2 PETER 3:16 - Cho Bible Common Language 2016

¹⁶ Shin cu Paul naw a guk ah ca ung ang dang sak ah mawng ah kiak ci. Cun ah ca ung kä hmat yäi vai amshah om ci. Kä hmuhmat la lawklak ciah chang gui naw ang lihlat ah, khei ne pyein ci gui. A hei cacim gui cun phi acun ah mäih ah m’ki m’hlat u sei, ami mät ah dimaih nak vai ah kyak ci.

2 PETER 3:16 Referans Kwoze

MATTHE 15:6

A cu cha ah nangmi cu Khanpughi ah thukhän nawng-en u ne, nami mät ah thungyo cu nami läk ci.

HEBRU 5:11

Shin ah a mawng ung ning m’thein gui vai akda om ci, cun ung phi nangmi cu kä nami cüivai ngai ci kyasei, pyeinsak cu kä yäi ci.

2 PETER 2:14

Ngahmi cu hlahhlawng ciah hnumi bäng teng hlü u ne, a i awn käng büh hlawt ci gui. Ngami naw ayum nak kä htek cicu m’vam ung kyak sak ci gui, ami m’lung naw a i baw m’hni aih ci, Ngahmi cu Khanpughi ah k’phyun nak gah ci gui!

PHILIPPIAN 3:19

Cun ah chang gui cu m’htei kho khüt ne hteit ci gui ah kyak ci. Ngami ah Khanpughi cu pumsa a ng’yak hlü ah om ih nak ah kyak ci. Ngami cu thui ng’aa nak vaisü ung khähghah ci gui, ami m’lung kyong ung phi khomdek khan ah a mawng ama bäng be ci.

JEREMIAH 23:36

Cun ung ngami naw ‘BAWIPA ah phuih’ ciah ng’thu cu kä mang ba khai gui nei, a i ah kyasei ci ung, tumat mat naw a pyen ba ah a kyak ung kei ah ka ng’thu cu ani ah khan ah phuih ah kyak khai ah ka bik khai nei. Chang gui ne m’gäi ciah Bawipa, ghing ciah khanpughi, ami khanpughi ah ng’thu cu m’hlat shüi ci gui nei.

1 PETER 2:8

A hei cacim ung, “Cun ah lung cu chang gui ah m’thuihshawng nak vai la, Chang gui ah ng’vawn ng’täät nak vai ah kyak ci”, ciah om ci. Ngami cu thucim kä yum ci gui ah kya ne, ‘Thuihshawng ci gui, cun cu ngami ah hmawk ah Khanpughi naw am’hnüt ah kyak ci.

MATTHE 22:29

Bawipa Jesuh naw, “Nangmi cu cacim phi kä nami hmat ci, Khanpughi ah hlüngtai nak phi kä nami hmat ci, cun ah kyasei nami m’lung ngaih cu ng’lat ci.

HABAKKUK 1:4

Thukhän cu ng’yom ci, a i ah kä mawng ci, taga ciah m’khoicha nak kä om ci, changshe gui naw changnigui ah ni nak cu la u sei, taga nak cu ng’lat yawp ci.

SAM 56:5

Ka gaa gui naw ak hnüüp pum na khüikha sak ci gui, angtäi sei na ceng cham ci gui!

JUDE 1:4

A i ah kya sei ci ung Khanpughi kä yum ci gui cu nami ng’lung ah lut ne om ci gui nei. Ngami naw mi Khanpughi ah m’gein nak ah ng’thu cu, khawdek pumsa ami ng’yak hlü lam düt ah m’hlat u ne, tumat khläm om ciah mi Bawi, mi Mang Jesuh Khrit cun phi hun ng’tuk püi ci gui nei. Cun ah chang gui cu cau pui ge, shetkat nak gah khai gui ah m’hnütbäi gui ah kyak ci.

2 PETER 2:1

Thuvi ciah profet gui caü ami dang man ah mäih ah, thuvi ne m’theithang ci gui cu nangmi ah ng’lung ah dang lawk khai nei. Ngahmi naw dimaih nak vai la käng düng ciah yum nak cu law püi u ne, na hun gui ciah Bawipa phi mak khai gui nei, Cun gui cu a shänghta dimaih nak ung gawk khai gui nei.

MATTHE 15:3

Bawipa Jesuh naw, “Nangmi a i ah kyasei Khanpughi ah thukhän nawng-en ne, nami mät ah thungyo man düt nami läk ang?

1 PETER 1:1

Peter, Bawi Jesuh Khrit ah ang düihpüi naw, Pontus, Kalatia, Kappadocia, Asia, la Bithinia kho gui ung, püi u ne, om k’tu ah kya ne om tuk ci gui ah, Khanpughi ah ghü ah chang gui-am ca ka guk lawk ci nei.

1 GHANGPUGHANG GUI 10:1

Sheba Ghangpughangnu naw Solomon ah mingthang cu ng’ya neta m’nüm nak ah ng’shi nak gui awn m’nüm khai ah Jerusalem ah lawk ci.

THULÄÄN NAK 16:19

Ngami cu kä taga ciah kä kyak khai gui, ami ng’thumcha nak ung m’khoihnga nak kä m’dang khai gui. Ng’mü khawh kä dou khai gui, cüivai ci la düng ci chang ah mik phi m’cümhnah nak naw m’dauh sak ci. Acun naw hma ci m’hnüt bäi nak pe gui ci.

PHYAWN NAK 23:6

“Dukhaih ciah chang yung ah a gawk law ah a kyak ung, kä taga ciah kä na ng’thumcha en vai.

PHYAWN NAK 23:2

Katnak bi u ne, taga nak k’phleng ne ami saksi law ung chang ah da nak täng düt ah kä na läk tu vai.

ATÜNNAK 49:4

Nang cu tuiklaw ah mäih ah na kyak ci. Cun ung phi nang cu aküikyang pi ah kä na kyak khai, A i ah kyasei ci ung kei ah ka chuba ih püi ne, na pa ah ihphak cu na shetkat sak ciah kyak ci.

2 PETER 3:2

cau pui profet theing gui ah ng’thu pyein la Hunbawipa naw ang düihpüi gui awn a ning peit gui ah thu khän cu nami shum vai ah ka ng’ya hlük ci nei.

2 PETER 3:14

Cun ah kyasei teihpüi gui aw, cun ah hnüüp cu nami gin yah ung, Khanpughi ah ma ah, theing ne shetkat nak kä om sei, dimdeeih nak a om vai ah nami tha nak vai nei.