, “Khomdek uknak ah hlüngtai nak cu mi Bawipa la a Messiah naw khäm pyi ci nei, ani naw ngawi yä uk lä khai nei” ci ne khankho ah k’aw naw pyein ci.

HEBRU 1:8

Cun ung phi A Htapa ah mawng a pyein nak läi ung Khanpughi naw, “O Khanpughi, na uknak ah kho cu, ang täi sei khäng khai nei! Nang naw na chang gui cu ng’müi khai ah Na uk gui ci nei.

JOHAN 12:34

Chang gui naw, “Keimi ah thukhän ung, Messiah cu angtäi ah ghing khai, ciah om ci; chang A Htapa cu m’dek ungka han k’phäi nak gah khai, na cicu a i ang? chang ah Htapa cu a u ang?” cine ng’shik ci gui.

2 GHANGPUGHANG GUI 19:34

Kei naw shin ah mang gaw cu kamät ah ng’tam nak vai ah ghung ne ka m’htei khai, a i ah kyasei ci ung kei naw ka changshäm David ung a cun ah shai ka tak ah kyak ci.”

SAM 72:5

Hni ang shü ah chuih, cha a vai ah chuih, kho ng’län ung na chang gui naw ning khawihnah u sä.

MATTHE 16:18

Cun ah kyasei nang cu, “Kheng lung,” ah ming ciah “Peter” ah na kyak khai, acun ah kheng lung ah khan ah ka pum im ka k’süm khai, cun cu sihnak naw phi kä näng hlawt khai.

1 SAMUEL 25:28

Saza, na bä ni, na m’geinsei ä, hma nak ka bi phung cu. Bawipa naw ghangpughang ah ning hmoh khai, na hta ng’shon gui phi a cun ah kyak khai, a i ah kyasei ci ung, nang cu ani ah phäh ah ng’tuk na bik ci; nang cu na ghin ah chuih akshe kä na bik ci.

2 SAMUEL 7:17

Khanpughi naw ani ung am thein phung cu Nathan naw David am m’thein ci.

1 GHANGPUGHANG GUI 9:5

Kei naw napa David am ka shaitak cu ka k’pang khai, kei naw ka pyen nak cu Israel cu ani ah hta ng’shon naw angtäi sei uk khai ciah kyak ci.

SAM 89:4

Nangmi ah hta ng’shon cu ngawi yä ghangpughang ah kyak khai, “Nang ah hta ng’shon cu ngawi yä ka khän sak khai,” na cik ci.

JEREMIAH 17:25

Cun kawn ah ami ghangpughang gui la ami manghta gui cu Jerusalem m’kawt gui un glut lang khai gui, ngami cu Judah la Jerusalem chang gui awn atäng ah yatha gui la ng’se gui awn be khai. Jerusalem mang gaw cu angtäi sei chang gui awn be khai.

JEREMIAH 33:17

kei, Bawipa naw shai ka tak cu, David ah htangshon cu angtäi sei, Israel ghangpughang ah kyak khai,

2 SAMUEL 22:51

Khanpughi naw a ghangpughang am näng nak akdäm pek ci; Ani naw kä ng’pyi hlawt ciah m’hni nak cu a ghü ah chang tumat David la a hta ng’shon am ngawi yä m’hnuh ci nei,

1 GHANGPUGHANG GUI 2:4

Nang naw na ngaih ah a kyak ung, Bawipa naw abi ah shaitak cu k’pang khai, ani naw ana pyen nak cu, kei ah ka htang’shon gui naw ami m’lung kyong m’lung ngaih avan awn ani ah thumkhän cu bekhüt ne, geing na ne ami läk ah chuih Israel cu uk khai gui nei.

2 GHANGPUGHANG GUI 8:19

cung phi Bawipa naw Judah m’di vai cu kä ng’ya hlük ci, a i ah kyasei ci ung, ani naw a changshäm David am, ani ah hta ng’shon gui naw ami uk lä vai ah shaitak a bi pyi ah kyak ci.

2 SHONTÄP NAK 6:16

Tuhbäi, Bawipa Israel Khanpughi, kapa ung a hei shaitak na’bi phi na k’pang khai nei, nang naw na pyen nak cu, ani ah mäih ah na thukhän geing na ne ami läk ah khoi ung, ani ah htangshon tumat mat naw Israel ghangpughang ah kya ne uk khai.

JOB 36:7

Ng’düng ciah chang gui cu ani naw shungvong gui ci. Ani naw ghangpughang ah mäih ah uk sak gui ne angtäi sei m’tam khah gui ci.

ISAIAH 9:6

Mik mi ah phäh ah a hmawhta ng’tüi pyi ci! A Htapa cu na pe gui pyi ci! Ani cu mikmi ah uk tu ah kyak khai. Ani ah ang ming cu, “Cäicat vai, ng’ge ng’pai tu,” “M’gäi ciah Khanpughi,” “Angtäi ghing ciah Pa,” “Dimdeeih nak ah manghta” ah khü khai gui.

EZEKIEL 37:25

Ngami cu kei naw ka changshäm Jakob am ka pek ah khaw ung om khai gui, cun cu ami pupa gui ah om nak ah khaw ah kyak ci. Ngami cu acu ah khong län ung om khai gui, ami hta nau gui la ami htangshon gui phi om khai gui. Ka changshäm David ghangpughang ah mäih ghangpughang naw ang’täi ah uk gui khai.