2 GHANGPUGHANG GUI 7:9 - Cho Bible Common Language 2016

⁹ Cun kawn ah ngami cu ami mät gui ng’cengcäk u ne, “Shin ah kä mi bik khai! Mikmi ung thu k’ni om ci, a cun kä mi k’üüp düt khai. Mikmi naw khongawi güt kä pyen ne mi om ung na m’kyuk gui khai gui. Mikmi hteit ge ne ghangpughang ah bawi gui am mi m’thein gui khai nei!”

2 GHANGPUGHANG GUI 7:9 Referans Kwoze

ISAIAH 52:7

Dimdeeih nak ah ng’thu, thuni law püi ne, khomhtung kau ne lawk ciah, shächang hmuh tu cu cäicat aih vai ah kyak ci nei! Ani naw näng nak ng’shäu neta Zion a pyen nak cu, “Na khanpughi cu ghangpughang nei!”

PHILIPPIAN 2:4

Nami mät ah hmawk bäng ah kä ng’ä ne, nami pawchang ah hmawk ah phi nami ng’ä vai nei.

NAHUM 1:15

Teng vä, ng’shä chang cu khomhtung khanah ng’thuni awn law pyi ci nei! Judah chang gui mang yu sa ne, khanpughi am bä ciah nami shaitaak cu pe vä! Changshe gui naw nami khaw kä plawh ba khai gui. Ngami ami van cu di maih pyi ci gui nei!

ISAIAH 41:27

Zion am m’thein htük cicu kei, Bawipa ah kyak ci nei; kei naw Jerusalem ah ng’shä tüi ne ka pyen sak cu, ‘Na chang gui lawk ci gui nei! Ngami cu ami im ah law ba ci gui nei!

2 GHANGPUGHANG GUI 7:3

Kheilei ung gaw ciah chang phli cu Samaria gawnu m’kawt ah akpung ah om u ne ami mät ng’htau ci gui, “A i ah kyasei mikmi mi sih güt ung shin ung mi om vai ang?

KHEI NAK 32:23

Cun ung phi nangmi naw nami shaitak kä nami k’pan ah a kyak ung, nangmi naw Bawipa hnu tuk püi ne nami hmakak ciah kei naw ka ning k’bäi gui khai. Shin ah mawng ung hma nak kä nami bi en vai, nami katnak ah phäh ah m’kyuk nak nami gah khai nei.

LUKA 2:10

Khankho chang naw, “Kä kyikyawk vä, chang avan naw ang htei ah a yeikyai nak vai ah ng’thu Ni cu nangmi ah hmawk ah ka law püi ci nei.

NG'THU K'THUUK~ 24:16

Düng ciah chang cu a i chü vei a kyuk ung phi a i ah kä kyak ci. Angtäi sei tho ba ci, cun ung phi chang shekha cu leigai naw m’di ci.

2 GHANGPUGHANG GUI 7:6

Bawipa naw Sirian gui ah ng’yak vai ah ng’se gui la yatha gui awn lawk ciah gakap ak chün ah mäih ah k’aw cu ng’thang sak khäta, Israel ghangpughang naw Hittit la Egypt ghangpughang gui ng’vat sei ami gakap gui naw tu law gui ciah ngai ci gui.

2 GHANGPUGHANG GUI 7:8

Cun ah chang phli cu phung a hangleng ung gawk law u neta suisak gui ami hmuh cu hteh püi ne thup ci gui. Cun kawn ah ng’hlat ba u ne, a hei pyu ung mä lut ba ci gui, a cun ah mäih ah bi ba ci gui.

2 GHANGPUGHANG GUI 7:10

Cun ah kyasei ngami naw Sirian phung cu hteh ta u ne, Samaria ah hteit ba u ne, m’kawt ung om ne gaw ngäng gui cu khü gui ci gui: “Keimi Sirian gui ah phung ah kami hteit ci, a i phi kä kami hmuk ci, kä kami ng’yak ci; ng’se gui la laa gui cu ami k’pawn ah täng ah om ci gui, k’pyu gui cu Sirian gui naw ami nawng ah täng ah om ci.

2 GHANGPUGHANG GUI 5:4

Naaman naw a cun cu ng’ya neta, ghangpughang ah hteit ne, hnumihta ah pyen cu m’thein ci.