2 PETER 2:7 - Cho Bible Common Language 2016

⁷ Cun ung phi chang shekha gui ah om ah cheishoh ciah chang k’ni Lot cu phiawn sak ci.

2 PETER 2:7 Referans Kwoze

ATÜNNAK 19:16

Lotah cu shoshü khätah, Bawipa naw m’gein neta, khanchang gui naw amät la akchu ni, a hta goi ni cu ami kut awn k’pang ne, gawnu k’pung ah dawng püi gui ci gui.

ATÜNNAK 19:29

Khanpughi naw Lotah ah om nak ah khaw ng’nawi ung mang gaw gui cu amdi yah ung, Abraham cu amlung ung shüm ba neta Lotah cu phyawn sak ci.

2 PETER 3:17

Cun ung phi teihpüi gui aw, shin ah mawng cu nami hmat pyi ah kiak ci. Chang shekha gui ah lam k’she ung kä nami läk en tu vai ah, khäng sei nami ng’düih nak ungka kä nami yung kyak en vai ah geing nah ne nami om vai nei.

1 KORIN 10:13

Nangmi naw tuhbäi nami buiaut ah tüihtok nak gui cu, chang ung gawk law man ci bängbäng ah kyak ci nei. Khanpughi cu a shaitaak ah mäih ah om ciah kya ne, nangmi naw kä nami m’khüt vai ah tüihtok nak cu kä ning awt sak gui khai. Tüihtok nak nami awt law ung nami m’khütnäng nak vai ah k’thagui ning pe gui ne, nami phiawn nak vai ah lam ning m’hnuh gui khai.

JEREMIAH 23:9

Ka m’lung cu ng’deeng ci, kei cu ka ng’thüng ci nei. Bawipa ah a phäh ah, ang thu theing gui ah phäh ah, sapyit tui akda aw aih ne, awktat ciah chang ah mäih ah ka kyak ci nei.

ATÜNNAK 13:13

Sodom gawnu ung chang gui cu, chang shekha gui, Bawipa hnu na ne cheishoh ci gui ah kyak ci.

ATÜNNAK 19:22

Akzaang ah dawng ä! A cu ah kä na gawk pha ah chuih kei naw a i kä ka bi cang khai nei” cine pyen ci. Lotah naw gawhta a ciah kyasei cun ah pigaw cu “Zoar” ah a ming sui ci gui.

SAM 120:5

Nangmi ah ng’lung ah om cu Meshech khaw la Kedar chang gui ah ng’lung ah om tu ah mäih ah shek ci nei.

ATÜNNAK 19:5

Lotah cu khü u ne, “Tuhmü na im ah ip tuk khai ah lawk ciah chang goi a hawi ang? Sodom chang pami gui naw kami ng’yawpawm püi goi vai ah na ap gui ä” cine k’thäh ci gui.

2 PETER 2:2

Cun ung phi chang akda naw shekak ciah ami lam cu läk khai nei. A i ah kyasei ci ung ngami ah bilawh nak awn chang a hei gui naw thucim ah lam cu päipih khai gui nei.

2 PETER 2:18

Ngahmi naw shetkat nak ungka phyawng law thai ciah chang gui cu, khähghah ne thuvi nak ah ng’thu la pumsa ah ng’yak hlü hlimtui nak gui awn k’däk ne lam hma sak gui ci gui.

JUDE 1:4

A i ah kya sei ci ung Khanpughi kä yum ci gui cu nami ng’lung ah lut ne om ci gui nei. Ngami naw mi Khanpughi ah m’gein nak ah ng’thu cu, khawdek pumsa ami ng’yak hlü lam düt ah m’hlat u ne, tumat khläm om ciah mi Bawi, mi Mang Jesuh Khrit cun phi hun ng’tuk püi ci gui nei. Cun ah chang gui cu cau pui ge, shetkat nak gah khai gui ah m’hnütbäi gui ah kyak ci.